އިދިކޮޅު މައި ޕާޓީ އެމްޑީޕީގެ ރިޔާސީ ކެންޑިޑޭޓަކު ހޮވުމަށް ބާއްވާ ރިޔާސީ ޕްރައިމަރީގައި ވާދަކުރުމުގެ ފުރުސަތު އެޕާޓީއިން ހުޅުވާލައިފިއެވެ.
އެމްޑީޕީއިން އަންގާރަ ދުވަހު ކޮށްފައިވާ އިއުލާނެއްގައި ވަނީ ޕްރައިމަރީގައި ވާދަކުރައްވަން އެދޭ އެޕާޓީގެ މެމްބަރުން، ކުރިމަތިލުމަށް އެދޭ ފޯމު ފުރިހަމަކޮށް، ފޯމާއިއެކު ހުށަހަޅަން ޖެހޭ ހުރިހާ ލިޔުމަކާއިއެކު އެޕާޓީގެ އޮފީހަށް ނުވަތަ އިންތިޚާބާއި ބެހޭ ކޮމިޓީއަށް އީމެއިން ކުރަން އެދޭ ކަމަށެވެ.
ޕްރައިމަރީގައި ވާދަކުރަން ކުރިމަތިލުމުގެ ސުންގަޑިއަކީ 19 މެއި ވާ ހޮނިހިރު ދުވަހުގެ 12:00އެވެ. އަންގާރަ ދުވަހު އެމްޑީޕީ އޮފީހުގައި އޮތް ނޫސްވެރިންގެ ބައްދަލުވުމެއްގައި ވާދަކުރުމަށް ބޭނުންވާ ފަރާތްތަކުން އަމަލުކުރަންވީ އުސޫލުތަކާ ވޯޓުފޮށިތައް ބަހައްޓާ ތަންތަނުގެ މައުލޫމާތު އާންމު ކޮށްފައިވެއެވެ.
އެމްޑީޕީގެ ޤައުމީ މަޖިލީހުން ވަނީ މިމަހުގެ 30ވަނަ ދުވަހު ޕްރައިމަރީ ބޭއްވުމަށް ނިންމާފައެވެ. އަދި އެއާއި ގުޅިގެން ރާއްޖޭގެ މީހުން ދިރިއުޅޭ ހުރިހާ ރަށެއްގެ އިތުރުން ދިވެހިން ރާއްޖެއިން ބޭރުގައި ދިރިއުޅޭ ބައެއް ސިޓީތައް ކަމަށްވާ ސްރީލަންކާގެ ކޮޅުނބު އަދި ކެންޑީ، އިންޑިއާގެ ޓްރިވެންޑްރަމް އަދި ބެންގަލޫރު، މެލޭޝިއާގެ ކުއާލަލަމްޕޫރު އަދި މީގެ އިތުރުން އިނގިރޭސިވިލާތުގެ ލަންޑަންގައި ޕްރައިމަރީގެ ވޯޓު ފޮށި ބެހެއްޓުމަށް ވަނީ ނިންމާފައެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރާނެކަން އިއުލާން ކުރައްވާފައި ވަނީ ހަމައެކަނި ކުރީގެ ރައީސް މުހައްމަދު ނަޝީދެވެ. އެމަނިކުފާނު ގެންދަވަނީ މިހާރުވެސް ޕްރައިމަރީގެ ޙަރަކާތްތައް ކޮޅުނބުގައި ހުންނަވައިގެން ކުރިއަށްގެންދަވަމުންނެވެ.