ރާއްޖޭގައި މަތީ ތަޢުލީމް ފޯރުކޮށްދޭ މަރުކަޒުތަކުގެ ދަރިވަރުންނާއި ދަސްވެނިންނަށް އަމާޒުކޮށްގެން ބޭންކް އޮފް މޯލްޑިވްސް (ބީއެމްއެލް) އިން ހިންގި ގްރެޖުއޭޓް އިންޓަރންޝިޕް ޕްރޮގްރާމް ކާމިޔާބު ކަމާއެކު ނިންމާލައިފިއެވެ.
އަންގާރަ ދުވަހު ހެދުނު ބީއެމްއެލް މައި ބްރާންޗްގައި ބޭއްވި ހަފްލާއެއްގައި ވަނީ އިންޓަރންޝިޕް ފުރިހަމަ ކުރި ކުދިންނަށް ސެޓްފިކެޓާއި ވަޒީފާއަށް ކޮންޓުރެކްޓް ހަވާލުކޮށްފައެވެ. ސަތޭކަ ފަންސާސްއަށް ވުރެ ގިނަ ކުދިން އިންޓާޝިޕަށް ކުރިމަތި ލައިފާވާއިރު އޭގެ ތެރެއިން ހޮވިފައި ވަނީ ފަނަރަ ކުދިންނެވެ.
"މިއަށް (އިންޓާންޝިޕްއަށް) ފުރުސަތު ހުޅުވާލީމަ ސަތޭކަ ފަންސާސްއަށް ވުރެ ގިނަ ކުދިން މީގަ ބައިވެރިވި. އަޅުގަނޑުމެންނަށް އެޕްލިކޭޝަން ހުށަހެޅި. ދެން މި އެޕްލިކޭޝަންތަކަށް ބެލުމަށްފަހު އެންމެ ރަގަޅު ފަނަރަ ކުދިންނަށް އަޅުގަނޑުމެން ފުރުސަތު މިދިނީ"، ބީއެމްއެލްގެ މެނޭޖަރ އޮފް ޕަބްލިކް ރިލޭޝަންސް، މުހައްމަދު ސައީދު ވިދާޅުވިއެވެ.
އިންޓާންޝިޕް ނިންމި ކުދިންނަށް ބީއެމްއެލްއިން ވަނީ ވަޒީފާދީ، އެއް އަހަރު ދުވަހުގެ ވަޒީފާ ކޮންޓުރަކްޓެއް ކޮންމެ ކުއްޖަކަށްވެސް ހަވާލްކޮށްފައެވެ. އެ ކުދިން ވަޒީފާާއަށް ނިކުތަސް އަދިވެސް ތިބޭނީ ދަސްކުރާ މުވައްޒަފުންގެ ގޮތުގައެވެ. އެހެންކަމުން ބޭންކުގެ އެކިއެކި ޑިޕާރޓްމަންޓްތަކުގައާއި ބީއެމްއެލްގެ އަތޮޅުތެރޭގެ ބްރާންޗް ތަކުގައި މަސައްކަތް ކުރުމުގެ ފުރުސަތުގެ ލިބިގެންދާނެއެވެ. އެގޮތުން މަސައްކަތަށް ބޭނުންވާ ގިނަ މައުލޫމާތު ލިބި، އެ މުއައްޒަފުންގެ ހުނަރުވެރިކަން އިތުރުވެގެންދާނެއެވެ.
"ދެން މިކުދިން ބޭންކުގަ އެއް އަހަރު ދުވަސް ވަންދެން ހަމަ އިންްޓާންޝިޕް ޕްރޮގްރާމް ފުރިހަމަ ކުރާނެ. ދެން ޕްރޮގްރާމް ކުރިއައްދާއިރު އެކުދިންނަށް މާލޭގެ ބްރާންޗްތަކާއި އަތޮޅުތެރޭގައި ގާއިމް ކުރެވިފަ ހުރި ބޭންކުތަކުގެ ބްރާންޗްތަކާއި ބޭންކުގެ ޑިޕާޓްމަންޓް ތަކުގައިވެސް މަސައްކަތް ކުރުމުގެ ފުރުސަތު ލިބިގެންދާނެ"