ޔާމީން ރަޝީދުގެ މަރުގެ މައްސަލައިގެ ޝަރީއަތުގެ އަޑުއެހުންތަކަށް އާއިލާއަށް ވަދެވޭނެ ގޮތް ހަމަޖެއްސޭތޯ ބަލަނީ!
މިހަފްތާގައި ޔާމީންގެ އާއިލާއަށް ޕީޖީ އޮފީހުގައި ޕްރެސެންޓޭޝަނެއް އޮންނާނެ
ޕީޖީއާ ބައްދަލުކުރުމަށް މިއަދު ޕީޖީ އޮފީހަށް ޔާމީން ރަޝީދުގެ ބައްޕަ (ކ)އާއި މަންމަ އަދި ބައެއް ފަރާތްތައް ވަޑައިގެން، ޕީޖީ އޮފީހުގެ ބޭރުގައި މަޑު ކޮށްލައިގެން
ސޯޝަލް މީޑިއާ އެކްޓިވިސްޓް އަދި ލިޔުންތެރިޔާ ޔާމީން ރަޝީދު ލާއިންސާނީ އަނިޔާތަކާ އެކު މަރާލި މައްސަލައިގައި ދައުލަތުން ދައުވާ އުފުލާފައިވާ މީހުންގެ މައްޗަށް ހިންގާ ޝަރީއަތުގެ އަޑުއެހުންތަކަށް ޔާމީންގެ އާއިލާއާއި ގާނޫނީ ވަކީލަކަށް ވަނުމުގެ ފުރުސަތު ހޯއްދަވާ ދެއްވުމަށް މަސައްކަތް ކުރައްވާނެ ކަމަށް ޕްރޮސެކިއުޓަރ ޖެނަރަލް (ޕީޖީ) އާއިޝަތު ބިޝާމް ވިދާޅުވެއްޖެ ކަމަށް ޔާމީންގެ އާއިލާއިން ބުނެފި އެވެ.
މިހާރު ކްރިމިނަލް ކޯޓުގައި ކުރިއަށްދާ ޔާމީން ރަޝީދުގެ މަރުގެ މައްސަލާގައި ދައުލަތުން ދައުވާ އުފުލާފައިވާ މީހުންގެ މައްޗަށް ހިންގާ ޝަރީއަތުގެ އިބްތިތާއީ އަޑުއެހުންތައް ސިއްރު ކުރަމުންދާތީ ޔާމީން ރަޝީދުގެ އާއިލާގެ ފަރާތުންނާއި މަދަނީ ބައެއް ޖަމްއިއްޔާތަކުން ކަންބޮޑުވުން ފާޅުކޮށް، ޕީޖީ ބިޝާމްއާއި ބައްދަލުކުރެއްވުމަށް އެދިވަޑައިގެންނެވުމުން، އާދިއްތަ ދުވަހު މިވަނީ ބައްދަލަު ކުރައްވާފަ އެވެ. ނަމަވެސް ޕީޖީ ބިޝާމް ބައްދަލު ކުރެއްވީ ޔާމީން ރަޝީދުގެ މަންމަ އާއި ބައްޕައާ އެކަނި ކަމަށާއި އާއިލާގެ ގާނޫނީ ވަކީލު އަދި ޔާމީން މަރުގެ މައްސަލާގައި އިންސާފު ހޯދުމަށް މަސައްކަތްކޮށް، އަޑު އުފުލަމުންދާ އެއްވެސް މަދަނީ ޖަމްއިއްޔާއަކާ ބައްދަލު ކުރައްވާފައެއް ނުވެއެވެ.
އެ ބައްދަލު ވުމަށް ފަހު ޔާމީން ރަޝީދުގެ ބައްޕަ ހުސައިން ރަޝީދު ވިދާޅުވީ ޔާމީން ރަޝީދުގެ މަރުގެ މައްސަލައިގެ ދައުވާއާ ގުޅިގެން މިހާރު ކޯޓުގައި ކުރިއަށް ދަނީ އިބްތިދާއީ އަޑުއެހުންތަކެއް ކަމަށާއި އެއީ އެ އަޑުއެހުންތައް ސިއްރު ކުރި ނަމަވެސް މ،ައްސަލައިގެ ޝަރީއަތުގެ އަޑުއެހުން ފެށުމުން އާއިލާއަށާއި ގާނޫނީ ވަކީލަށް އަޑުއެހުންތަކަށް ވަނުމުގެ ފުރުސަތު ދެއްވާނެ ކަމަށް ޕީޖީ ބިޝާމް ވިދާޅުވި ކަމަށެވެ. އަދި އިބްތިދާއީ އަޑުއެހުންތައް ސިއްރުކޮށްފައި ވަނީ ދުނިޔޭގެ އެހެން ބައެއް ގައުމުތަކުގައިވެސް އެކަންކަން އެހެން ހިނގަމުން ދާތީ ކަމަށް ޕީޖީ ބިޝާމް ވިދާޅުވި ކަމަށް ވެސް ޔާމީންގެ ބައްޕަ ރަޝީދު ވިދާޅުވި އެވެ.
ޔާމީންގެ އާއިލާއާއެކު ޕީޖީ ބިޝާމްއާ ބައްދަލު ކުރެއްވުމަށް އާއިލާގެ ގާނޫނީ ވަކީލުގެ އިތުރުން މަދަނީ ބައެއް ޖަމްއިއްޔާތަކުން ދިޔަ ނަމަވެސް އެފަރާތްތަކާ ބައްދަލު ނުކުރީ މިވަގުތު މައުލޫމާތު ހިއްސާ ކުރެވެންއޮތީ ޔާމީންގެ އާއިލާއާ އެކަނިކަމަށާއި ނަމަވެސް ފަހުން މިމައްސަލާގައި ކަންބޮޑުވުން ފާޅުކުރަމުންދާ މަދަނީ ޖަމްއިއްޔާތަކާ ބައްދަލު ކުރައްވާނެ ކަމަށް ޕީޖީ ބިޝާމް ވިދާޅުވި ކަމަށް ރަޝީދު ވިދާޅުވި އެވެ.
މީގެއިތުރުން، ރަޝީދު ވިދާޅުވީ ކުރިއަށް އޮތް ހަފަތާގައި ޕީޖީ އޮފީހުގައި ޔާމީންގެ އާއިލާއާއި ގާނޫނީ ވަކީލަށް ހާއްސަކޮށް ބާއްވާ ޕްރެޒެންޓޭޝަނެއް ޕީޖީ އޮފީހުގައި އޮންނާނެ ކަމަށް ޕީޖީ ބިޝާމް ވިދާޅުވި ކަމަށެވެ.
ޔާމީންގެ އާއިލާއާއެކު ޕީޖީ ބިޝާމްއާ ބައްދަލު ކުރެއްވުމަށް ވަޑައިގެންވި ކުރިން އެޗްއާރުސީއެމްގެ ނާއިބު ރައީސްގެ ގޮތުގައި ހުންނެވި އަދި މިހާރު ޓްރާންސްޕޭރެންސީ މޯލްޑިވްސްގެ ސީނިއަރ ޕްރޮޖެކްޓް ކޯޑިނޭޓަރ އަހުމަދު ތޮލާލް ވިދާޅުވީ މިފަދަ އަނިޔާވެރި އަދި ރައްޔިތުންނާ ގުޅުންހުރި މައްސަލަތަކުގެ ޝަރީއަތުގެ އަދި އިބްތިދާއީ އަޑުއެހުންތައް މިފަދަ ގޮތަކަށް ސިއްރު ކުރަނީ ދުނިޔޭގެ ކޮންގައުމެއްގައި ކަމެއް އެނގިވަޑައި ނުގަންނަވާ ކަމަށާއި ނަމަވެސް ދުނިޔޭގެ ވަރަށް ގިނަ ގައުމުތަކުގައި މިފަދަ ރައްޔިތުންނާ ގުޅުން ހުރި ޝަރީއަތްތައް ކުރިއަށް ގެންދަނީ ސިއްރުކޮށްގެން ނޫން ކަމަށާއި ހުޅުވާލެވިގެން ކަމަށެވެ.
ތޮލާލު ވިދާޅުވީ ފުރަތަމަ މީގެ އެއް އަހަރު ކުރިން ޔާމީން ރަޝީދު މަރާލި މައްސަލައިގެ ތަހުގީގު ހިނގާދިޔައިރު ވެސް ކަންބޮޑުވާ ވަރަށް ގިނަ ކަންކަން ހުރި ކަމަށާއި އަދި ދައުލަތުން އެދިގެން ޝަރީއަތް ސިއްރު ކޮށްގެން ކުރިއަށް ގެންދާތީ މިމައްސަލައިގެ އެއްވެސް މަރުހަލާއެއްގައި އިންސާފު ލިބިގެން ހިނގައިދާނެ ކަމާ މެދު ޝައްކު އުފެދޭ ކަމަށެވެ.
ޔާމީން ރަޝީދުގެ އާއިލާގެ ފަރާތުން ވަނީ ޔާމީން މަރާލި މައްސަލައިގެ ޝަރީއަތުގެ އަޑުއެހުންތައް ހުޅުވާލައިގެން ކުރިއަށް ގެންގޮސް ދިނުމަށް ޕީޖީގެ އިތުރުން މޯލްޑިވްސް ޕޮލިސް ސާރވިސްގައި އެކަމަށް ބާރު އަޅާ ދިނުމަށް އެދިވަޑައިގަންނަވާފަ އެވެ. ނަމަވެސް ފުލުހުންގެ ފަރާތުން އެއްވެސް ޖަވާބެއް ލިބިފައިނުވާ ކަމަށް ޔާމީންގެ އާއިލާއިން ބުނެއެވެ. މީގެކުރިން އެފަރާތްތަކުން ވަނީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ މެމްބަރުންނާވެސް ބައްދަލު ކުރައްވާފަ އެވެ.
ޔާމީން މަރާލި މައްސަލައިގައި، ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ކުށުގެ ދައުވާ އުފުލައިފައި ވަނީ މ. އަންނާރުމާގޭ އިސްމާއިލް ހައިޝަމް ރަޝީދާއި، މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއިލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ އިތުރުން މ. އިރާސްމިކުގެ އަހުމަދު ޒިހާން އިސްމާއިލްގެ މައްޗަށެވެ.
ލާއިންސާނީ އަނިޔާތަކަކާ އެކު ޔާމީން ރަޝީދު މަރާލާފައި ވަނީ މިދިޔަ އަހަރުގެ އޭޕްރީލް މަހުގެ 22 ވަނަ ދުވަހުގެ ރޭގެ ދަންވަރުގެ ވަގުތެއްގައި، އޭނާ ދިރިއުޅޭ ގެއަށް ވަތްތަނާއެވެ.
