އާޒިމާއަށް ދިޔާނާގެ ހޫނު ރައްދެއް
8 މެއި 2018 | އަންގާރަ 02:31އާޒިމާ ވިދާޅުވީ ރައީސް ނަޝީދުގެ މައްސަލަ ސުޕްރީމް ކޯޓަށް އަލުން ނުބެލޭނެކަމަށް
ކުރީގެ ބަންްޑާރަ ނައިބް ދިޔާނާ ސައީދު، ގުޅިފައިވާ ސިޔާސީ ޕާޓީތަކުން ބޭއްވި އެއްވުމުގައި ވާހަކަ ދައްކަވަނީ | އަވަސް
ކުރީގެ ރައީސް މުޙައްމަދު ނަޝީދުގެ މައްޗަށް އިއްވާފައިވާ 13 އަހަރު ދުވަހުގެ ޖަލު ޙުކުމް ސުޕްރީމް ކޯޓަށް ވެސް ބާޠިލްނުކުރެވޭނެ ކަމަށް ވިދާޅުވެ ރައީސް އޮފީހުގެ ލީގަލް އެފެއާޒް މިނިސްޓަރު އާއިޝަތު އާޒިމާ ޝުކޫރު ދެއްކެވި ވާހަކަތަކަށް ކުރީގެ ބަންޑާރަ ނައިބު ދިޔާނާ ސައީދު ހޫނު ރައްދެއް ދެއްވައިފި އެވެ.
ސަރުކާރުގެ ޕްރޮޕެގެންޑާ ފެތުރުމަށް ބޭނުންކުރާ ދައުލަތުުގެ މީޑިއާގައި ވާހަކަދައްކަވަމުން، އިތުބާރު ނެތްކަމަށް ރައްޔިތުންގެ މަޖިލީހުންް ފާސްކޮށް، ބަންޑާރަ ނައިބުކަމުން ދުރުކުރި އާއިޝަތު އާޒިމާ ޝުކޫރު ވިދާޅުވީ ރާއްޖޭގައި ސުޕްރީމް ކޯޓުން ކުރާ ނިހާއީ ޙުކުމެއް އަލުން ބަދަލުކުރުމުގެ ބާރު ޤާނޫނީ ގޮތުން ސުޕްރީމް ކޯޓަށް ވެސް ލިބިދީފައި ނެތްކަމަށެވެ. އެހެންކަމުން ރައީސް ނަޝީދުގެ މައްޗަށް އިއްވާފައިވާ ޖަލު ހުކުމް ސުޕްރީމް ކޯޓަށްވެސް ބާތިލްނުކުރެވޭނެކަމަށް އާޒިމާ ވިދާޅުވިި އެވެ.
"އަދި ރާއްޖޭގެ ޤާނޫނީ އޮނިގަނޑުގަ ސުޕްރީމް ކޯޓުގެ ޙުކުމެއް އަލުން އަޑުއަހާފައި އަލުން ބަދަލުކުރެވޭނެ އެއްވެސްކަހަލަ ޤާނޫނީ ފުރުސަތެއް ނެތޭ، ރާއްޖޭގެ ޤާނޫނީ އޮނިގަނޑަކުއެއް. ދުނިޔޭގެ ބައެއް ތަންތާ މިސާލަކަށް، މިސްކަރޭޖް އޮފް ޖަސްޓިސް ހުރި ކަމަށްވަންޏާ ސުޕްރީމް ކޯޓުން ނިމުނަސް އެވަރުގެ ކަމެއް ފެނިއްޖެއްޔާ ފަހުން އެފުރުސަތުތައް އޮންނަ ޤާނޫނީ އޮނިގަނޑުތައް ހުރޭ. އެހެން ނަމަވެސް ރާއްޖޭގެ ޤާނޫނީ އޮނިގަނޑުގައި އެއީ ހަމަ ސީލްޑް، ނިމިފައި އޮތް ނިންމުމެކޭ ސުޕްރީމް ކޯޓުން ކޮށްފައި އޮތް ޙުކުމެއް. އެހެންވީމަ ފަހުންކުރާ އަމުރަކުންނެއް އެއެއް ޗޭންޖެއް ނުކުރެވޭނެ. އެއަށް ބަދަލުގެނައުމުގެ ބާރު ސުޕްރީމްކޯޓަކަށްވެސް ނުލިބޭ." އާޒިމާ ވިދާޅުވި އެވެ.
އާޒިމާގެ އެ ވާހަކަތަކަށް ރައްދުދެއްވައި، ބަންޑާރަ ނައިބުކަން ކުރައްވާފައިވާ އަދި ސާކްގެ ސެކްރެޓަރީ ޖެނެރަލްގެ މަގާމު އަދާކުރައްވާފައިވާ މަޝްހޫރު ގާނޫނީ ވަކީލު ދިޔާނާ ސައީދު ވިދާޅުވީ އައިސީސީޕީއާރުގެ 14 ވަނަ މާއްދަގެ 6 ވަނަ ނަމްބަރުގެ ދަށުން މިސްކަރޭޖް އޮފް ޖަސްޓިސް ނުވަތަ އިންސާފުގެ ހަމަތަކާއި އުސޫލުގެ ބޭރުުންކޮށްފައިވާ ހުކުމެއްކަމަށްވެއްޖެނަމަ، އެ މީހަކަށް ޤާނޫނީ އިމުގެ ތެރެއިން ބަދަލު ދިނުމަށް ދައުލަތުގެ މައްޗަށް ލާޒިމްކުރާކަމަށެވެ. އަދި ސުޕްރީމް ކޯޓުން ނިންމާ ނިންމުން އަލުން ރިވިއުކުރުމުގެ ބާރު އެ ކޯޓަށް ލިބިގެން ނުވާނަމަ، އައިސީސީޕީއާރުގެ 14 ވަނަ މާއްދަގެ 6 ވަނަ ނަމްބަރުގައި އެހެން އޮތުމުގެ ބޭނުމެއް ނެތްކަމަށް ދިޔާނާ ފާހަގަކުރެއްވެވި އެވެ.
ދިޔާނާ ވިދާޅުވީ ރައީސް މުހައްމަދު ނަޝީދުގެ މައްސަލައަކީ އިންސާފުގެ ހަމަތަކާއި އުސޫލުގެ ބޭރުންކޮށްފައިވާ ހުކުމެއްކަމަށާއި، އެ މައްސަލަ އަލުން ސުޕްރީމް ކޯޓަށް ބެލޭނެ ކަމަށެވެ. އެ މައްސަލަ ސުޕްރީމް ކޯޓުން ބަލައި ގޮތެއް ނިންމާފައިވާކަމަށްވެސް ދިޔާނާ ވިދާޅުވި އެވެ.
ދިޔާނާ ފަހާގަކުރައްވާފައިއެވަނީ ފެބުރުއަރީ މަހުގެ އެއްވަން ދުވަހު ސުޕްރީމް ކޯޓުން ނެރުނު އަމުރުުގައި ރައީސް މުހައްމަދު ނަޝީދުގެ މައްޗަށް ޝަރީއަތް ހިންގާފައިވަނީ އިންސާފުގެ ހަމަތަކާއި އުސޫލުގެ ބޭރުންކަމަށް ކަނޑައަޅައި، އެމަނިކުފާނުގެ މައްޗަށް އިއްވާފައިވާ 13 އަހަރު ދުވަހުގެ ޖަލު ހުކުމް ބާތިލްކުރުމަށް އަމުރުކުރި ބަޔަށެވެ.
ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލާގައި ނަޝީދަށް ޓެރަރިޒަމްގެ ހުކުމެއް އިއްވީ އެމަނިކުފާނުގެ މައްޗަށް ކުރިން ކުރި ގާނޫނާ ޚިލާފަށް މީހަކު ހިފައި ހައްޔަރުކުރުމުގެ ދައުވާ އަނބުރާ ގެންދިއުމަށް ފަހު އެވެ.
އޭގެއިތުރުން ސުޕްރީމް ކޯޓުން 1 ފެބުރުއަރީގައި ރައީސް މުހައްމަދު ނަޝީދުގެ މައްޗަށް އިއްވި 13 އަހަރު ދުވަހުގެ ޖަލު ހުކުމް ބާތިލްކުރިއިރު، ކުރީގެ ނައިބް ރައީސް އަހުމަދު އަދީބް ވަނީ ރައީސް ނަޝީދުގެ މައްޗަށް ޖަލު ހުކުމް އިއްވީ، ފަނޑިޔާރު ލިޔުއްވި ހުކުމެއްގެ މައްޗަށް ބިނާކޮށް ނޫންކަމަށް ވިދާޅުވެ ސިޓީއެއްވެސް ފޮނުވާފަ އެވެ.
ރައީސް ނަޝީދު މިނިވަންކުރަން ކޯޓުން ކުރާ އަމަރަށް ތަބާވާނެ ކަމަށް ރައީސް ޔާމީން ވިދާޅުވި ނަމަވެސް، ފެބްރުއަރީ 1 ވަނަ ދުވަހު ކުރި އަމުރަށް ގޮންޖައްސަވައި، އެ މަނިކުފާނު ވަނީ ކުއްލި ނުރައްކަލު ހާލަތު އިއުލާނުކޮށް، އަސްކަރިއްޔާ ބޭނުންކޮށްގެން ކޯޓްތަކާއި ރައްޔިތުންގެ މަޖިލިސް ހިސޯރުކުރުމަށް ފަހު، އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު އަދި ކުރީގެ ރައީސް މައުމޫން އަބްދުލް ގައްޔޫމުގެ އިތުރުން ރައްޔިތުންގެ މަޖިލީހުގެ ބައެއް މެމްބަރުންނާއި ވިޔަފާރިވެރިން ވެސް ހައްޔަރުކޮށްފަ އެވެ.
