ޅ. ނައިފަރު ކައިރީގައި އޮންނަ ފަޅު ރަށަކަށް ވެލިނަގަންގޮސް އުޅުނު މީހަކު މަރުވެއްޖެ އެވެ.
އާދީއްތަ ދުވަހު ހެނދުނު ވެލިނަގަންގޮސް އުޅެނިކޮށް މަރުވެފައިވަނީ ނައިފަރު އުމުރުން 55 އަހަރު އަބްދުﷲ އިސްމާއިލް އެވެ. އޭނާ މަރުވެފައި އޮއްވާ ފެނިފައިވަނީ އޭނާއާއެކު ވެލި ނަގަން ގޮސް އުޅުނު ބިދޭސީންނަށެވެ.
ނައިފަރު ކައުންސިލް މެމްބަރަކު ވިދާޅުވި ގޮތުގައި އާމްދަނީ ހޯދުމަށް ވެލިނެގުމުގެ މަސައްކަތް ކުރަމުންދިޔަ އަބްދުﷲ ވެލިނަގަން ދިޔައީ އެރަށުގެ ކައިރީގައި އޮންނަ ވޭވަށް ކިޔާ ފަޅުރަކަށެވެ. ވެލިނަގަން ދިޔަ ބިދޭސީންނާ ހަވާލާދީ ކައުންސިލް މެމްބަރު ވިދާޅުވި ގޮތުގައި އަބްދުﷲ މޫދަށް ވެއްޓުނީ ވެލި ބަސްތާތައް ދޯނީގައި ޖަހަމުން ދަނިކޮށެވެ.
ބިދޭސީން ހީކުރީ އޭނާ ފުންމާލި ކަމަށް ކަމަށާއި ނަމަވެސް މޫދުން ނާރައި ގިނައިރުވެގެން ދިޔައިރު، އޮތީ ލޮނު ވެސް ބޮވި މަރުވެފައި ކަމަށް ކައުންސިލް މެމްބަރު ވިދާޅުވި އެވެ.
އޭނާގެ ހަށިގަނޑުގެ ބޭރުފުށުން އެއްްވެސް ޒަހަމެއް ނެތް ކަމަށްވެ އެވެ.
