އެލް ކްލެސިކޯ: ފަހު ކްލެސިކޯގައި ކުޅުމަށް އިނިއެސްޓާ ފިޓުވެއްޖެ

ސްޕެނިޝް ލަލީގާގައި ވަރުގަދަ ރެއާލް މެޑްރިޑާއި ބާސެލޯނާ ކުޅޭ 'އެލް ކްލެސިކޯ' އަށް ބާސެލޯނާގެ ކެޕްޓަން އަންދްރޭސް އިނިއެސްޓާ ފިޓުވެއްޖެއެވެ.

މި މެޗަށް ތައްޔާރުވުމަށް ބާސާއިން މިދިޔަ ހަފްތާގައި ކުރިޔަށް ގެންދިޔަ ފަރިތަކުރުންތަކުގައި ފަލަމަސްގަނޑަށް ލިބިފައިވާ އަނިޔާއަކާއި ގުޅިގެން އިނިއެސްޓާ ބައިވެރިވެފައެއް ނުވެއެވެ. އެހެން ނަމަވެސް މި މެޗަށް ބާސާގެ ކޯޗު އާނެސްޓޯ ވަލްވާޑޭ ނެގި 18 ކުޅުންތެރިންގެ ސްކޮޑުގައި ކެޕްޓަން އިނިއެސްޓާ ވަނީ ހިމަނާފައެވެ.

މި މެޗަށް ނެގި ސްކޮޑުން ޑިފެންޑަރުން ކަމަށް ޔެރީ މިނާ އާއި އެލެކްސް ވިޑާލް އަދި މިޑްފީލްޑަރު އަންދްރޭ ގޯމޭޒްއަށް ފުރުސަތު ދީފައެއް ނުވެއެވެ. މި މެޗާއި ބާސާއިން ކުރިމަތިލާއިރު އެ ޓީމަށް ވަނީ ސްޕެނިޝް ލަލީގާގެ ތަށި ޔަގީންވެފައެވެ. ބާސާ ސްޕެނިޝް ލަލީގާގެ ތަށި ޔަގީންކުރީ މިދިޔަ ހަފްތާގައި ޑިޕޯޓިވޯއާ ދެކޮޅަށް ކުޅުނު މެޗު ކާމިޔާބުކޮށްގެންނެވެ. ހަމައެހެންމެ މި މެޗަށް ބާސާ ނުކުންނައިރު ލަލީގާގައި ބާސާ ކުޅުނު އެއްވެސް މެޗަކުން އެ ޓީމު މިހާތަނަށް ބަލިވެފައެއް ނުވެއެވެ.

އިނިއެސްޓާއާ ގުޅޭގޮތުން ވާހަކަ ދައްކަމުން ބާސާގެ ކޯޗު އާނެސްޓޯ ވަލްވާޑޭ ބުނަފައިވަނީ އޭނާ މެޗުގެ ފުރަތަމަ އެގާރައިން ފެންނާނެ ކަމަށާއި މިއީ އޭނާގެ ފުރަތަމަ ކްލެސްކޯ ނޫންކަން އޭނާއަށް ވެސް އެނގޭނެ ކަމަށެވެ. އެހެންކަމުން އޭނާގެ ފަރާތުން ފެންނަންޖެހޭ ކުޅުން އޭނާ ދައްކާނެ ކަމަށާއި އޭނާގެ ފަރާތުން ވެސް 100 އިންސައްތަ ފެންނާނެ ކަމުގެ ޔަގީންކަން އެބައޮތް ކަމަށެވެ. ވަލްވާޑޭ މިހެން ބުނެފައިވާއިރު މި ސީޒަނުގައި އިނިއެސްޓާ ފުރިހަމަ 90 މިނެޓު ހަމަކޮށްފައިވަނީ އެންމެ ދެ މެޗުގައެވެ.

މި މެޗަކީ އިނިއެސްޓާގެ އެންމެ ފަހު ކްލެސިކޯއަށްވާއިރު ރެއާލްގެ ކޯޗު ޒިދާން ވެސް ވަނީ އިނިއެސްޓާއަށް ތައުރީފްކޮށްފައެވެ. އޭނާ ބުނީ އިނިއެސްޓާއަކީ އޭނާ ވަރަށް އިހުތިރާމްކުރާ ކުޅުންތެރިޔެއް ކަމަށާއި އޭނާއަކީ އުމުރުން ދުވަސްވެފައި ހުރި ނަމަވެސް ކެރިއަރުގައި އެތަކެއް ކާމިޔާބުތަކެއް ހޯދާފައިވާ ކުޅުންތެރިޔެއް ކަމަށެވެ. އޭނާ ބުނީ އިނިއެސްޓާއަކީ ކޮންކަހަލަ ކުޅުންތެރިޔެއްކަން އެންމެނަށް ވެސް އެނގޭ ކަމަށާއި ރެއާލްގެ ފަރާތުން އޭނާއަށް އެދެނީ މުސްތަގުބަލުގައި ކާމިޔާބަށް ކަމަށެވެ.

މިއީ އިނިއެސްޓާ ބާސާއަށް ކުޅެދޭ އެންމެ ފަހު އެލް ކްލެސިކޯއަށްވާއިރު އޭނާ ވަނީ މި ސީޒަނަށްފަހު ބާސާ ދޫކޮށްލާނެކަން ކަށަވަރުކޮށްދީފައެވެ. ބެލެވޭ ގޮތުގައި މި ސީޒަނަށް ފަހު އޭނާ ފެނިގެންދާނީ ޗައިނީޒް ސުޕާ ލީގުގެ ޓީމެއް ކަމަށްވާ ޗޮންގިންގް ލިފާންއެވެ. އެހެން ނަމަވެސް އެކަމާއި ގުޅިގެން އިނިއެސްޓާ އެއްވެސް ބަހެއް ބުނެފައެއް ނުވެއެވެ.

މިރޭގެ މެޗު ވެގެންދާނީ އިނިއެސްޓާގެ ކެރިއަރުގައި އޭނާ ރެއާލް މެޑްރިޑާއި ދެކޮޅަށް ކުޅޭ 38 ވަނަ މެޗަށެވެ. އޭގެ ކުރިން ކުޅުނު 16 މެޗުގައި އޭނާވަނީ ބާސާއާއެކު ކާމިޔާބު ހޯދާފައެވެ.