ޝާހިދު ކަޕޫރަށް ދެވަނަ ދަރިއަކު ލިބެނީ؟

ފިލްމީ ތަރި ޝާހިދު ކަޕޫރާއި އޭނާގެ އަންހެނުން މީރާ އަށް އަންހެން ދަރިއަކު ލިބުނީ މީގެ ދެއަހަރު ކުރިން 2016 ވަނަ އަހަރުގައެވެ.

މީޝާ ކަޕޫރު އުފަންވީ 2016 ވަނަ އަހަރުގެ އޮގަސްޓު މަހުގެ 26 ގައެވެ.

މީޝާ ލިބުނު ފަހުން ދެވަނަ ދަރިއަކު ބޭނުންވާ ކަމަށް މީރާ ބައެއް ޓީވީ އިންޓަވިއުތަކުގައި ވަނީ ބުނެފައެވެ. މީރާ ބަލިވެއިންކަމުގެ ހަބަރުތައް ދާދި ފަހުން ވަނީ މީޑިއާގައި ފެތުރިފައެވެ. މީރާ ބަލިވެއިންކަމަށް އަޑުތައް ފެތުރިފައިވާއިރު އޭނާ އާއި ޝާހިދު މިފަހަކަށް އައިސް އެކީގައި ނަގާފައިވާ ފޮޓޯތަކުން މީރާ ބަލިވެއިންކަމަށް ދަނީ ބުނަމުންނެވެ. އެފޮޓޯތަކުގައި މީރާގެ ބަނޑު ބޮޑުކަން ހާމަވެއެވެ.

ޝާހިދުވެސް ދާދިފަހުން ދީފައިވާ އިންޓަވިއުއެއްގައި ބުނެފައިވަނީ މީރާއަށް އަދި 22 އަހަރު ކަމަށާއި ދެމީހުން ދެވަނަ ދަރިއަކަށް ތައްޔާރު ވަމުންދާކަމަށެވެ. އަދި މީރާ ބޭނުންކަމެއް ކުރުމަށް އޭނާއަށް ހުއްދަ އޮންނާނެކަމަށް ޝާހިދު ވަނީ އެ އިންޓަވިއުގައި ބުނެފައެވެ. ޝާހިދަށް ވުރެ 13 އަހަރު މީރާ ހަގެވެ. އެދެމީހުން ކައިވެނިކޮށްފައި ވަނީ 2015 ވަނަ އަހަރުއެވެ.

ޝާހިދު މީގެ ކުރިން ދީފައިވާ އިންޓަވިއުއެއްގައި ބުނެފައިވަނީ ދެވަނަ ދަރިއަކު ހޯދުމަށް އޭނާ ޕްލޭން ކޮށްފައި ނުވާކަމަށާއި އެހެން ނަމަވެސް ދެވަނަ ދަރިއަކަށް އޭނާއާއި މީރާ "ރެޑީ" ކަމަށެވެ. މީރާއާ ބައްދަލުވީ އެއްވެސް މީހަކާ ރައްޓެހި ނުވެ ހުންނަތާ ހަތަރު ވަރަކަށް އަހަރު ފަހުން ކަމަށާއި އޭރު އޭނާ އުޅެމުން ދިޔައީ ވަރަށް އެކަނިވެރި ދިރިއުޅުމެއް ކަމަށް ޝާހިދު ވަނީ ބުނެފައެވެ. މީރާގެ ކައިވެނި ހަމަޖައްސައިދިނީ މައިންބަފައިން ކަމަށާއި މީރާއާ ފުރަތަމަ ބައްދަލުކުރަން ދިއްލީ އަށް ދިޔައިރު ވެސް އެއީ އޭނާއާ ކައިވެނިކުރަން އަންނަ މީހެއްކަމެއް މީރާ ވެސް ނުދެނަހުރި ކަމަށެވެ. ނަމަވެސް ދެމީހުންގެ ފުރަތަމަ ބައްދަލުވުމުގައި ވެސް އެކަކު އަނެކަކާ ހިތްހަމަޖެހޭ ގިނަ ސިފަތަކެއް ފާހަގަކުރެވުނުކަން ޝާހިދު އާއި މީރާ ވަނީ ކޮފީ ވިތު ކަރަންގެ ޝޯގައި ބުނެފައެވެ.