އެންމެ އަގުބޮޑު ސީރީޒްއަކަށް ލޯޑް އޮފް ދަ ރިންގްސް

"ދަ ލޯޑް އޮފް ދަ ރިންގްސް" ސީރީޒްއަކަށް ބަދަލު ކުރަން އުޅޭ ކަމަށް އެ ފިލްމު އުފައްދާ އެމެޒޯން ސްޓޫޑިއޯއިން ހާމަ ކޮށްފައިވަނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ.

މި ފިލްމަށް ސީރީޒްއެއް އުފެއްދުމުގެ މަސައްކަތް މިހާރު ކުރަމުންދާއިރު ޓްރޭޑް އެނަލިސްޓުން ބުނަމުންދަނީ މި ފިލްމު އުފައްދަން އެމެޒޯން އިން އެއް ބިލިއަން އެމެރިކާ ޑޮލަރު ހޭދަކުރާނެކަމަށެވެ. އެހެން ކަމަށްވާނަމަ މި ސީރީޒް ވެގެންދާނީ މިހާތަނަށް އެމެރިކާގައި އުފެއްދި އެންމެ އަގުބޮޑު ސީރީޒްއަށެވެ.

ލޯޑް އޮފް ދަ ރިންގްސް ސީރީޒްއެއްގެ ގޮތަށް ގެންދާނީ ފަސް ސީޒަނަކަށް ބަހާލައިގެންނެވެ. މިސީރީޒް ޝޫޓުކުރަން ފަށާފައެއް ނުވެއެވެ.

މި ސީރީޒް ހެދުމަށް ވަނީ ފޮތްތަކާއި ފިލްމު ފްރެންޗައިޒް ރައިޓްސް ވެސް ގަނެފައެވެ. އެއީ މިސީރީޒްގެ އަގު މަތިވެގެން ދިޔަ ސަބަބެއް ކަމަށް ޓްރޭޑް އެނަލިސްޓުން ވަނީ ބުނެފައެވެ.

ދަ ލޯޑް އޮފް ދަ ރިންގްސް އަކީ ޕީޓާ ޖެކްސަން ޑައިރެކްޓް ކޮށްފައިވާ ކާމިޔާބު ފްރަންޗައިޒް ފިލްމުތަކެކެވެ. ދަ ލޯޑް އޮފް ދަ ރިންގްސްގެ ތިން ފިލްމެއް މިހާތަނަށް ވަނީ ދައްކާފައެވެ. އެއީ ފެލޯޝޮފް އޮފް ދަ ރިންގްސް (2001)، ދަ ޓޫ ޓަވާޒް (2002) އަދި ދަ ރިޓާން އޮފް ދަ ކިންގް (2003) އެވެ.

މީގެ އިތުރުން ހޮބިޓްގެ ނަމުގައި މި ފްރަންޗައިޒްގެ އިތުރު ތިން ފިލްމެއް ލޯޑް އޮފް ދަ ރިންގްސް ގެ ޕްރިއެކްއެލްތަކެއްގެ ގޮތުގައި ޕީޓާ ވަނީ ގެނެސްދީފައެވެ. ޕީޓާ ޑައިރެކްޓް ކޮށްފައިވާ އެ ތިން ފިލްމަކީ އޭން އަންއެކްސްޕެކްޓެޑް ޖަރނީ (2012)، "ދަ ޑިޒޮލޭޝަން އޮފް ސްމޯގް (2013) އަދި ދަ ބެޓްލް އޮފް ދަ ފައިވް އާމީޒް (2014) އެވެ.