ކޮޕާ ޑެލް ރޭގެ ޗެމްޕިއަންކަން 30 ވަނަ ފަހަރަށް ބާސާއިން ހޯދައިފި

ސްޕެނިޝް ކޮޕާ ޑެލް ރޭ ނުވަތަ ސްޕެނިޝް ކަޕްގެ ޗެމްޕިއަންކަން ރެކޯޑު 30 ވަނަ ފަހަރަށް ބާސެލޯނާއިން ހޯދައިފިއެވެ.

ބާސާ މި ސީޒަނުގެ މުބާރާތުގެ ޗެމްޕިއަންކަން ހޯދީ ފައިނަލުގައި ސެވިއްޔާގެ މައްޗަށް ކުރި ހޯދައިގެންނެވެ. އެޓްލެޓިކޯ މެޑްރިޑްގެ އާ ސްޓޭޑިއަމް ކަމަށްވާ އެސްޓާޑިއޯ ވެންޑާގައި 67000 އަށްވުރެ ގިނަ ސަޕޯޓަރުންގެކުޅުނު ފައިނަލް މެޗު ބާސާއިން ކާމިޔާބުކުރީ 5-0 ގެ ނަތީޖާއަކުންނެވެ. މި މުބާރާތުގެ ފައިނަލްއިން ބާސާ ޖާގަ ހޯދީ ސެމީގައި 3-0 ގެ ނަތީޖާއަކުން ވެލެންސިއާ ބަލިކޮށްގެނެވެ. ހަމައެހެންމެ ސެވިއްޔާގެ ފައިނަލުގެ ޖާގައެއް ހޯދީ ސެމީގައި 3-1 އިން ލެގާނޭސް ބަލިކޮށްގެންނެވެ. ބާސާ އަދި ސެވިއްޔާގެ ފަރާތުން ވެސް މި މެޗުގައި ކުޅެން އަރުވާފައިވަނީ ވަރުގަދަ ފުރަތަމަ އެގާރައެކެވެ.

ފުރަތަމަ ހާފު ފެށިގެން ބާސާގެ ފަރާތުން ވަނީ މޮޅު ކުޅުމެއް ފެނިގެންގޮސްފައެވެ. ސެވިއްޔާއަށް ކުޅުމުގެ ފުރުސަތު އެ ޓީމުން ދީފައިނުވާއިރު އެ ޓީމުން ވަނީ ވަނީ ސެވިއްޔާގެ ގޯލާއި އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. އެގޮތުން އެ ޓީމުން ވަނީ މެޗުގެ 14 ވަނަ މިނެޓުގައި މެޗުގެ ފުރަތަމަ ލަނޑު ޖަހާ ލީޑު ނަގާފައެވެ. މި ލަނޑު ފިލިޕޭ ކުޓީނިއޯ ތަނަވަސްކޮށްދިން ފުރުސަތަކުން އެ ޓީމަށް ޖަހައިދިނީ ލުއިސް ސުއެރޭޒްއެވެ.

މި ލަނޑަށްފަހު ވެސް ބާސާއިން ފުލުފުލުގައި ހަމަލާތައް ފޮނުވާލަމުންދިޔައިރު އެ ޓީމުން ވަނީ މެޗުގެ 31 ވަނަ މިނެޓުގައި ލީޑު ފުޅާކޮށްފައެވެ. މި ލަނޑު އެ ޓީމަށް ޖަހައިދިނީ ލިއޮނެލް މެސީއެވެ. މެޗުގެ 40 ވަނަ މިނެޓުގައި ބާސާގެ ތިންވަނަ ލަނޑު މެސީ ތަނަވަސްކޮށްދިން ފުރުސަތަކުން އެ ޓީމަށް ޖަހައިދިނީ ސުއަރޭޒްއެވެ.

ތިން ލަނޑުގެ ލީޑެއްގައި އޮވެ ބާސާއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް ފުރަތަމަ ހާފެކޭ އެއްގޮތަށް އެ ޓީމުގެ ކޮންޓްރޯލް ދަމަހައްޓާފައެވެ. ނަތީޖާއެއްގެ ގޮތުން މެޗުގެ 52 ވަނަ މިނެޓުގައި އެ ޓީމުން ވަނީ އިތުރު ލަނޑެއް ޖަހާފައެވެ. މި ލަނޑު އެ ޓީމަށް ޖަހައިދިނީ ކެޕްޓަން އަންދްރޭސް އިނިއެސްޓާއެވެ. ސެވިއްޔޭގެ ކީޕަރުގެ ފަރާތުން ގިނަ ސޭވްތަކެއް މި މެޗުގައި ފެނިގެންދިޔައިރު ބާސާގެ ފަސް ވަނަ ލަނޑު ލިބުނު ޕެނަލްޓީއަކުން އެ ޓީމަށް ޖަހައިދިނީ ފިލިޕޭ ކުޓީނިއޯއެވެ.

މިއަހަރުގެ މުބާރާތާއެކު ބާސާއިން ވަނީ މި މުބާރާތުގެ ތަށި ޖެހިޖެހިގެން ހަތަރު ފަހަރު ހޯދާފައެވެ. މިއީ 1933 ވަނަ އަހަރުގެ ފަހުން މި މުބާރާތް ޖެހިޖެހިގެން ހަތަރު ފަހަރު ޓީމަކުން ކާމިޔާބުކުރި ފުރަތަމަ ފަހަރެވެ. ހަމައެހެންމެ މި މެޗުގައި ޖެހި ލަނޑާއެކު ސުއަރޭޒް ވަނީ އޭނާ ބާސާގެ ޖާޒީގައި ކުޅުނު ހުރިހާ ފައިނަލެއްގައި ވެސް ލަނޑު ޖަހާފައެވެ. މީގެއިތުރުން މެސީ ވެގެންގޮސްފައިވަނީ ކޮޕާ ޑެލް ރޭގެ ފަސް ފައިނަލެއްގައި ލަނޑު ޖެހި ދެވަނަ ކުޅުންތެރިޔާއަށެވެ.

ސްޕެނިޝް ލީގުގައިވެސް 83 ޕޮއިންޓާއިއެކު ތާވަލުގެ ކުރީގައި އޮތް ބާސެލޯނާއަށް ވަނީ މި ސިޒަނުގައި ކޮޕާ ޑެލްރޭގެ އިތުރުން ލީގު ކާމިޔާބު ކުރުމުގެ ފުރުސަތު ބޮޑުވެފައެވެ.