އަންގާރަ 18 ޖޫން 2019
02 އަދަ
1440 ޝައްވާލް 14
ފަތިސް 04:36
އިރުއަރާ 05:54
މެންދުރު 12:11
އަސްރު 15:35
މަޣްރިބް 18:20
އިޝާ 19:38
ކުޅިވަރު - ފްރެންޗް ކަޕް

ޖެހިޖެހިގެން ހަތަރު ވަނަ ފަހަރަށް ފްރެންޗް ކަޕް ޕީއެސްޖީއިން ކާމިޔާބުކޮށްފި

  • ފައިނަލް މެޗު ޕީއެސްޖީއިން ކާމިޔާބުކުރީ 2-0 ގެ ނަތީޖާއަކުން

އަހްމަދު ސާއިފް ޝިޔާދް
Saaif80

ކ. މާލެ 9 މެއި 2018 | ބުދަ 22:07 1,428

ޕީއެސްޖީ ޗެމްޕިއަންކަން ހޯދުމަށްފަހު އުފާ ފާޅުކުރަނީ - އެމްއެންޑީއެފް

ފްރެންޗް ކަޕްގެ ޗެމްޕިއަންކަން ޖެހިޖެހިގެން ހަތަރު ވަނަ ފަހަރަށް ވަރުގަދަ ޕީއެސްޖީއިން ކާމިޔާބުކޮށްފިއެވެ.

ޕީއެސްޖީއިން މި މުބާރާތުގެ ތަށި ހަތަރުވަނަ ފަހަރަށް ކާމިޔާބުކުރީ ތިންވަނަ ޑިވިޝަނުގެ ޓީމެއް ކަމަށް ލެސް ހަބިއާސްއާ ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށްގެންނެވެ. އަނިޔާގެ ސަބަބުން މި މެޗުގައި ދުނިޔޭގެ އެންމެ އަގުބޮޑު ކުޅުންތެރިޔާ ކަމަށްވާ ނޭމާއަށް ނުކުޅެވުނުއިރު ޕީއެސްޖީގެ ކޯޗު ވަނީ އެ ޓީމުގެ ފުރަތަމަ އެގާރައަށް ދެ ބަދަލެއް ގެނެސްފައެވެ. ހަމައެހެންމެ ލެސް ހަބިއާސްގެ ފުރަތަމަ އެގާރަށް އެ ޓީމުގެ ކޯޗު ދެ ބަދަލެއް ގެނެސްފައިވެއެވެ.

ފުރަތަމަ ހާފު ފެށިގެން ޕީއެސްޖީއިން ވަނީ ގިނަ ވަގުތު ބޯޅަ ހިފަހައްޓައިގެން ކުޅެ އިދިކޮޅު ޓީމުގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. އެގޮތުން މެޗުގެ ފަސްވަނަ މިނެޓުގައި ޖިއޮވާނީ ލޮ ކެލްސޯ ފޮނުވާލި ހަމަލާއެއް ހަބިއާސްގެ ގޯލުގެ ދަނޑީގައި ޖެހުނުއިރު އޭގެ ތިން މިނެޓު ފަހުން އެމްބާޕޭ ފޮނުވާލީ ހަމަލާއެއް ވެސް ވަނީ ގޯލުގެ ދަނޑީގައި ޖެހުމަށްފަހު ކުޅުމުގެ ތެރެއަށް އެނބުރި އައިސްފައެވެ. ޕީއެސްޖީގެ ފުރަތަމަ ލަނޑު މެޗުގެ 28 ވަނަ މިނެޓުގައި ޖަހައިދިނީ ލޮ ކެލްސޯއެވެ. މި ލަނޑަށްފަހު ވެސް ޕީއެސްޖީއަށް ވަނީ ލީޑު ފުޅާކުރުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ.

އެއް ލަނޑުގެ ލީޑެއްގައި އޮވެ ޕީއެސްޖީއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މެޗުގެ 50 ވަނަ މިނެޓުގައި އެމްބާޕޭ ލަނޑެއް ޖެހި ނަމަވެސް ވީޑިއޯ އެސިސްޓަންޓް ރެފްރީ މެދުވެރިކޮށް ރެފްރީ ނިންމާފައިވަނީ ލަނޑު ޖެހުމުގެ ކުރިން ޕީއެސްޖީގެ ކުޅުންތެރިޔެއްގެ އަތުގައި ބޯޅަ ޖެހިފައިވާ ކަމަށެވެ. ޕީއެސްޖީގެ ލީޑު ފުޅާވެގެންދިޔައީ މެޗުގެ 73 ވަނަ މިނެޓުގައި ލިބުނު ޕެނަލްޓީ ކަވާނީ ކާމިޔާބުކުރުމާއެކުއެވެ. މި މެޗުގައި ހަބިއާސްގެ ކުޅުންތެރިންނަށް ނުރައްކާތެރި ހަމަލާއެއް އުފެއްދިފައެއް ނުވެއެވެ.

މި މުބާރާތުގެ ޗެމްޕިއަންކަމާއެކު ޕީއެސްޖީއިން ވަނީ މި ސީޒަނުގައި ފްރާންސްގައި ކުޅުނު ހުރިހާ މުބާރާތެއްގެ ޗެމްޕިއަންކަން ހޯދާފައެވެ. މިއީ ތާރީހުގައި ވެސް ފުރަތަމަ ފަހަރަށް ޓީމަކުން ޖެހިޖެހިގެން ހަތަރު ފަހަރު ފްރެންޗް ކަޕްގެ ޗެމްޕިއަންކަން ހޯދި ފުރަތަމަ ފަހަރެވެ.  

އެންމެ ފަހުން އަޕްޑޭޓް ކުރީ: 1 މަސްކުރި | ރިވިއު ކުރީ: އަބުދުﷲ ނަސީރު އިބްރާހިމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 9110099 ނަންބަރަށް ގުޅުއްވާ.

ކޮމެންޓް