ކާންޔޭ ވެސްޓްގެ ދެ އަލްބަމެއް ޖޫންގައި

މަޝްހޫރު ލަވަކިޔުންތެރިޔާ އާއި ފެޝަން ޑިޒައިނަރު އަދި ޕްރޮޑިއުސަރު ކާންޔޭ ވެސްޓްގެ ދެ އަލްބަމެއް އަންނަ ޖޫން މަހު ރިލީޒް ކުރާނެކަން އިއުލާން ކޮށްފިއެވެ.

ކާންޔޭ ވެސްޓު ބުނެފައިވަނީ އަންނަ ޖޫންމަހު ރިލީޒް ކުރާނީ ޖޫން މަހުގެ 1 ގައި ނެރޭ ހަތް އަލްބަމުގެ ލަވައެކެވެ. ދެވަނަ އަލްބަމް ނެރޭނީ ޖޫން މަހުގެ 8 ވަނަ ދުވަހުގައި ލަވަކިޔުންތެރިޔާ އަދި އެކްޓަރ ކިޑް ކުޑީ އާއި ގުޅިގެން ނެރޭ އަލްބަމެކެވެ. އެ އަލްބަމުގެ ނަމަކީ ކިޑްސް ސީ ގޯސްޓެވެ.

ކާންޔޭ ޖޫންމަހުގެ 1 ގައި ނެރޭ އަލްބަމުގެ ނަން ހާމަކޮށްފައި ނުވިނަމަވެސް ޚަބަރުތައް ބުނާގޮތުގައި ހަތްލަވަ ހިމެނޭ އެ އަލްބަމްގެ ނަމަކީ ޓާބޯ ގްރެފިކްސް 16 އެވެ.

ކާންޔޭ އެނެމް ފަހުން އަލްބަމެއް ރިލީޒް ކޮށްފައިވަނީ 2016 ވަނަ އަހަރުގައެވެ. ދަ ލައިފް އޮފް ޕްބްލޯގެ ނަމުގައި 2016 ވަނަ އަހަރު އޭނާ ނެރުނު އަލްބަމަށް ފަހު އެ އަލްބަމަށް ޓުއާ އެއް ދޭން ސްޓޭޖް މަތީގައި މޮޔަ ވާހަކަތަކެއް ދެއްކުމުން އޭނާ ވަނީ އެފަހަރު ހޮސްޕިޓަލްގައި އެޑްމިޓްކުރުމަށް ފަހު ފަރުވާ ދީފައެވެ. ކާންޔޭ ވަނީ އެފަހަރު އޭނާ ދެމުންއައި ޓުއާ ކެންސަލްކޮށް ޓުއާގެ ޓިކެޓް ނެގިފަރާތްތަކަށް ރިފަންޑް ދީފައެވެ. އޭރު ރިޕޯޓް ކޮށްފައިވާގޮތުގައި ކާންޔޭއަށް ސްޓޭޖްމަތީގައި އެހެން ވީ އޭނާ މާބޮޑަށް ވަރުބަލިވުމުންނެވެ. އެހެންވެ ހޮސްޕިޓަލްގައި އެޑްމިޓްކުރީ ކަމަށް ވަނީ ރިޕޯޓްކޮށްފައެވެ. އޭނާއަށް ވަނީ ނަފްސާނީ މައްސަލަތަކަށް ހޮސްޕިޓަލުގައި ފަރުވާވެސް ދީފައެވެ.

އެމެރިކާގައި 2020 ވަނަ އަހަރު އޮންނަ ރިޔާސީ އިންތިޚާބުގައި ވާދަކުރާނެ ކަމަށް ބުނެފައިވާ ކާންޔޭ ވެސްޓު ނެރުނު ފުރަތަމަ އަލްބަމަކީ 2003 ގައި ނެރުނު ދަ ކޮލެޖް ޑްރޮޕްއައުޓް އެވެ.

ކާންޔޭ ނެރުނު އެހެން އަލްބަމްތަކަށް ބަލާއިރުލޭޓް ރެޖިސްޓްރޭޝަން (2005)، ގްރެޖުއޭޝަން (2007)، 808 އެންޑް ހާޓްބްރޭކް (2008)، މައި ބިއުޓިފުލް ޑާކް ޓްވިސްޓެޑް ފެންޓަސީ (2010)، ވޮޗް ދަ ތުރޯން (2011) އަދި ޔީޒަސް (2013) ހިމެނެއެވެ.

މިއުޒިކް އިންޑަސްޓްރީގައި ކާންޔޭ ވެސްޓް އޭނާގެ އަމިއްލަ ބްރޭންޑެއް ވެސް އުފައްދާފައެވެ. ހޮލީވުޑް އާޓިސްޓުންގެ މަސައްކަތުގެ އަގުވަޒަން ކުރުމަށްދޭ ލައިފްޓައިމް އެޗީވާ އެވޯޑް "އެމްޓީވީ މައިކަލް ޖެކްސަން ވިޑިއޯ ވެންގާޑް އެވޯޑް އޭނާ އަށް ވަނީ ލިބިފައެވެ.

މަޝްހޫރު ރިއަލިޓީޝޯ ކީޕިން އަޕް ވިތު ކާޑޭޝިއަންގެ ތަރިއެއް ކަމަށްވާ މަޝްހޫރު ތަރި ކިމް ކާޑޭޝިއަން އާއި ކައިވެނިކޮށްގެން އޭނާއަށް ވަނީ 3 ދަރިން ލިބިފައެވެ. އެއީ ނޯތު ވެސްޓް، ސެއިންޓް ވެސްޓް އަދި ޝިކާގޯ ވެސްޓެވެ.

2020 ވަނަ އަހަރު އެމެރިކާގެ ރިޔާސީ އިންތިޚާބުގައި ވާދަކުރާނެ ކަމަށް ކާންޔޭ ވެސްޓް އިއުލާން ކޮށްފައިވާއިރު ކަންޔޭ ވެސްޓް ވަނީ ސޯޝަލް މީޑިއާގައި އޭނާއަކީ ޑޮނަލްޑް ޓްރަމްޕްގެ ސަޕޯޓަރެއްކަމަށް ހާމަކޮށްފައެވެ. ކަންޔޭ ބުނެފައިވަނީ 2016 ވަނަ އަހަރުގެ އެމެރިކާގެ ރިޔާސީ އިންތިހާބުގައި އޭނާ ވޯޓު ނުދޭ ކަމަށެވެ. އެހެން ނަމަވެސް ވޯޓު ދިންނަމަ ވޯޓް ދޭނީ ޓްރަމްޕްއަށް ކަމަށް ވަނީ ބުނެފައެވެ.