ފަނޑިޔާރުންގެ އެންމެ ގަދަ ކަމަކަށްވާނީ ރައްޔިތުންގެ އިތުބާރު ލިބުން: އިންތި
ގާނޫނު އަސާސީއާ އެއްގޮތަށް ކަންކަން ކުރަން ޖެހޭ
މާފަންނު އުތުރު ދާއިރާގެ މެމްބަރު އިމްތިޔާޒް ފަހްމީ (އިންތި)
ފަނޑިޔާރުގެއެއްގެ ނުވަތަ ފަނޑިޔާރުންގެ އެންމެ ގަދަ ކަމަކަށްވާނީ ރައްޔިތުންގެ އިތުބާރު ލިބުން ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ރާއްޖެޓީވީގެ 'ބޮޑުސުވާލު' ޕްރޮގްރާމްގައި ވާހަކަ ދައްކަވަމުން އިންތި ވަނީ މިއަދު ރާއްޖޭގެ ހާލަތަކީ މާފިއާ ނެޓްވޯކެއްގެ ގޮތުގައި ސިފަކުރައްވާފައެވެ. އިންތި ވިދާޅުވީ، ހުރިހާ ބޭފުޅުންވެސް ޤާނޫނު އަސާސީ އާއި ޤާނޫނީ ހަމަތަކުގެ މަތިން ކަންކަން ކުރައްވާނަމަ އެއްވެސް ފަރާތެއް ދެކެ ބިރު ގަންނަން ނުޖެހޭނެ ކަމަށެވެ. އެގޮތަށް ކަން ކުރައްވާނަމަ އެބޭފުޅުންގެ މަގާމުތައްވެސް ދިފާއު ކުރެއްވޭނެ ކަމަށާއި ރައްޔިތުންގެ އިތުބާރުވެސް ލިބޭނެ ކަމަށް އިންތި ވިދާޅުވިއެވެ. ހަމައެހެންމެ ފަނޑިޔާރުންގެ އެންމެ ގަދަ ކަމަކަށްވާނީ ރައްޔިތުންގެ އިތުބާރު ލިބުން ކަމަށްވެސް އިންތި ވިދާޅުވިއެވެ.
"ފަނޑިޔާރު ގެއެއްގެ އަދި ފަނޑިޔާރެއްގެ ގަދަކަމަކީ، ވަރުގަދަ ކަމަކީ، މޮޅު ކަމަކީ، އިތުބާރު ހޯދުން ރައްޔިތުންގެ. އެކަން ކުރެއްވުމަށް ތިބޭފުޅުން އެއް ބޭފުޅެއްގެ މައްޗަށް ޗެމްޕިއަންކަން ވެވަޑައިގަންނަވާށޭ" އިންތި ވިދާޅުވިއެވެ.
ހަމައެހެންމެ އިންތި ވިދާޅުވީ ޝަރީއަތްތައް އަސްލު ހިންގަން ޖެހޭނީ އާންމުކޮށް ހުޅުވާލައިގެން ކަމަށާއި ޝަރީއަތް ސިއްރު ކުރެވޭނީ ވަރަށް ހާއްސަ ހާލަތެއްގައި ކަމަށެވެ. ސިއްރިއްޔާތުގައި މިހާރު ދެމުންދާ ބަޔާންތަކަކީ ހާމަކަންމަތީ ދޭންޖެހޭ ބާޔާންތަކެއް ކަމަށާއި މި ބަޔާންތައް ސިއްރުކުރަން ޖެހޭ އެއްވެސް ސަބަބެއް ނެތްކަމަށް އިންތި ވިދާޅުވިއެވެ.
"ސިއްރިއްޔާތުގައި މިދޭ ކަމަކީ (ބަޔާން ދޭ ކަމަކީ) ކޮންމެވެސް މީހަކަށް ލަނޑެއް ދިނުމުގެ ކަންތައްތައް ކުރަންވީމަ. ކޮންމެވެސް ނުބައި ނިޔަތެއްގައި ކޮންމެވެސް ނުބައި ކަމެއް ކުރަން" އިންތި ވިދާޅުވިއެވެ.
އިންތި މި ފަދައިން ވާހަކަ ދައްކަވާފައިވާއިރު އެކެއް ފެބްރުއަރީގެ އަމުރާއި ގުޅިގެން ހައްޔަރުކޮށްފައިވާ ބައެއް ފަރާތްތަކާއި ގުޅިގެން ސިއްރު ހެކިވެރިން ދީފައިވާ ބަޔާންތަކެއް ދާދިފަހުން ވަނީ ލީކުވެފައެވެ.
