ކޮލަންބޯގައި ދިވެހިންނަށް ޚާއްސަކޮށް ހެދި ޕާކު ހުޅުވައިފި
ސޯސަން ޕާކަކީ ދިވެހި ސަގާފަތް ފެންނަ ގޮތަކަށް ފަރުމާކޮށް ހުޅުވި ޕާކެއް
ސޯސަން ޕާކު ހުޅުވުމުގެ ރަސްމިއްޔާތުގެ ތެރެއިން...
ސްރީލަންކާގެ ވެރިރަށް ކޮލަންބޯގައި ދިވެހިންނަށް ޚާއްސަކޮށްގެން ހަދާފައިވާ ސޯސަންވިލާ ގައި ސަރުކާރުން ތަރައްގީ ކުރި "ސޯސަން ޕާކު" ހުޅުވައިފިއެވެ.
ލަންކާގައި ހުންނަ ދިވެހި އެމްބަސީ ކުރިން ހިންގި ސޯސަންވިލާގައި ހަދާފައިވާ މި ޕާކު، މި ރަމަޟާން މަހާއި ދިމާކޮށް ހުޅުވައިދެއްވީ މިނިސްޓަރ އޮފް ޓުއަރިޒަމް މޫސާ ޒަމީރެވެ.
ދިވެހި ސަގާފަތް ފެންނަ ގޮތަށް ފަރުމާކޮށްގެން ހުޅުވި މި ޕާކަކީ މިދިޔަ އަހަރުގެ މާޗް މަހުގެ ތެރޭގައި ލަންކާގެ ސިއެރާ ކޮންސްޓްރަކްޝަން ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ ހަވާލުކޮށްގެން ހެދި ޕާކެކެވެ.
ތިން ބަޔަކަށް ބަހާލައިގެން ހަދާފައިވާ މި ޕާކުގެ 'އޭރިއާ އޭ' އަދި 'އޭރިއާ ބީ' ހާއްސަކޮށްފައި ވަނީ ކުޑަކުދިންނަށެވެ. އެ ގޮތުން މިދެބައިގައި ހުންނާނީ ކުޑަކުދިން ކުޅޭ ސާމާނެވެ. ތިންވަނަ ބައިގައި ހުންނާނީ ޖޯލިފަތިތަކާއި އުނދޯލިތަކެވެ. މިބަޔަށް ކިޔަނީ ޖޯލި މައިޒާނެވެ. އެ މައިޒާނުގައި މަސް ފެންގަނޑެއް ވެސް ވަނީ ހަދާފައެވެ.
މިޕާކާއި ބެހޭ ގޮތުން ހައުސިން މިނިސްޓަރު ޑރ މުހައްމަދު މުއިއްޒު ވިދާޅުވީ ކޮލަމްބޯގެ ސޯސަން ވިލާ ހުންނަ ސަރަހައްދަކީ ގިނަ ދިވެހިން ދިރިއުޅޭ ސަރަހައްދެއް ކަމުން މިޕާކުގެ ސަބަބުން އެތައް ފައިދާތަކެއް އެ ސަރަހައްދުގައި ދިރިއުޅޭ ދިވެހިންނަށް ކުރާނެ ކަމަށެވެ. އަދި މިފަދަ ޕާކެއް ރާއްޖޭން ބޭރުގައި ތަރައްގީ ކުރުމަށް ނިންމީ ގިނަ ދިވެހިންތަކެއް އެކަމަށް އެދެމުންދާތީ އެ ދިވެހިންނަށް ހިތްފަސޭހަ މާހައުލެއް ގާއިމް ކޮށްދިނުމަށް ކަމަށްވެސް މިނިސްޓަރު މުއިއްޒު ވިދާޅުވިއެވެ.
ސިއެރާ ކުންފުނީގެ އިޖްތިމާއީ ޒިންމާގެ ދަށުން 1.6 މިލިއަން ދިވެހި ރުފިޔާ ހަރަދުކޮށްގެން ހެދި މިޕާކުގެ ޑިޒައިނިންގެ މަސައްކަތްތައްވެސް ކޮށްފައިވަނީ އެ ކުންފުނިންނެވެ.
