ގާސިމް ބޭނުންފުޅުވަނީ ޖޭއެސްސީގެ މެމްބަރުންގެ އަދަދު މަދުކުރަން، ސުއޫދު ވިދާޅުވީ ގޯހެއް ކަމަށް!
11 މެއި 2018 | ހުކުރު 09:57ގާސިމް ހުށަހަޅުއްވަނީ 10 އިން 7 އަށް މަދުކުރަން
ގާސިމް އިބްރާހިމް: ޖުޑީޝަލް ރިފޯމް އެޖެންޑާގެ ފުރަތަމަ ދައުވު އިއުލާން ކުރެއްވި
ޖުޑީޝަލް ސާވިސް ކޮމިޝަން (ޖޭއެސްސީ)ގެ މެމްބަރުންގެ އަދަދު، މަދު ކުރަން ހުށަހަޅުއްވާނެ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވުމުން، އެއީ ގޯސް ވިސްނުންފުޅެއް ކަމަށް ކުރީގެ ބަންޑާރަ ނައިބު ހުސްނުއްސޫއޫދު ވިދާޅުވެއްޖެވެ.
ގާސިމް އިބްރާހިމް ކުރެއްވި ޓްވީޓެއްގައި ވިދާޅުވީ ސިޔާސީ ނުފޫޒުން ޖުޑީޝަރީ މިނިވަން ކުރެވޭނީ ޖޭއެސްސީ އެކުލެވިގެންވާ ގޮތް ބަދަލުކޮށްގެން ކަމަށެވެ. އެގޮތުން ގާނޫނުއަސާސީގެ 159 ވަނަ މާއްދާ އިސްލާހު ކުރުމަކީ އެމަނިކުފާނުގެ ޖުޑީޝަލް ރިފޯމް އެޖެންޑާގެ އެންމެ އިސް މަސައްކަތް ކަމަށެވެ.
ގާނޫނުއަސާސީގެ 159 ވަނަ މާއްދާގައި ބުނެފައިވާ ގޮތުން ޖޭއެސްސީ އެކުލެވިގެން ވަނީ 10 މެމްބަރުންގެ މައްޗަށެވެ. އެ ކޮމިޝަނުން އެކުލެވިގެން ވަނީ ރައްޔިތުންގެ މަޖިލީހުގެ ރައީސާއި ސުޕްރީމް ކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބުކުރާ ފަނޑިޔާރަކާއި ހައި ކޯޓުގައި ހިމެނޭ ފަނޑިޔާރުންގެ ތެރެއިން، އެ ކޯޓުން އިންތިހާބު ކުރާ ފަނޑިޔާރާއި ދަށު ކޯޓުތަކުގެ ފަނޑިޔާރުންގެ ތެރެއިން އެ ކޯޓުތަކުން އިންތިހާބުކުރާ ފަނޑިޔާރަކާއި ރައްޔިތުންގެ މަޖިލީހުގެ މެމްބަރުންގެ ތެރެއިން އެ މަޖިލީހުން ކަނޑައަޅާ މެމްބަރެއްގެ މައްޗަށެވެ. އޭގެ އިތުރުން އާންމުންގެ ތެރެއިން ރައްޔިތުންގެ މަޖިލީހުން ކަނޑައަޅާ މީހަކާއި ސިވިލް ސާވިސް ކޮމިޝަން (ސީއެސްސީ)ގެ ރައީސާއި ރައީސުލްޖުމްހޫރިއްޔާ އައްޔަން ކުރާ މެމްބަރަކާއި ބަންޑާރަ ނައިބުގެ އިތުރުން ވަކީލުންގެ ތެރެއިން އެބައި މީހުން އިންތިހާބު ކުރާ ގާނޫނީ ވަކީލަކާއެކު ވެސް ޖޭއެސްސީގައި ހިމެނެއެވެ.
ގާސިމް ވިދާޅުވީ ސިޔާސީ ނުފޫޒުން ޖޭއެސްސީ މިނިވަން ކުރުމަށް އެ ކޮމިޝަންގެ މެމްބަރުންގެ އަދަދު 10 އިން ހަތަކަށް ދަށް ކުރުމަށް ގާނޫނުއަސާސީ އިސްލާހު ކުރަން ހުށަހަޅުއްވާނެ ކަމަށެވެ. އެގޮތުން މަޖިލީހަށް އެ ކޮމިޝަނުން ކަނޑައަޅާއި މެމްބަރާއި ސީއެސްސީގެ ރައީސާއި ރައީސުލްޖުމްހޫރިއްޔާ އައްޔަން ކުރައްވާ މެމްބަރު އެ ކޮމިޝަނުން ވަކިކުރަން ހުށަހަޅުއްވާނެ ކަމަށް ގާސިމް ވިދާޅުވިއެވެ.
ގާސިމް އެގޮތަށް ވިދާޅުވުމާ ގުޅިގެން ކުރީގެ ބަންޑާރަ ނައިބު އަދި ގާނޫނުއަސާސީ އިސްލާހު ކުރެއްވި ރައްޔިތުންގެ ހާއްސަ މަޖިލީހުގައި ހިމެނިވަޑައިގެންނެވި މެމްބަރު ހުސްނުއްސުއޫދު ވިދާޅުވީ ޖޭއެސްސީ އިސްލާހު ކުރަން ގާސިމް ގެންގުޅުއްވާ ހިޔާލުފުޅަކީ ގޯސް ވިސްނުންފުޅެއް ކަމަށެވެ.
ސުއޫދު ވިދާޅުވީ ޖޭއެސްސީގެ މެމްބަރުންގެ އަދަދު މަދުކުރެއްވުމަށް ގާސިމް ހުށަހެޅުއްވަން އުޅުއްވަނީ ވޭތުވެދިޔަ މުއްދަތުގައި ޖޭއެސްސީގައި ހިނގައިދިޔަ ކަންތައްތަކަށް އެމަނިކުފާނަށް އެނގިވަޑައި ނުގަންނަވާތީ ކަމަށް ވެދޭނެ ކަމަށެވެ.
އެކަމާ ގުޅޭ ގޮތުން ދެ ވަނަ ވިސްނުމަކަށް ވަޑައިގެންނެވުމަށް ސުއޫދު ވަނީ ގާސިމަށް ގޮވާލައްވާފައެވެ.
