އުތުރު ކޮރެއާއިން ދެކުނު ކޮރެއާގެ ޓައިމް ޒޯންއަށް ގަޑި ބަދަލުކޮއްފި
6 މެއި 2018 | އާދީއްތަ 03:38ގަޑި ބަދަލުކޮށްފައިވަނީ ހުކުރު ދުވަހުރޭ
ދެކޮރެއާގެ ވަގުތު
ދެކޮރެއާ ގުޅިގެން ބޭއްވި މަޝްވަރާ ބައްދަލުވުންތަކަށްފަހު އުތުރުކޮރެއާގެ ލީޑަރ ކިމް ޖޮންގ އުން ވައުދުވެވަޑައިގަތް ގޮތުގެމަތިން އެގައުމުން ދެކުނު ކޮރެއާގެ ޓައިމް ޒޯންއަށް ގަޑި ބަދަލުކޮށްފިއެވެ.
އުތުރު ކޮރެއާއިން ވަނީ ހުކުރު ދުވަހުރޭ ގަޑިން 23:30 ގައި 30 މިނެޓް ކުރިއަށްޖައްސައިލާފައެވެ. އުތުރު ކޮރެއާގެ ރަސްމީ ނޫސް ވުޒާރާއިން މި ގެނައި ބަދަލު ސިފަކޮއްފައިވަނީ ދެކޮރެއާ ގުޅިލާމެހިލަން އެޅޭ ފުރަތަމަ ފިޔަވަޅުގޮތުގައެވެ.
ގަޑި ބަދަލު ކުރުމުގެ ކުރިން އުތުރު ކޮރެއާގައި ބޭނުން ކުރަމުންއައީ އަމިއްލައަށް ތަޢާރުފުކޮށްފައިވާ ޕިޔޮންގްޔަންގް ވަގުތެވެ. ޕިޔޮންގްޔަންގް ވަގުތު އުތުރު ކޮރެއާއަށް ތަޢާރުފު ކޮށްފައިވަނީ 2015 ވަނަ އަހަރުއެވެ. އެބަދަލު ކިމް ޖޮންގ އުން ގެންނެވީ ޖަޕާނުގެ ބާރުދަށުގައި ކޮރެއަން ޕެނިންސިއުލާ އޮތްއިރު އެގައުމުގެ ވެރިރަށް ޓޯކިޔޯގެ ވަގުތާއި ދިމާ ކުރުމަށް ގަޑި ބަދަލު ކޮށްފައިވާތީ އެކަމާއި އިހްތިޖާޖް ކުރުމުގެ ގޮތުންނެވެ.
މި ކަމާއި ގުޅިގެން އިހްތިޖާޖު ކުރުމުގެ ގޮތުން 1950 ވަނަ އަހަރު ދެކުނު ކޮރެއާއިންވެސް ވަނީ ޖަޕާނުން ކަޑައެޅި ވަގުތު ބަދަލުކޮށްފައެވެ. ނަމަވެސް އޭގެ ފަހުން 1960 ގެ އަހަރުތަކުގައި ކުރިން ހުރި ވަގުތަށް އެމީހުން ވަނީ ރުޖޫއަވެފައެވެ.
ދެ ކޮރެއާ ތަބާވާ ޓައިމްޒޯން އެއްގޮތް ކުރުމާއި ގުޅިގެން ދެ ކޮރެއާގެ ދެމެދުގައިވާ ޑިމިލިޓަރައިޒްޑް ޒޯންގައި ބަހައްޓާއިފައި ހުރި ދެގައުމުގެ ގަޑިންވެސް މިހާރު ފެންނަމުންދަނީ އެއް ވަގުތެކެވެ.
