އަރުމޭނިއާގެ ގާނޫނު ހަދާ މަޖިލީހުން އެ ގައުމުގެ އައު ބޮޑުވަޒީރަކު އިންތިޚާބު ނުކުރެވި ސިޔާސީ ހަލަބޮލިކަން އަނެއްކާ ވެސް އިތުރުވާ ގޮތް ވެއްޖެއެވެ.
އަރްމޭނިއާގައި އިންތިގާލީ ބޮޑުވަޒީރަކު ހޮވަން ޖެހިފައިވަނީ، މަގުތަކުގައި ރައްޔިތުން ކުރިޔަށް ގެންދިޔަ ބޮޑެތި މުޒާހަރާތަކަކަށް ފަހު އަރުމޭނިއާގެ ބޮޑުވަޒީރު ސުއަރޒް ސަރްގެޒިއަން އޭޕްރީލް މަހުގެ 23 ވަނަ ދުވަހު މަގާމުން އިސްތިއުފާ ދެއްވުމުންނެވެ.
އިންތިގާލީ ބޮޑުވަޒީރުކަމަށް ކުރިމަތިލައްވާފައި ވަނީ އުމުރުުފުޅުން 42 އަހަރުފުޅުގެ ނިކޯލް ޕަޝިނިއަންއެވެ. އޭނާއަކީ ކުރީގެ ބޮޑުވަޒީރު މަގާމުން ދުރުކުރުމަށް ގޮވާލައި ކުރެވުނު ބޮޑެތި މުޒާހަރާތަކަށް ގޮވާލެއްވި އިދިކޮޅު ލީޑަރެވެ.
އަންގާރަ ދުވަހު މަޖިލީހުގައި ރިޕަބްލިކަން ޕާޓީިގެ ފަރާތުން އޭނާއަށް ވޯޓް ނުދެއްވުމުން ނިކޯލް ޕަޝިނިއަން ވިދާޅުވީ އެ ޕާޓީން އޭނާއަށް ވޯޓް ނުދޭން ނިންމި ނިންމުމަކީ ރައްޔިތުންނަށް ކުރި މަލާމާތެއް ކަމަށެވެ.
މަަޖިލީހުގެ ވޯޓް ކާމިޔާބުވެ ވަޑައިނުގެން މަޖިލީހުން އޭނާ ނުކުންނެވިއިރު ވެރިރަށް ޔަރވެންގެ މެދުތެރޭ އެތައް ހާސް ބަޔަކު ޖަމާވެ އޭނާއަށް ތާއީދުކުރަމުން ގެންދިޔައެވެ.
ޕަޝިނިއަން ވިދާޅުވީ ބުދަ ދުވަހުގެ ހެނދުނުން ފެށިގެން އޭނާއަށް ތާއީދު ކުރާ ފަރާތްތަކުން މަގުތަކާއި ރެއިިލް ވޭތަކާއި އެއަރޕޯޓްތައް ބަންދުކޮށް ސުލްހަވެރި މުޒާހަރާއެއް ފަށާނެކަމަށެވެ. ފުލުހުންވެސް އެމީހުންގެ ޝީލްޑްތައް ބެހެއްޓުމަށްފަހު މުޒާހަރާއާއި ގުޅުމަށް އޭނާ ގޮވާލެއްވިއެވެ.
ގާނޫނު ހަދާ މަޖިލީހުގެ މެމްބަރުންގެ ތެރެއިން 45 މެމްބަރަކު ޕަޝިނިއަންއާއި އެއްކޮޅަށް ވޯޓްދެއްވާފައިވާއިރު 55 މެމްބަރަކުވަނީ ދެކޮޅަށް ވޯޓް ދެއްވާފައެވެ. އެއްދުވަހުގެ ދުވާލު އެއްކޮށް ހޭދަވެގެންދިޔަ މަޖިލީހުގެ ސެޝަންގައި ރިޕަބްލިކަން ޕާޓީީންވަނީ ޕަޝިނިއަންއަށް ވޯޓްދިނުމަށް ދެކޮޅުހަދާފައެވެ.
މި މައްސަލައިގައި އާ ވޯޓަކަށް ދިއުމަށް ދިއުމަށް ހަތް ދުވަހުގެ މުއްދަތެއް ލިބޭއިރު އެކަން ނުވެއްޖެ ނަމަ މަޖިލީސް އުވާލައި އައު އިންތިޚާބެއް ބާއްވަން ޖެހޭނެެއެވެ.
