ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހިމްގެ ދަތުރުފުޅާއި ގުޅިގެން އެސިޓީގެ ބައެއް މަގުތައް ހައުސިންގް މިނިސްޓްރީން ހެދުމަކީ ދެއްކުންތެރިކަން ކަމަށާއި، އެފަދަ ކަންކަމުން ރައްޔިތުން ދިރިއުޅޭ ދަތިހާލެއް ނޭނގޭނެ ކަމަށް ފުވައްމުލަކު ސިޓީ ކައުންސިލްގެ މޭޔަރު އަބްދުﷲ ފަލާހު ވިދާޅުވެއްޖެއެވެ.
ފާތިމަތު އިބްރާހިމް ފުވައްމުލަކަށް ވަޑައިގަތުމުގެ ދެ ދުވަސް ކުރިން ބައެއް މަގުކަށް ހައުސިންގް މިނިސްޓްރީން ފަސް އަޅާ އެއްވަރުކުރުމުން ގިނަ ރައްޔިތުންތަކެއް އެކަމާއި ކަންބޮޑުވުން ފާޅުކުރުމާއި ގުޅިގެން ފުވައްމުލަކު ސިޓީ ކައުންސިލްގެ މޭޔަރު އަބްދުﷲ ފަލާހު ވިދާޅުވީ ފާތިމަތު އިބްރާހިމްގެ މި ދަތުރުފުޅާއި ގުޅިގެން ދައުލަތުގެ ވަސީލަތްތައް ނަހަމަ ގޮތުގައި ބޭނުން ކުރަމުންދާ ކަމަށެވެ.
ފުވައްމުލަކުގެ ބައެއް އަވަށްތަކުގެ މަގުތައް ޗަކަ ވުމާއި ގުޅިގެން އެ މަގުތައް ހެދުމަށް މީގެ ކުރިން ހައުސިންގް މިނިސްޓްރީގެ ފުވައްމުލަކު ޔުނިޓަށް ތަކުރާރުކޮށް އެދިފައިވާނެ ކަމަށް ފަހާލު ވިދާޅުވިއެވެ. އެހެންކަމުން މެޑަމް ފާތުން އެ ސިޓީއަށް ވަޑައިގަންނަވާތީ އެކަމަނާ ދަތުރު ކުރައްވަން ހަމަޖެހިފައިވާ ކަމަށް ބެލެވޭ މަގުތައް ހެދުމަކީ ދެއްކުންތެރިކަން ކަމަށާއި، އެއީ ރައްޔިތުންގެ ހާލަތު އޮޅުވާލަން ބަޔަކު މީހުން މަސައްކަތް ކުރުން ކަމަށް ސިޓީ ކައުންސިލްގެ މޭޔަރު ފަލާހް ވިދާޅުވިއެވެ.
"މި ގޮތަށް ކަންކުރުމުން ރަށުގެ ގިނަ ރައްޔިތުން ދެކެނީ އެކަމަނާ ދަތުރާއި ގުޅިގެން ބައެއް މަގުތައް ހެދުން ކަމަށް، އެކަމަށް ރަށަށް ވަޑައިގަތުމުގެ ކުރިން ވެސް، ވަޑައިގެން ވެސް ދައުލަތުގެ ވަސީލަތްތައް އެ ދަނީ ނަހަމަ ގޮތުގައި ބޭނުން ކުރަމުން" ރާއްޖެއެމްވީއަށް މައުލޫމާތު ދެމުން ފަލާހް ވިދާޅުވިއެވެ.
ރާއްޖެއެމްވީއަށް މައުލޫމާތު ދިން ފުވައްމުލަކު މީހަކު ބުނީ އެސިޓީގެ މާދަނޑު އަވަށުގެ އެންމެ މަގަކަށް ފަސް އަޅައި ހަދާފައިވާ ކަމަށެވެ. އެމަގަށް ފަސް އަޅައި، ދެން ފަސް އަޅާ އެންވަރުކުރަން ޖެހޭ މަގުތައް ހެދުމަށް ހައުސިންގް މިނިސްޓްރީން މަސައްކަތް ނުކުރާތީ ހިތާމަ ކުރާ ކަމަށެވެ. ފާތިމަތު އިބްރާހިމްގެ މި ދަތުރުފުޅުގައި ދަތުރުކުރާނެ ކަމަށް ލަފާ ކުރެވޭ މަގުތައް އެކަނި ހެދުމަކީ، ރައްޔިތުންގެ ކަންބޮޑުވުންތައް އިހްސާސް ނުކުރެވޭ ކަމުގެ ހެއްކެއް ކަމަށް އޭނާ ވިދާޅުވިއެވެ.
ފާތިމަތު އިބްރާހިމް ފުވައްމުލަކަށް ވަޑައިގެންފަނީ ބުދަ ދުވަހުގެ ހަވީރުގައެވެ. އެންމެ ގާތުން ކެމްޕެއިން ދަށުން ފުވައްމުލަކު ސިޓީއަށް ކުރެއްވި މި ދަތުރުފުޅުގައި އެކަމަނާ ހޭދަކުރައްވާ ހަތަރު ދުވަހުގެ ތެރޭގައި އެ ސިޓީގެ ރައްޔިތުންގެ ހާލު ބެއްލެވުމަށް އެކި އެކި އަވަށްތަކުގެ ރައްޔިތުންނާއި ބައްދަލުކުރައްވަން ވަނީ ހަމަޖެހިފައެވެ. އަދި އެކަމަނާއި ބައިވެރިވަޑައިގަންނަވާ ޕީޕީއެމްގެ ޖަލްސާއެއް ހުކުރު ދުވަހު ބާއްވުމަށް މިހާރު ވެސް އަންނީ ތައްޔާރުވަމުންނެވެ.
ފާތިމަތު އިބްރާހިމްގެ ދަތުރުފުޅުގައި އެކަމަނާގެ އަރިހުގައި އެންސްޕާގެ ޓީމެއް ސިޓީ އުރަތައް ހިފައިގެން ހަރަކާތެރިވުމަކީ ބަލައިގަނެވޭނެ ކަމެއް ނޫން ކަމަށް ފަލާހް ވިދާޅުވިއެވެ.
މި ދަތުރުފުޅުގައި ފާތިމަތު އިބްރާހިމްގެ އަރިހުގައި ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުރުން ރައްޔިތުންގެ މަޖިލީހުގެ ނައިބް ރައީސް މޫސާ މަނިކު ވެސް ބައިވެރިވަޑައިގަންނަވައެވެ.
