ޤާނޫން އަސާސީ އިސްލާހު ކުރީ ޖަލުތަކުގެ އަނިޔާގެ ސަބަބުން: މާރިޔާ
މިހާރު އަނެއްކާވެސް އަނިޔާކުރުމުގެ ސަޤާފަތް ވަނީ ފެށިފައި
ގުޅިފައިިވާ ސިޔާސީ ޕާޓީތަކުން ބޭއްވި ޕެނަލް ޑިސްކަޝަންގައި މާރިޔާ ދީދީ
ޤާނޫން އަސާސީ އިސްލާހް ކުރީ އަނިޔާކުރުމުގެ ސަޤާފަތެއް ޖަލުގައި އޮތުމުން އެކަން އިސްލާހް ކުރުމަށް ކަމަށާއި ޤާނޫން އަސާސީން ގެނައި ބަދަލު މިހާރު ނެތިގެން ހިނގައްޖެ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރު މާރިޔާ އަހުމަދު ދީދީ ވިދާޅުވެއްޖެއެވެ.
ރައީސް މައުމޫނަށް ކުރާ އަނިޔާ ހުއްޓާލުމަށް ގޮވާލާ ކުރިއަށްގެންދާ ހަރަކާތްތަކުގެ ތެރެއިން މ. ކުނޫޒްގައި ބޭއްވި ޕެނަލް ޑިސްކަޝަންގައި ވާހަކަދައްކަވަމުން ޤާނޫން އަސާސީ އެކުލަވާލިއިރު ރައްޔިތުންގެ ޚާއްޞަ މަޖިލީހުގައިވެސް އުޅުއްވި މާރިޔާ ވިދާޅުވީ މިހާރު އަނިޔާވެރިކަންވަނީ ހައްދުފަހަނައަޅާފައި ކަމަށާއި ޤާނޫން އަސާސީ އިސްލާހު ކުރީ މިގޮތައް އަނިޔާވެރިކަމުގެ ސަޤާފަތެއްހެން ކުރިއަށްދާތީ ކަމަށެވެ. އަދި މާރިޔާ ވިދާޅުވީ ޤާނޫން އަސާސީތަކުގައި އެހާ ތަފްސީލުކޮށް ލިޔެފައި ނުހުންނަކަމަށާއި އެކަމަކު ޤާނޫން އަސާސީ ހެދިއިރު ވަރަށްގިނަ ތަފްސީލުތައް ލިޔެފައި ހުންނާނެ ކަމަށެވެ. ޤާނޫން އަސާސީ އިސްލާހު ކުރެވުމާއެކު ޖިނާއީ އިޖުރާއަތުގެ ޤާނޫނެއް ހެދިން ކަމަށްވެސް މާރިޔާ ވިދާޅުވިއެވެ.
ރައީސް ޔާމީން ވެރިކަމަށް ގެންނެވި އެއްބަފާ ބޭބޭފުޅަށް ކުރަމުންދާ އަނިޔާއަށް އިޝާރާތް ކުރައްވާ މާރިޔާ ވިދާޅުވީ ރައްޔިތުން އަބަދުވެސް ވެރިކަމުގައި ހުންނަން ބޭނުންވަނީ ކުލުނު ހުންނަ ވެރިއެއް ކަމަށާއި ރައީސް ޔާމީނަކީ އެފަދަ ވެރިއެއް ނޫން ކަމަށެވެ. ފްލެޓްގެ ވާހަކަ ދެއްކިއަސް އަދި އުމުރުން ދުވަސްވީ މީހުންނަށް 5000 ރުފިޔާ ދިނަސް ޢާއްމުން ދެކެނީ ޔާމީނަކީ އަނިޔާވެރިއެއް ކަމަށްވެސް މާރިޔާ ވިދާޅުވިއެވެ.
މާރިޔާ ވިދާޅުވީ ރައީސް މައުމޫނަކީ މިއަދު އެފަދަ އަނިޔާތައްދޭ ވަރުގެ ބޭފުޅެއް ނޫން ކަމަށާއި ރައީސް ޔާމީންވެސް ހިމެނޭ ގޮތުން މައްޗަންގޮޅީ އުތުރުގެ ރައްޔިތުންގެ ފަރާތުން އެމަނިކުފާނު ދޫކޮށްލަން އެދޭ ކަމަށެވެ. މިހާރު ޤާނޫން އަސާސީ އޮތްގޮތުން މީހުން ހައްޔަރު ކޮށްފައި ބެހެއްޓޭނީ ވަރަށް ހަނިފުރުސަތަކުން ކަމަށާއި އޭގެ ތެރޭގައި ހެކި ނައްތާލަން އުޅުމާއި ފިލުމާއި މުޖުތަމައުއަށް ނުރައްކާވާފަދަ މީހަކަށް ވާން ޖެހޭނެ ކަމަށެވެ. ނަމަވެސް ރައީސް މައުމޫން ހައްޔަރުކޮށްފައިވަނީ އެފަދަ އެއްވެސް ކަމެއްގެ ދަށުން ނޫން ކަމަށާއި މިހާރުން މިހާރަށް ދޫކޮށްލަން ގޮވާލާ ކަމަށް މަރިޔާ ވިދާޅުވި އެވެ.
ކުރިން ބަންޑާރަނައިބުކަންވެސް ކުރެއްވި މާރިޔާ ވިދާޅުވީ ތަހުޒީބުގެ މަގުން ހެއްކާއި ޤަރީނާގެ މައްޗަށް ބިނާކޮށް ޝަރީއަތްތައް ހިންގުމަށް ގޮވާލާ ކަމަށާއި ހުކުމް ކުރަން އިންނަ މީހާވެސް މިހާރު ހެކިބަސްދޭކަމަށެވެ. މާރިޔާ ވިދާޅުވީ ޤާނޫން އަސާސީ އިސްލާހު ކުރިއިރު ގެނައީ ބާރުތައް ވަކިވެފައިވާ ނިޒާމެއްކަމަށާއި ރައްޔިތުން ބާރުވެރި ކުރުވާނެ ނިޒާމެއް ކަމަށެވެ. ސަރުކާރު ހިންގަނީ ރައްޔިތުންދިން ބާރާ އެއްގޮތައްތޯ ބަލަން މަޖިލިސް އޮންނައިރު އެކަން ކުރަނީ ޤާނޫނޫނާ އެއްގޮތައްތޯ ބަލާނީ ކޯޓުތަކުން ކަމަށެވެ.
ސިޔާސީ ދައުވާތައް ކުރެވިދާނެތީ މިނިވަން ޕީޖީއެއް ކަނޑައެޅިކަމަށާއި އެއީ މިނިވަންކަމާއެކު މީހުންނަށް ދައުވާކޮށް ހެދުމަށް ހެއްދެވި ގޮތެއްކަމަށް މާރިޔާ ވިދާޅުވިއެވެ. މާރިޔާ ވިދާޅުވީ އެންމެންވެސް ކަންކުރަން ޖެހޭނީ ޤާނޫނާ އެއްގޮތަށް ކަމަށް ބުނެފައިވީނަމަވެސް މިހާރު މިފެންނަނީ އެގޮތަކަށް ނޫން ކަމަށާއި ފަނޑިޔާރުންނަށްވެސް ކަންކަން ކުރެވޭނީ ޤާނޫން އަސާސީއާ އެއްގޮތައް ކަމަށް މާރިޔާ ވިދާޅުވިއެވެ.
މާރިޔާ ވިދާޅުވީ ތިންބާރުގެ އިތުރުން ކަންކަމަށް ފާރަވެރިވުމަށް މިނިވަން މުއައްސަސާތަކެއް އުފެއްދެވިކަމަށާއި އެތަންތަންވެސް ވަނީ ވާވެފައި ކަމަށެވެ. އެންމެކުޑަމިނުން ބަޔާންގަނޑެއް ހިސާބުވެސް ނެރެލަން ނުކެރޭ ކަމަށް މާރިޔާ ވިދާޅުވިއެވެ.
