ޓެރަރިޒަމްގެ ދައުވާ ލިބޭ ޔުމްނާ މައުމޫންގެ ފިރިކަލުން މުހައްމަދު ނަދީމްގެ މައްސަލަ ފުރަތަމަ ބެއްލެވި ގާޒީ ބަދަލުވެފައިވާ ސަބަބު އޭނާއަށް އަންގާފައިނުވާތީ މައްސަލައިގެ ޝަރީއަތް ކުރިއަށް ނުގެންގޮސް ހުއްޓާލައްވައިފި އެވެ.

ނަދީމްގެ މައްޗަށް އުފުލާފައިވާ ޓެރަރިޒަމްގެ ދައުވާއާ ގުޅިގެން ޝަރީއަތް ނިމެންދެން ބަންދުގައި ބަހައްޓަން އަމުރު ކުރެއްވީ ކްރިމިނަލް ކޯޓުގެ ގާޒީ ހުސެއިން ޝަހީދެވެ. އެ ދުވަހުގެ ބޭއްވި އަޑުއެހުމުގައި ދައުލަތުން ވަނީ ނަދީމްގެ މައްޗަށް ކުރާ ދައުވާވެސް އިއްވާފަ އެވެ. އޭގެ ފަހުން މި މައްސަލައިގެ އިބްތިދާއީ އަޑުއެހުންތައް ފެށުނުއިރު މައްސަލަ ބައްލަވަމުން ގެންދަވަނީ ގާޒީ އަހްމަދު ހައިލަމެވެ.  

ހޯމަ ދުވަހު ބޭއްވި އިބްތިދާއީ ދެ ވަނަ އަޑުއެހުމުގައި ނަދީމް ވަކީލުންނާއިއެކު ކޯޓަށް ވަޑައިގެންނެވިއިރު ދައުލަތުގެ ވަކީލު ދައުވާ އިއްވަން ފެށުމާއެކު ނަދީމްގެ ދިފާއީ ވަކީލް މޫސާ ސިރާޖު ވަނީ އިޖްރާއީ ނުކުތާއެއް ނަންގަވާފަ އެވެ. އޭނާ ވިދާޅުވީ އެ މައްސަލަ އެންމެ ފުރަތަމަ ބައްލަވަމުން ގެންދެވި ގާޒީ މިހާރު ބަދަލުވެފައިވާއިރު އެސަބަބު ނަދީމަށް އަންގާފައިނުވާ ކަމަށެވެ. ނަމަވެސް ޖިނާއީ އިޖްރާއަތުގެ ގާނޫނުގައި މައްސަލަ ބައްލަވާ ގާޒީ ބަދަލުވެއްޖެ ނަމަ އެކަން މައްސަލައިގައި ހިމެނޭ ދެ ފަރާތައް ކޯޓުގެ އިސް ގަޒީ އަންގަންވަން ވާނެ ކަމަށް ބުނެފައިވާއިރު އެ އިޖްރާއަތު ފުރިހަމަ ކޮށްފައިނުވާކަމަށް ސިރާޖު ފާހަގަ ކުރެއްވި އެވެ.

އެހެން ކަމުން ގާޒީ ހައިލަމް ވަނީ މައްސަލަ ބައްލަވާ ގާޒީ ބަދަލުވެފައިވާ ސަބަބު އަންގާފައިނުވާތީ މި އަޑުއެހުން ކުރިއަށް ނުގެންދެވޭނެ ކަމަށް ވިދާޅުވެ އަޑުއެހުން ނިންމަވާލައްވާފަ އެވެ. ހޯމަ ދުވަހުގެ ހެނދުނު 9.00 ގައި ބާއްވަން ހަމަ ޖައްސާފައިވާ މި އަޑުއެހުން ބޭއްވުނީ 11.45 ހާއިރެވެ. އަދި ދެ ގަޑިއިރަށް ވުރެ ގިނަ އިރު މި އަޑުއެހުން ނުފެށި ދިޔައިރުވެސް އަޑުއެހުން ނުފެށުނު ސަބަބެއް ކޯޓުން ނުބުނެ އެވެ. އަދި އަޑުއެހުން ފެށުމަށްފަހު ހޭދަވީ ގާތްގަނޑަކަށް ފަސް މިނެޓެވެ.

ނަދީމްގެ މައްޗަށް ޓެރަރިޒަމްގެ އަމަލެއް ކުރަން އުޅުމުގެ ދައުވާ އުފުލީ ގާނޫނާ ހިލާފަށް ސަރުކާރު ވައްޓާލުމަށް މަޖިލިސް މެމްބަރުންތަކަކާ ގުޅިގެން، ފާރިސް އެންގެވި ގޮތަށް އަމަލުކޮށް، ގާނޫނީ އުސޫލުތަކުގެ ބޭރުން ކުރީގެ ޕޮލިސް ކޮމިޝަނަރު އަހްމަދު އަރީފް މެދުވެރިކޮށް ދުރާލާ ރާވައިގެން ފުލުހުންގެ ތެރެއިން ބަޔަކު ލައްވައި ފުލުހުންގެ ޑިއުޓީގައި އުޅުނު އިތުރު ފުލުހުންނާއި ކުރިމަތިލައި، ގައުމުގެ ހަމަ ނުޖެހުން ނަގާލަން މަސައްކަތްކޮށްފައިވާތީ ކަމަށެވެ. ގާނޫނުއަސާސީ އާއި ގާނޫނުތަކާއި އުސޫލުތަކުގެ ބޭރުން، ވެރިކަން ބަދަލުކޮށް، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތަށް ނުރައްކާތެރިވާ ފަދަ ހާލަތެއް ނަދީމު މެދުވެރި ކުރުވާފައިވާ ކަމަށް ވެސް ނަދީމުގެ މައްޗަށް ދައުވާ އިއްވަމުން ދައުލަތުގެ ވަކީލު ވިދާޅުވިއެވެ.