ޔުއެފާ ޗެމްޕިއަންސް ލީގުގެ ސެމީ ފައިނަލުގެ ދެވަނަ ލެގުގައި ސްޕެއިންގެ ރެއާލް މެޑްރިޑާއި ދެކޮޅަށް ނުކުތުމުގެ ކުރިން ޖަރުމަނު ބުންޑެސްލީގާގައި ކުޅުނު މެޗުން ވަރުގަދަ ބަޔާން މިއުނިކް މޮޅުވެއްޖެއެވެ.

އަމިއްލަ ދަނޑު ކަމަށްވާ އެލަޔަންޒް އެރީނާގައި ކުޅުނު މި މެޗުން އެއިންޓްރެކްޓް ފްރޭންކްފާޓްއާއި ދެކޮޅަށް ކުޅެ ބަޔާން މޮޅުވީ 4-1 ގެ ނަތީޖާއަކުންނެވެ. ބަޔާންގެ ފުރަތަމަ އެގާރައިން މި މެޗުގައި ގިނަ ބަދަލުތަކެއް ފެނިގެންދިޔައިރު އެ ޓީމުގެ ފުރަތަމަ އެގާރާގައި ހިމެނޭ ގިނަ ކުޅުންތެރިންތަކެއް މި މެޗުގައި ފެނިގެންގޮސްފައެއް ނުވެއެވެ. އެގޮތުން މި މެޗުގައި ފެނިގެންދިޔައީ ހަމައެކަނި މެޓްސް ހުމެލްސް އާއި ޖޯޝުއާ ކިމިޗްގެ އިތުރުން ކީޕަރު ސްވެން އުލްރައިޗްއެވެ.

ފުރަތަމަ ހާފު ފެށިގެން ބަޔާންގެ ފަރާތުން މޮޅު ކުޅުމެއް ފެނިގެންދިޔައިރު އެ ޓީމުން ވަނީ ގިނަ ވަގުތު ބޯޅަ ހިފަހައްޓައިގެން ކުޅެ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. ހަމައެހެންމެ އެއިންޓްރެކްޓް ފްރޭންކްފާޓުން ވެސް ވަނީ ބަޔާންގެ ގޯލަށް ނުރައްކާކުރުމަށް މަސައްކަތްތަކެއް ކޮށްފައެވެ. މި ހާފުގައި ފެނިގެންދިޔަ ހަމައެކަނި ލަނޑު މެޗުގެ 43 ވަނަ މިނެޓުގައި ބަޔާންއަށް ޖަހައިދިނީ ޒުވާން މިޑްފީލްޑަރު ނިކްލަސް ޑޯޝްއެވެ.

އެއް ލަނޑުގެ ލީޑެއްގައި އޮވެ ބަޔާންއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި އިތުރަށް ކުޅުން ވަރުގަދަކޮށްފައެވެ. ތަކުރާރުކޮށް ބަޔާންއިން އުފައްދަމުންދިޔަ ހަމަލާތަކުގެ ނަތީޖާއެއްގެ ގޮތުން މެޗުގެ 76 ވަނަ މިނެޓުގައި ސެންޑްރޯ ވެގްނަރ ވަނީ ލަނޑެއް ޖަހާ ބަޔާންގެ ލީޑު ފުޅާކޮށްދީފައެވެ. އެހެން ނަމަވެސް އޭގެ ދެ މިނެޓު ފަހުން ފްރޭންކްފާޓުން ވަނީ ލަނޑެއް ޖަހާ ނަތީޖާގެ ފަރަގު ކުޑަކޮށްފައެވެ. މި ލަނޑު އެ ޓީމަށް ޖަހައިދިނީ ސެބެސްޓިއަން ހޯލަރއެވެ.

މި ލަނޑަށް ފަހު ބަޔާންއިން އެ ޓީމުގެ ކުޅުން އިތުރަށް ވަރުގަދަ ކުރުމުގެ ނަތީޖާއެއްގެ ގޮތުން 87 ވަނަ މިނެޓުގައި އެ ޓީމުގެ ތިންވަނަ ލަނޑު ޖަހައިދިނީ ބްރެޒިލްގެ ޑިފެންޑަރު ރަފީންޔާއެވެ. އެ ޓީމުގެ ހަތަރުވަނަ ލަނޑު މެޗުގެ އެންމެ ފަހު މިނެޓުގައި އެ ޓީމަށް ރަފީންޔާގެ އެހީތެރިކަމާއެކު ޖަހައިދިނީ ނިކްލަސް ސޫލޭއެވެ.

ބުންޑެސްލީގާގައި ކުޅުނު އެހެން މެޗުތަކަށް ބަލާލާއިރު ޝާލްކޭ އަދި ބޮރޫޝިއާ މޮންޗެންގްލޭޑްބެކް ކުޅުނު މެޗު ނިމިފައިވަނީ 1-1 އިން އެއްވަރުވެގެންނެވެ. ވޮލްފްސްބާގް ވަނީ އަމިއްލަ ދަނޑުގައި 3-1 އިން ހެމްބާގް އަތުން ބަލިވެފައެވެ. އޮގްސްބާގް އަދި ހާތާ ބާލިން ކުޅުނު މެޗު ނިމިފައިވަނީ 2-2 އިން އެއްވަރުވެގެންނެވެ.

ބުންޑެސްލީގާގެ ތަށި ބަޔާންއިން ޔަގީންކޮށްފައިވާއިރު އެ ޓީމު އޮތީ ކުޅުނު 32 މެޗުން ލިބުނު 82 ޕޮއިންޓާއެކު ތާވަލުގެ އެއްވަނައިގައެވެ. ދެވަނައިގައި 57 ޕޮއިންޓާއެކު ޝާލްކޭ އޮތްއިރު ތިންވަނައިގައި 54 ޕޮއިންޓާއެކު އޮތީ ބޮރޫޝިއާ ޑޯޓްމަންޑްއެވެ.