ރަޝިޔާއާ ދެކޮޅަށް އެޅިކަމަށް ބުނާ ދަތިކުރުމުގެ ފިޔަވަޅުތަކާ މެދު ސަފީރާއި ވައިޓް ހައުސްގެ ބަސް ތަފާތު!
މިމައްސަލައަކީ ވެސް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ މެދުގައި އޮތް ބައިބައިވުން ފެނިގެންދާ މިސާލެއް
އެމެރިކާ އިން އދ. އަށް ކަނޑާއަޅާފައި ހުންނަވާ ސަފީރު ނިކީ ހޭލީ
ސޫރިޔާގެ އިރުމަތީ ޣޫތާގެ ދޫމާ އަވަށަށް ސަރުކާރު ސިފައިން ދިން ކެމިކަލް ހަމަލާގެ މައްސަލައިގައި ސޫރިޔާގެ ރައީސް ބައްޝާރުލް އައްސަދުގެ ސަރުކާރާ ގުޅުން ބާއްވާ ރަޝިޔާގެ ކުންފުނިތަކާ ދެކޮޅަށް ދަތިކުރުމުގެ ފިޔަވަޅު އަޅަން އުޅޭ ކަމަށް އެމެރިކާ އިން އދ. އަށް ކަނޑައަޅާފައި ހުންނަވާ ސަފީރު ނިކީ ހޭލީ ވިދާޅުވުމުން، ރިޔާސީ ގަނޑުވަރު ވައިޓް ހައުސްގެ އޮފިޝަލަކު އެކަން ދޮގުކުރައްވައިފިއެވެ.
ރައީސް ޑޮނަލްޑް ޓްރަމްޕްގެ އިޤްތިޞާދީ މުޝީރު ލެރީ ކުޑްލޯ ވިދާޅުވީ ސަފީރު ހޭލީއަށް އޮޅުމެއް އެރީ ކަމަށާއި، ރަޝިޔާއާ ދެކޮޅަށް މިހާރު ވެސް އަޅާފައިވާ ދަތިކުރުމުގެ ފިޔަވަޅުތަކުގެ އިތުރަށް ފިޔަވަޅެއް އަޅަން ނޫޅޭ ކަމަށެވެ. އެހެން ނަމަވެސް ހޭލީ ވަނީ އެކަމަނާއަކީ އޮޅުން އަރާ ބޭފުޅެއް ނޫން ކަމަށް ވިދާޅުވެ، ވައުޓް ހައުސްގެ މުޝީރު ކުޑްލޯއަށް ރައްދު ދެއްވާފައެވެ.
އދ. ގެ ސަލާމަތީ މަޖިލީހުގައި ވާހަކަ ދައްކަވަމުން ހޭލީ ވިދާޅުވީ ރަޝިޔާގެ ބައެއް ކުންފުނިތަކާ ދެކޮޅަށް ދަތިކުރުމުގެ ފިޔަވަޅު އަޅަން އެމެރިކާ އޮތީ ތައްޔާރަށް ކަމަށާއި، އެފިޔަވަޅުތަކާ އެކު ރަޝިޔާ އަށް ވަރުގަދަ މެސެޖެއް ދެވޭނެ ކަމަށެވެ. ހޭލީ މިހެން ވިދާޅުވުމުން ޓްރަމްޕް ކޯފާ އިސްކުރެއްވި ކަމަށް އޮފިޝަލުންނާ ހަވާލާދީ ރިޕޯޓްތައް ބުނެއެވެ.
ހޭލީއަށް އޮޅުމެއް އެރީ ކަމަށް ކުޑްލޯ ވިދާޅުވުމާ ގުޅިގެން ކުޑްލޯ ވެސް ހިތްޕުޅު ހަމަޖެހިވަޑައިނުގެން މީޑިއާތަކަށް އިންޓަރވިއު ދެއްވުމުން ކުޑްލޯ ވަނީ މަޢާފަށް އެދިވަޑައިގެންފައެވެ. އަދި ހޭލީއަށް ސިޔާސަތަށް ގެނެވުނު ބަދަލުގެ މައުލޫމާތު ވައިޓް ހައުސް އިން ދީފައި ނުވަނީ ކަމަށް އޭނާ ވިދާޅުވިއެވެ.
މުހައްލިލުން ބުނާ ގޮތުގައި މިމައްސަލައަކީ ވެސް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ މެދުގައި އޮތް ބައިބައިވުން ފެނިގެންދާ މިސާލެކެވެ.
