ސްޕެނިޝް ލަލީގާގައި ރެފްރީންގެ ފަރާތުން ގިނަ ގޯސްތަކެއް ފެނިގެންދިޔަ ވަރުގަދަ ބާސެލޯނާ އަދި ރެއާލް މެޑްރިޑް ކުޅުނު މެޗު އެއްވަރުވެގެން ނިމިއްޖެއެވެ.

ބާސާގެ ދަނޑު ކަމަށްވާ ކޭމްޕް ނޫގައި ކުޅުނު މެޗު ނިމިފައިވަނީ 2-2 ގެ ނަތީޖާއަކުން އެއްވަރުވެގެންނެވެ. މިއީ މި ދެ ޓީމުގެ މެދުގައި އެކި މުބާރާތްތަކުގައި ކުޅެވުނު 238 ވަނަ މެޗެވެ. މި މެޗުގައި ރެއާލްގެ ޓީމުން ބޮޑު ބަދަލުތަކެއް ފެނިގެންދިޔައިރު އިސްކޯ އަދި ކަވަހާލްއަށް އަނިޔާގެ ސަބަބުން ކުޅެވިފައެއް ނުވެއެވެ. މި ކުޅުންތެރިންގެ ބަދަލުގައި ރެއާލްގެ ފުރަތަމަ އެގާރައިން ގެރެތު ބޭލް އަދި ކަސިމޭރޯގެ އިތުރުން ނާޗޯ ފަނާންޑޭޒްއަށް ޖާގަ ލިބުނުއިރު ބާސާފެ ފުރަތަމަ އެގާރައިން ވެސް ދެ ބަދަލެއް ވަނީ ފެނިގެންގޮސްފައެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ފޯރިގަދަ ކުޅުމެއް ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. މެޗުގެ ފުރަތަމަ ލަނޑު ޖަހާ ލީޑު ނެގީ ބާސާއިންނެވެ. ފުރިހަމަ ކައުންޓާ އެޓޭކެއްގައި ސާޖީ ރޮބާޓޯ ނަގައިދިން ހުރަހަކުން ބާސާއަށް މެޗުގެ 10 ވަނަ މިނެޓުގައި ލީޑު ނަގައިދިނީ ލުއިސް ސުއަރޭޒްއެވެ. މި ލަނޑަށްފަހު ރެއާލްއިން މެޗުގެ ކޮންޓްރޯލް ނެގިއިރު އެ ޓީމުން ވަނީ އޭގެ ފަސް މިނެޓު ފަހުން ލަނޑެއް ޖަހާ ނަތީޖާ ހަމަހަމަކޮށްފައެވެ. މި ލަނޑު ބެންޒޭމާ ތަނަވަސްކޮށްދިން ފުރުސަތަކުން ރެއާލްއަށް ޖަހައިދިނީ ރޮނާލްޑޯއެވެ.

މި ލަނޑަށްފަހު ދެ ޓީމުގެ ފަރާތުން ވެސް ގިނަ ފައުލްތަކެއް ފެނިގެންދިޔައިރު ކުޅުންތެރިންގެ މެދުގައި ވަނީ ހަމަނުޖެހުންތަކެއް ވެސް ހިނގާފައެވެ. ގިނަ ރީނދޫ ކާޑުތަކެއް މެޗުގައި ފެނިގެންދިޔައިރު ފުރަތަމަ ހާފުގެ އިތުރު ވަގުތުގެ ތެރޭގައި ބާސާގެ ރޮބާޓޯއަށް ވަނީ ރަތް ކާޑު ދައްކާ ދަނޑުން ފޮނުވާލާފައެވެ. އޭނާއަށް ރަތް ކާޑު ދެއްކީ ރެއާލްގެ މާސެލޯގެ މޫނުމަތީގައި ޖެހުމުންނެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ދެ ޓީމުގެ ފަރާތުން ވެސް ވަނީ ރަނގަޅު ކުޅުމެއް ފެނިގެންގޮސްފައެވެ. 10 ކުޅުންތެރިންނާއެކު ކުޅުނު ނަމަވެސް ބާސާއިން ވަނީ ފުލުފުލުގައި ރެއާލްގެ ގޯލަށް ނުރައްކާކޮށްފައެވެ. އެގޮތުން މެޗުގެ 52 ވަނަ މިނެޓުގައި ސުއަރޭޒްގެ އެހީތެރިކަމާއެކު މެސީ ވަނީ އަލުން އަނބުރާ ބާސާއަށް ލީޑު ނަގައިދީފައެވެ. ރިޕްލޭތަކުން ފެންނަ ގޮތުގައި ސުއަރޭޒް މެސީއަށް ބޯޅަ ދިނީ ރެއާލްގެ ޑިފެންޑަރަށް ފައުލް ކުރުމަށްފަހުއެވެ.

ރެއާލްގެ ކީޕަރު ނަވާސްގެ ފަރާތުން މެޗުގައި ގިނަ ސޭވްތަކެއް ފެނިގެންދިޔައިރު ރެއާލްއަށް ނަތީޖާ ހަމަހަމަވެގެންދިޔައީ މެޗުގެ 72 ވަނަ މިނެޓުގައި ގެރެތު ބޭލް ޖަހައިދިން ލަނޑާއެކުއެވެ. މި ލަނޑު އޭނާ ޖަހައިދިނީ އަސެންސިއޯ ދިން ޕާހަކުން އޭރިއާ ބޭރުންނެވެ. މި މެޗުގައި ނުވަ ކުޅުންތެރިޔަކަށް ރެފްރީ ރީނދޫ ކާޑު ދައްކެއިރު މެޗުގެ ކޮންޓްރޯލް ރެފްރީއަށް ގެއްލުނު މަންޒަރު ވެސް ފެނިގެންދިޔައެވެ.

މި ކްލެސިކޯ ވެގެންގޮސްފައިވަނީ ބާސާގެ ކެޕްޓަން އަންދްރޭސް އިނިއެސްޓާގެ އެންމެ ފަހު ކްލެސިކޯއަށެވެ. މި މެޗުގައި ޖެހި ލަނޑާއެކު ރޮނާލްޑޯއަކީ 18 ލަނޑާއެކު ކްލެސިކޯގެ ތާރީހުގައި ވެސް އަލްފްރެޑޯ ޑިސްޓެފާނޯއާއެކު ރެއާލްއަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ. ހަމައެހެންމެ ރެއާލް ވެގެންގޮސްފައިވަނީ ކްލެސިކޯގެ ތާރީހުގައި ވެސް 400 ލަނޑު ޖެހި ފުރަތަމަ ޓީމަށެވެ. މި މެޗާއެކު ބާސާއިން ވަނީ އެއްވެސް މެޗަކުން ބަލިނުވެ ސީޒަން ނިންމާލުމުގެ އުއްމީދު ދަމަހައްޓާފައެވެ.

ބާސާއިން ލަލީގާގެ ތަށި ޔަގީންކޮށްފައިވާއިރު އެ ޓީމު އޮތީ ކުޅުނު 35 މެޗުން ލިބުނު 87 ޕޮއިންޓާއެކު ތާވަލުގެ އެއްވަނައިގައެވެ. ދެވަނައިގައި 75 ޕޮއިންޓާއެކު އެޓްލެޓިކޯ މެޑްރިޑް އޮތްއިރު ތިންވަނައިގައި 72 ޕޮއިންޓާއެކު އޮތީ ރެއާލް މެޑްރިޑްއެވެ.