އޭވީސީ ބީޗް ވޮލީ ޓުއަރގައި ވާދަކުރުމަށް ރާއްޖޭގެ ޓީމު ތައިލެންޑަށް

އޭޝިއަން ވޮލީބޯލް ކޮންފެޑެރޭޝަން (އޭވީސީ) ގެ ބީޗް ވޮލީބޯލް ޓުއަރގައި ވާދަކުރުމަށް ރާއްޖޭގެ ޓީމު ތައިލެންޑަށް ފުރައިފިއެވެ.

މިފަހަރުގެ މުބާރާތުގައި ރާއްޖޭ ތަމްސީލުކުރާނީ ތަޖުރިބާކާރު ކުޅުންތެރިންގެ މައްޗަށް އެކުލެވޭ ދެ ޕެއާއެވެ. ފުރަތަމަ ޕެއާގައި އިސްމާއިލް ސާޖިދު (ކުޑަކާއްޓޭ) އަދި އަޝްފާގް އާދަމް (އައްކަޅޭ) ގެ މައްޗަށް އެކުލެވޭއިރު ދެވަނަ ޕެއާގައި ހިމެނެނީ ޝިއުނާޒް އަބްދުލް ވާހިދު އަދި މުހައްމަދު އަލީއެވެ. ރާއްޖޭގެ ޓީމުގެ ކޯޗުގެ ގޮތުގައި މިފަހަރު ހަރަކާތްތެރިވާނީ ތަޖުރިބާކާރު ކޯޗު އަބްދުﷲ ނަޝީދުއެވެ.

ބީޗް ވޮލީ ޓީމު ތައިލެންޑަށް ފުރާފައިވާއިރު ރާއްޖޭގެ ސީނިއާ ވޮލީ ޓީމު ވެސް އަންނަނީ މި މަހުގެ 19 ގައި ބަންގްލަދޭޝްގެ ޗިޓަގޮންގްގައި ފަށާ އޭވީސީ ސީނިއާ މެންސް ވޮލީބޯލް މުބާރާތައް ތައްޔާރުވުމަށް އެ ގައުމުގައި ޓްރެއިނިން ކޭމްޕެއް ފުރިހަމަކުރަމުންނެވެ. ބީޗް ވޯލީ ޓީމުގައި ހިމެނޭ ކުޑަކާއްޓޭ އަދި އައްކަޅޭ އަކީ ސީނިއާ ޓީމަށް ވެސް ގަވާއިދުން ކުޅެމުން އަންނަ ކުޅުންތެރިންނެވެ. އެހެން ނަމަވެސް މިފަހަރުގެ ސީނިއާ ޓީމުން މި ދެ ކުޅުންތެރިންނަށް ފުރުސަތު ލިބިފައެއް ނުވެއެވެ.

ބީޗް ވޮލީ ޓުއަރ އަށް ޓީމުތައް ފުރުމުގެ ކުރިން ވޮލީބޯލް އެސޯސިއޭޝަނުގެ ރައީސް މުހައްމަދު ލަތީފު ވަނީ ކުޅުންތެރިންނާއި ބައްދަލުކޮށް ހިތްވަރު ދެއްވާފައެވެ.

ތައިލެންޑްގެ ހަޓްޔައިގައި ކުރިޔަށްދާ މި މުބާރާތުގައި 14 ވަނަ ދުވަހު އޮންނާނީ ކޮލިފައިން ބުރެވެ. އެއަށް ފަހު މެއިން ޑްރޯ އޮންނާނީ މި މަހުގެ 15 އިން 17 އަށެވެ.