ބަރ ކައުންސިލެއް އުފައްދަން ދެންނެވިން، މިއީ އިސްލާހުކުރަން ރަނގަޅު ވަގުތެއް: ފާއިޒު
ވަކީލުންގެ ކަންކަން ބެލެހެއްޓުން ސުޕްރީމް ކޯޓުގެ ދަށަށް ގެންނަން ކުރިންވެސް އުޅުނު
ކުރީގެ އުއްތަމަ ފަނޑިޔާރު އަހްމަދު ފާއިޒު ހުސެއިން:- އެމަނިކުފާނު ވަނީ ކަންކަން އިސްލާހް ކުރަން އެދިވަޑައިގެންފަ
ގާނޫނެއްގެ ދަށުން ވަކީލުންގެ ކަންކަން ރެގިއުލޭޓްކުރުމަށް ބަރ ކައުންސިލެއް އުފައްދަން ބަންޑާރަ ނައިބުގެ މަގާމާ މުހައްމަދު އަނިލް ހަވާލުވެވަޑައިގެންނެވި ފަހުން ބައްދަލުވި ފުރަތަމަ ދުވަހުވެސް އެދިވަޑައިގެންނެވި ކަމަށް ކުރީގެ އުއްތަމަ ފަނޑިޔާރު އަހްމަދު ފާއިޒު ހުސެއިން ވިދާޅުވެއްޖެ އެވެ.
ވަކީލުންނާބެހޭ ގާނޫނު ޑްރާފްޓްކޮށްފައިވާ ގޮތުން ވަކީލުންގެ އިދާރީ ކަންކަން ބަލަމުންދަނީ "ބަރ ކައުންސިލް"އެއްގެ ދަށުން ކަމަށް ބަންޑާރަ ނައިބު އަނިލް އަދިއްތަ ދުވަހުގެ ރޭ ވިދާޅުވުމާއެކު ފާއިޒުވަނީ އެކަމާ ގުޅޭ ގޮތުން ވާހަކަ ދައްކަވާފަ އެވެ. މިހާރު ހިނގަމުންދާ ބައެއް ކަންކަމަށް އިޝާރާތް ކުރައްވައި ފާއިޒު ވިދާޅުވެފައިވަނީ "އޮނިގަނޑަށް ނުފެތި ކުރަމުން އަންނަ ކަންކަން އިސްލާހް ކުރަން މިއީ ރަނގަޅު ވަގުތެއް" ކަމަށެވެ.
އެ މަނިކުފާނުގެ ފޭސްބޫކް ޕޭޖުގައި ލިޔުއްވާފައިވާ ގޮތުގައި ވަކީލުންގެ ކަންކަން ބެލެހެއްޓުމަށް ބަރ ކައުންސިލެއް އުފައްދަން މީގެ ހަތަރު އަހަރު ކުރިން އުއްތަމަ ފަނޑިޔާރުގެ މަގާމުގައި ހުންނަވައިގެން އަނިލް ގާތު އެދިވަޑައިގެންނެވުމުން އެ ދުވަހު އޭނާ ވިދާޅުވީ ވަކީލުންނާބެހޭ ގާނޫނެއް ޑްރާފްޓްކޮށްފައިވާ ވާހަކަކަމަށާއި ވަރަށް އަވަހަށް އެ ގާނޫނު ރައްޔިތުންގެ މަޖިލީހަށް ހުށަހަޅުއްވާނެ ވާހަކަ ކަމަށެވެ.
އާދިއްތަ ދުވަހުގެ ރޭ 175 ވަކީލުން ހުވާކުރުމަށް ބޭއްވި ރަސްމިޔާތުގައި ވެސް ވަކީލުންނާއި ބެހޭ ގާނޫނެއް ހެދުމަށް އޭގެ ޑްރާފްޓް ތައްޔާރު ކުރަމުންދާ ކަމަށާއި މިހާރު އެ މަސައްކަތްކުރާތާ ދެތިން އަހަރުވެއްޖެ ކަމަށް އަނިލް ވަނީ ވިދާޅުވެފަ އެވެ.
ފާއިޒު ވިދާޅުވީ ވަކީލުންގެ އާންމު އިދާރީ ކަންކަން ބަރ ކައުންސިލެއްގެ ދަށުން ކުރިއަށް ގެންދަން އެދުވަހު ހުށަހެޅުއްވީ އޭނާ ނެތް ދުވަހެއްގައި ވަކީލުންގެ އާންމު އިދާރީ ކަންކަން ޖުޑިޝަރީގެ ދަށަށް ގެންނާނެކަން އެނގިވަޑައިގަންނަވާތީ ކަމަށެވެ. އަދި އޭރުވެސް ވަކީލުންގެ ކަންކަން ރެގިއުލޭޓްކުރުމުގެ ވިސްނުން ބައެއް ބޭފުޅުންގެ ހުރީތީ ކަމަށްވެސް ވިދާޅުވެފައިވެ އެވެ. އޭގެ އެއް މިސާލެއްގެ ގޮތުގައި ފާއިޒު ވިދާޅުވީ އުއްތަމަ ފަނޑިޔާރުގެ މަގާމުގައި އެމަނިކުފާނު ހުންނެވިއިރު އެއްފަހަރަކު ސުޕްރީމް ކޯޓު ހިންގުން ވަކި ބޭފުޅަކާ ހަވާލު ކުރެއްވުމަށްފަހު ރާއްޖެއިން ބޭރަށް ރަސްމީ ދަތުރެއްގައި ވަޑައިގެން އެނބުރި މާލެ ވަޑައިގެންނެވިއިރު ވަކީލުން ރެގިއުލޭޓްކުރުމުގެ ކަންކަން ސުޕްރީމް ކޯޓުގެ ދަށަށް ގެންދިއުމަށް އެޓާނީ ޖެނަރަލް އޮފީހުގެ އޭރުގެ ބައެއް އިސްވެރިންނާ އޮތީ މަޝްވަރާ ކުރެވިފައި ކަމަށެވެ. އަދި އޭގެ ފަހުންވެސް އެކަން ކުރުމަށް އެމަނިކުފާނުގެ އުއްތަމަ ފަނޑިޔާރުގެ މަގާމުގައި ހުންނެވިއިރުވެސް ކުރެވުނު ކަމަށް ފާހަގަ ކުރައްވާފައިވެ އެވެ.
މީގެ އިތުރުންވެސް ފާއިޒު ވިދާޅުވެފައި ވަނީ ޖަސްޓިސް މިނިސްޓްރީ އުވާލައި، އެ މިނިސްޓްރީގެ ބައެއް މަސައްކަތްތައް އޭޖީ އޮފީހުންކުރާ ގޮތަށް ބަދަލު ކުރެވިގެން ދިޔަ އިރުވެސް ކޯޓުތަކުގައި ވަކާލާތު ކުރައްވާ ވަކީލުންގެ ދަފްތަރު ބެލެހެއްޓުން ފިޔަވާ ވަކީލުންގެ އާންމު އިދާރީ ކަންކަން ކޯޓުން ކުރާ ގޮތަށް ކުރިން ހަމަ ޖެހިފައި ނޯންނާނެ ކަމަށެވެ.
ޖުޑިޝަލް އެޑިމިނިސްޓޭޝަނުން ކުރީގެ ޖަސްޓިސް މިނިސްޓްރީގެ ދައުރު އަދާކުރާ ގޮތަކަށްވެސް ނޯންނާނެ ކަމަށްވެސް އެ މަނިކުފާނު ވަނީ ފާހަގަ ކުރައްވާފަ އެވެ. އެހެން ނަމަވެސް މިހާރު ވަކީލުން ސަސްޕެންޓް ކުރުމާއި ވަކީލުންނާއި މެދު ފިޔަވަޅު އެޅުމާއި އަދި ވަކީލުންނަށް ހުއްދަ ދިނުން ފަދަ ކަންކަން ހިނގަމުންދަނީ ސުޕްރީމް ކޯޓާއި ސުޕްރީމް ކޯޓުގެ ދަށުން ހިނގަމުން އަންނަ ޖުޑިޝަލް އެޑްމިނިސްޓްރޭޝަނުންނެވެ.
ފާއިޒުވަނީ މިއީ އެފަދަ ކަންކަން ރަނގަޅު ކުރަން ރަނގަޅު ވަގުތެއް ނޫންތޯ ސުވާލު ކުރައްވާފަ އެވެ.
