ހިލައާއި ހިލަވެލި ބަރުކޮށްގެން ދަތުރުކުރި ދޯންޏެއް ބަންޑުން ޖަހާލައިފި
13 މެއި 2018 | އާދީއްތަ 17:00އެއްވެސް މީހަކަށް އަނިޔާއެއް ނުވޭ.
ބަންޑުން ޖަހާލި ދޯނި ބަންޑުން ޖަހާލުމުގެ ކުރިން
ހިލަޔާއި ހިލަވެލި ބަރުކޮށްގެން ދަތުރުކުރަމުންދިޔަ ދޯންޏެއް ބަންޑުން ޖަހާލައިފިއެވެ.
މިހާދިސާގައި އެއްވެސް މީހަކަށް ގެއްލުމެއް ނުވެއެވެ.
އެދޯނި ބަންޑުން ޖަހާލުމުން މީހުން ސަލާމަތް ކުރުމަށް ހަރަކާތްތެރިވި ތޮއްޑޫ ރަމްޒު ދޯނީގެ މީހަކު ބުނީ އޭގައިތިބީ 4 ބިދޭސީންނާއި ދިވެއްސެއް ކަމަށެވެ. އަދި އެމީހުން ނަގައިގެން މިހާރު ތޮއްޑޫއަށް ގެންގޮސްފައިވާ ކަމަށެވެ.
އޭނާ ބުނީ ދޯނި ބަންޑުން ޖަހާލީ މަޑުމަޑުން އެއްފަރާތަށް އަރިވަމުންއަރިވަމުން ގޮސްކަމަށާއި މިހާރު ދޯނި އޮތީ އެއްކޮށް ބަންޑުން ޖަހާލާފައި ކަމަށެވެ.
އޭނާ ބުނީ މިރޭ އިރުއޮއްސުނުއިރު ހިނގި މިހާދިސާ ހިނގާފައިވަނީ ތޮއްޑޫއާ 5 މޭލު ބޭރުން ކަމަށެވެ. އަދި އެއީ އއ ހިމަންދޫ ދޯންޏެއް ކަމަށާއި ދޯނި ދަތުރު ކުރަމުން ދިޔައީ ބ އަތޮޅު ސޮނޭވާފުއްޓަށް ކަމަށެވެ.
ރާއްޖެ އެމްވީއަށް މައުލޫމާތުދިން އެމީހާ ބުނީ އެސަރަހައްދު ކަނޑު ގަދަ ކަމަށާއި ބަންޑުން ޖަހާލި ވަގުތު އިތުރަށް ގަދަވެގެން ދިޔަ ކަމަށެވެ.
އޭނާ ބުނީ މިހާރު ފުލުހުންވެސް އެދޯނި ކައިރީގައި ހަރަކާތްތެރިވަމުންދާ ކަމަށެވެ.
އެމްއެންޑީއެފުން ބުނީ އއ.ތޮއްޑޫގެ އުތުރުން 3 މޭލު ބޭރުން "މަސް ނަނު" ނަމަކަށް ކިޔާ މުދާ އުފުލާ ދޯންޏެއް ބަންޑުން ޖަހާލައި، އޭގައި ހުރި މުދާތައް އޮޔާދާތީ އެސަރަހައްދުން ދަތުރުކުރައްވާ ދަތުރުވެރިން މިކަމަށް ސަމާލުވުމަށް އިލްތިމާސްކުރާ ކަމަށެވެ.
އެމްއެންޑީއެފުން ބުނީ މާލެއިން ފުރައިގެން ބ.ސޮނެވާފުއްޓަށް މުދާ ބަރުކޮށްގެން ދަތުރުކުރަމުންދިޔަ 95 ފޫޓްގެ މި ދޯންޏަށް ދިޔަވަމުންދާ ކަމުގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ މިރޭ 19:12 ހާއިރުއެވެ. ހާދިސާގެ މަޢުލޫމާތު ލިބުމާ ގުޅިގެން އެ ސަރަޙައްދަށް ދަތުރުކުރަމުން ދިޔަ ސީއެމްބިޔުލަންސަށް ދޯނީގައި ތިބި 5 މީހުން ވަނީ ނަގާފައިވާ ކަމަށާއި މި އެންމެންގެ ހާލު ވެސް ރަނގަޅު ކަމަށެވެ.
