ރައީސް އަބްދުﷲ ޔާމީނަކީ ކާކުކަން ދަންނަން ޖެހޭނެ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު އަލީ ހަމީދާއި ޗީފް ޖުޑީޝަލް އެޑްމިނިސްޓްރޭޓަރު ހަސަން ސައީދަށް އެންޓި ކޮރަޕްޝަން ކޮމިޝަން (އޭސީސީ)ގެ ރައީސް ހަސަން ލުތުފީ އިންޒާރު ދެއްވިކަން ފަޅާ އަރައިފި އެވެ.
ލުތުފީ އެ އިންޒާރު ދެއްވިކަން ފަޅާ އެރީ ފެބްރުއަރީ އެކެއްގެ އަމުރާ ގުޅިގެން ފުލުހުން ހިންގި ތަހުގީގަށް ލުތުފީ ދެއްވި ބަޔާނުންނެވެ. ދައުލަތުގެ ސިއްރު ލިޔުމެއްގެ ގޮތުގައި ވަނިކޮށް، ލީކުވެފައިވާ ލުތުފީގެ ބަޔާންނުގައި ވިދާޅުވެފައި ވަނީ ސުޕްރީމް ކޯޓުގެ ތެރެއިން ވެރިކަން ވައްޓާލަން ރޭވުންތަކެއް ރޭވިކަން އެނގިގެން ސަރުކާރާ ދެކޮޅަށް އެއްވެސް ކަމެއް ނުކުރުމަށް ފަނޑިޔާރު އަލީ ހަމީދަށާއި ހަސަން ސައީދަށް އިންޒާރު ދެއްވި ކަމަށެވެ.
އެ ބަޔާނުގައި ލުތުފީ ވިދާޅުވެފައި ވަނީ އުއްތަމަފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދާއި ހަސަން ސައީދު މެލޭޝިއާ އިން އަގުބޮޑު އެޕާޓްމެންޓުތަކެއް ބައްލަވައި ގަންނަން އުޅުއްވި ކަމަށާއި ފައިސާ ދެއްކުމުގެ މަރުހަލާތަކެއް ވެސް ފުރިހަމަ ކުރި ކަމަށެވެ. އަދި ކުރިން އެނގުމެއް ނެތި، އޭނާއަށް ވެސް އެތަނުން އެޕާޓްމެންޓެއް ރިޒާވްކޮށްފައި ބެހެއްޓި ކަމަށް ލުތުފީގެ ބަޔާނުގައިވެ އެވެ. ނަމަވެސް އެތަނަށް އަގު ދައްކާނެ ވަރުގެ ފައިސާ ނެތް ކަމަށް ބަޔާނުގައި ލުތުފީގެ ވިދާޅުވެފައިވެ އެވެ.
އެ ބަޔާނުގައި ބުނެފައިވާ ގޮތުން އުއްތަމަ ފަނޑިރާއި ފަނޑިޔާރު އަލީ ހަމީދާއި ހަސަން ސައީދު މެލޭޝިއާއިން އެޕާޓްމަންޓުތަކެއް ބައްލަވައިގަތުމަށް ފައިސާ ހޯދާ ގޮތާމެދު ލުތުފީ ސުވާލު އުފެދުނެވެ. އަދި ލުތުފީގެ ރައްޓައްސެއް ފަރާތުން އެނގުނު ގޮތުގައި އެ ފައިސާ ދައްކަނީ ރާއްޖޭގެ ކޮންމެ ވެސް ވިޔަފާރިވެރިޔަކު ކަމަށް ވެސް އޭނާ ދެއްވި ބަޔާނުގައި ވިދާޅުވެފައިވެއެވެ.
އެ ބަޔާނުގައި ލުތުފީ ވިދާޅުވެފައި ވަނީ ފެބްރުއަރީ އެއް ވަނަ ދުވަހު ސުޕްރީމް ކޯޓުން އަމުރު ނެރުނުއިރު، އޭނާ ހުންނެވީ ހުޅުމާލެ ޝްވެކް ސިނަމާގައި "ޕަދްމާވަތު" ފިލްމު ބެލުމަށް ކަމަށެވެ. ސިނަމާގައި އިންދާ ސުޕްރީމް ކޯޓުގެ އަމުރު ނެރުނު ކަމުގެ މެސެޖުތައް ލިބެން ފެށުމުން، އަލީ ހަމީދާއި ހަސަން ސައީދަށް ގުޅޭތޯ މަސައްކަތް ކުރި ކަމަށާއި ނަމަވެސް އެބޭފުޅުން ފޯނު ނުނެންގެވި ކަމަށް ލުތުފީ ވިދާޅުވެފައިވެއެވެ. އަދި އެ ދެ ބޭފުޅުންނަށް ފޮނުއްވެވި މެސެޖަށް ވެސް ޖަވާބު ދީފައި ނުވާ ކަމަށް ވެސް ބަޔާނުގައި ވެއެވެ.
އެވަގުތު ލުތުފީގެ ހިތަށް އެރި ވާހަކަތަކެއް އޭނާގެ ބަޔާނުގައި ލިޔެފައިވެއެވެ. އެގޮތުން، "މިއީ ކޮން ކަމެއް ހެއްޔޭ"، "ތިހާ މުނާފިގު ވާކަށް ނުވާނެއޭ" ބުނެ، އަލީ ހަމީދާއި ހަސަން ސައީދު އަރިހުގައި އެ ވާހަކަތައް ވިދާޅުވާން ބޭނުންފުޅުވި ކަމަށް ލުތުފީގެ ބަޔާނުގައިވެއެވެ.
ލުތުފީގެ އިނގިލީގެ ނިޝާން ޖައްސަވައި، ސޮއި ކުރައްވާފައިވާ އެ ބަޔާނުގައި ލުތުފީ ވިދާޅުވެފައިވާ ގޮތުން ފެބްރުއަރީ އެކެއްގެ އަމުރާ ގުޅޭ އެއްވެސް ވާހަކައެއް އޭނާއާ އެބޭފުޅުން ހިއްސާކުރައްވާފައެއް ނުވެއެވެ.
އެ އަމުރު ނެރުމާއެކު ވަރަށް ކަންބޮޑުވި ކަމަށާއި ސަބަބަކީ އޭނާގެ ބައިވެރިވުމެއް އެކަމުގައި އޮވެދާނެ ކަމަށް ބަޔަކު ބުނެފާނެތީ ކަމަށް ލުތުފީގެ ބަޔާނުގައި ބުނެފައިވެ އެވެ. ސަބަބަކީ ހަސަން ސައީދަކީ އޭނާއާއެކު ވަރަށް ގިނައިން ލެމަންގްރާސްއަށް ރޭގަނޑުގެ ކެއުމަށް ވަޑައިގަންނަވާ ބޭފުޅަކަށް ވާތީ ކަމަށާއި އެ މަންޒަރު ގިނަ ބަޔަކަށް ފެނިފައިވުމުން ކަމަށް ލުތުފީ ވިދާޅުވެފައިވެއެވެ.
"...އަދި އެކަމުގައި އަޅުގަނޑު ވަރަށް ކަންބޮޑުވިއެވެ. އެއީ ޑިނާރ އަށާއި ތަންތަނަށް ވަރަށް ގިނައިން ހަސަން ސައީދާއި އެކީގައި ދެވިފައިވުމުން ފެންނަ މީހުން ވެސް އަޅުގަނޑުގެ ބައިވެރިވުމެއް އެކަމުގައި އޮވެދާނެ ކަމަށް ބުނެފާނެތީއެވެ،" ލުތުފީގެ ބަޔާނުގައި ބުނެފައިވެއެވެ.
އެ ބަޔާނުގައި ލުތުފީ ވިދާޅުވެފައިވާ ގޮތުން، އުއްތަމަ ފަނޑިޔާރު އަބްދުﷲ ސައީދު ފާހަގަ ކުރެވިފައި ވަނީ ވަރަށް ވަތަނީ އަދި މައުލޫމާތު ހުރި ދީނީ ބޭފުޅެއްގެ ގޮތުގައެވެ. އެހެންކަމުން އުއްތަމަ ފަނޑިޔާރުގެ ފަރާތުން އެކަހަލަ ކަމެއް ފެނިދާނެ ކަމަށް ގަބޫލުފުޅު ނުކުރެއްވޭ ކަމަށެވެ. އަދި އުއްތަމަ ފަނޑިޔާރު އެ އަމުރު ނެރުއްވީ ކޮންމެ ވެސް ކަހަލަ ފިއްތުންތަކެއް ކުރިމަތިވެ ވަޑައިގަތުމުން ކަމަށް ބެލެވޭ ކަމަށް ވެސް ލުތުފީގެ ބަޔާނުގައި ވިދާޅުވެފައިވެ އެވެ. އެކަމަކު، އަލީ ހަމީދު އެކަހަލަ ކަމެއް ކުރައްވަފާނެ ކަމަށް ގަބޫލު ކުރެއްވޭ ކަމަށް ވެސް ލުތުފީ ވިދާޅުވެފައިވެއެވެ.
"އަޅުގަނޑަށް ބޮޑަށް ގަބޫލު ކުރެވެނީ ކޮންމެވެސް ކަހަލަ ފިއްތުންތަކެއްގެ ތެރޭގައި އުއްތަމަފަނޑިޔާރު އަބްދުﷲ ސައީދު ހުރެގެން ކޮށްފައިވާ އަމުރެއް ކަމަށެވެ. އެހެން ނަމަވެސް އަލީ ހަމީދު މުހައްމަދު އެކަހަލަ ކަމެއްކޮށްފާނެކަން އަޅުގަނޑަށް ގަބޫލުކުރެވެއެވެ،" ލުތުފީ ދެއްވި ބަޔާނުގައިވެއެވެ.
އަލީ ހަމީދު އެފަދަ ކަމެއް ކުރައްވަފާނެ ކަމަށް ވިދާޅުވެ، ލުތުފީގެ ބަޔާނުގައި ބުނެފައި ވަނީ ސުޕްރީމް ކޯޓުން އަމުރު ނެރުނު ދުވަހު އޮފީހުގައި އިންދާ ހައިރާންވާފަދަ ވާހަކަތަކެއް އަލީ ހަމީދު އޭނާއަށް ގުޅުއްވާފައި ދެއްކެވި ކަމަށެވެ. އެގޮތުން "ކަލޯއޭ މީ ތިމަންނަމެން ގެނައި ސަރުކާރެކޭ" ވިދާޅުވެ ސަރުކާރުން ހިންގާފައިވާ ބޮޑެތި މަޝްރޫތަކުގެ ވާހަކަތައް އަލީ ހަމީދު އޭނާގެ އަރިހުގައި ދެންނެވި ކަމަށެވެ.
"[އަލީ ހަމީދު]ގުޅުއްވާފައި ވިދާޅުވި ކަލޯއޭ މީ ތިމަންނަމެން ގެނައި ސަރުކާރެކޭ، މި ސަރުކާރު މި ގެނައީ ތިމަންނަ މެންނޭ، ސަރުކާރު ދިފާއުކުރާނީ ވެސް ތިމަންނަމެންނޭ. ބަލާބަލާށޭ ތިއޮއް އެއާޕޯޓު އެހެދުނީއޭ، ބްރިޖު ތިއޮއް ނިންމަނީއޭ. 25 ބުރީގެ ހޮސްޕިޓަލެއް މި ހެދުނީއޭ، އަތޮޅު ތެރޭގެ 40 ހަކަށް ބަނދަރު އެބަހަދައޭ،" އަލީ ހަމީދާ ވިދާޅުވި ކަމަށް ވިދާޅުވި ކަމަށް ބުނެ، ލުތުފީގެ ފާހަގަކޮށްފައިވެ އެވެ.
ލުތުފީ ވިދާޅުވެފައި ވަނީ ފެބްރުއަރީ އެކެއްގެ އަމުރުގެ ކުރިން، ސުޕްރީމް ކޯޓުގެ ތެރެއިން ވެރިކަން ވައްޓާލުމަށް ރޭވުންތަކެއް ރޭވޭ ކަމަށް އެކި މީހުން އޭނާއާ ހިއްސާކޮށްފައިވާ ކަމަށެވެ. އެފަދަ ވާހަކަތަކެއް އިވިފައިވާތީ، ސަރުކާރާ ދެކޮޅަށް އެއްވެސް ކަމެއް ނުކުރުމަށް އަލީ ހަމީދާއި ހަސަން ސައީދަށް އިންޒާރު ދެއްވި ކަމަށާއި ރައީސް އަބްދުﷲ ޔާމީނަކީ ކާކުކަން ދަންނަން ޖެހޭނެ ކަމަށް ވެސް އެ ދެބޭފުޅުންގެ އަރިހުގައި ވިދާޅުވި ކަމަށް ލުތުފީގެ ބަޔާން ނިންމާލަމުން ވިދާޅުވެފައިވެއެވެ.