ފިލްމީ ތަރި ޝާހިދު ކަޕޫރާއި އޭނާގެ އަންހެނުން މީރާ އަށް އަންހެން ދަރިއަކު ލިބުނީ މީގެ ދެއަހަރު ކުރިން 2016 ވަނަ އަހަރުގައެވެ. ޝާހިދުއާއި މީރާގެ ނަމާއި ގުޅުވައިގެން އެދަރިފުޅަށް ކިޔާފައިވަނީ މީޝާއެވެ.
މީރާ ދެވަނަ ދަރިއަކަށް ބަލިވެއިން ވާހަކަ މީޑިއާތަކުގައި ދައްކާތާ ދުވަސްކޮޅެއް ވެއްޖެއެވެ.
މީޝާ ލިބުނު ފަހުން ދެވަނަ ދަރިއަކު ބޭނުންވާ ކަމަށް މީރާ ބައެއް ޓީވީ އިންޓަވިއުތަކުގައި ވަނީ ބުނެފައެވެ. މީރާ ބަލިވެއިންކަމުގެ ހަބަރުތައް ދާދި ފަހުން ވަނީ މީޑިއާގައި ފެތުރިފައެވެ. މީރާ ބަލިވެއިންކަމަށް އަޑުތައް ފެތުރިފައިވާއިރު އޭނާ އާއި ޝާހިދު މިފަހަކަށް އައިސް އެކީގައި ނަގާފައިވާ ފޮޓޯތަކުން މީރާ ބަލިވެއިންކަމަށް ދަނީ ބުނަމުންނެވެ. އެފޮޓޯތަކުގައި މީރާގެ ބަނޑު ބޮޑުކަން ހާމަވެއެވެ.
މީރާ އިނީ ދެވަނަ ދަރިއަކަށް ބަލިވެއިންކަން ކަށަވަރުކޮށްދީފައިވަނީ ހޮނިހިރު ދުވަހުގައެވެ. މީރާ އިނީ ބަލިވެކަން ކަށަވަރު ކޮށްފައިވާއިރު މީރާއާއި ޝާހިދުގެ އިންސްޓަގްރާމްގައި އެކަން އިއުލާންކޮށްފައި ވަނީ ތަފާތު ގޮތަކަށެވެ.
އެގޮތުން މީޝާގެ ފޮޓޯއެއް ޝާހިދު ލާފައިވާ އިންސްޓަގްރާމް ފޮޓޯގައި ބުނެފައިވަނީ "ބިގް ސިސްޓާ" ކަމަށެވެ. އޭގެ މާނައަކީ މީޝާއަށް ދައްތަކިޔާނެ ކުއްޖަކު ލިބެނީއެވެ.
ޝާހިދު، 37، އާއި މީރާ، 22، ކައިވެނި ކުރީ 2015 ގަ އެވެ. ޝާހިދު މީގެ ކުރިން ދީފައިވާ އިންޓަވިއުއެއްގައި ބުނެފައިވަނީ ދެވަނަ ދަރިއަކު ހޯދުމަށް އޭނާ ޕްލޭން ކޮށްފައި ނުވާކަމަށާއި އެހެން ނަމަވެސް ދެވަނަ ދަރިއަކަށް އޭނާއާއި މީރާ "ރެޑީ" ކަމަށެވެ. މީރާއާ ބައްދަލުވީ އެއްވެސް މީހަކާ ރައްޓެހި ނުވެ ހުންނަތާ ހަތަރު ވަރަކަށް އަހަރު ފަހުން ކަމަށާއި އޭރު އޭނާ އުޅެމުން ދިޔައީ ވަރަށް އެކަނިވެރި ދިރިއުޅުމެއް ކަމަށް ޝާހިދު ވަނީ ބުނެފައެވެ. މީރާގެ ކައިވެނި ހަމަޖައްސައިދިނީ މައިންބަފައިން ކަމަށާއި މީރާއާ ފުރަތަމަ ބައްދަލުކުރަން ދިއްލީ އަށް ދިޔައިރު ވެސް އެއީ އޭނާއާ ކައިވެނިކުރަން އަންނަ މީހެއްކަމެއް މީރާ ވެސް ނުދެނަހުރި ކަމަށެވެ. ނަމަވެސް ދެމީހުންގެ ފުރަތަމަ ބައްދަލުވުމުގައި ވެސް އެކަކު އަނެކަކާ ހިތްހަމަޖެހޭ ގިނަ ސިފަތަކެއް ފާހަގަކުރެވުނުކަން ޝާހިދު އާއި މީރާ ވަނީ ކޮފީ ވިތު ކަރަންގެ ޝޯގައި ބުނެފައެވެ. ޝާހިދު އެންމެ ފަހުން ފެނިގެންދިޔަ ހިންދީ ފިލްމު ޕަދްމާވަތު ގައި ޝާހިދު ކުޅުނު ރޯލުން މި އަހަރުގެ ދާދާސާހެބް ޕާލްކޭ އެކްސެލެންސް އެވޯޑް ވެސް އޭނާ އަށް ދޭން ވަނީ ނިންމައިފަ އެވެ.
