ފަސް އަހަރުގެ ޖަލުގެ ހުކުމެއް ކޮށްފައިވާ އިންޑިއާގެ ތަރި، ސަލްމާން ޚާން ކަފާލާތުގެ ދަށުން ޖޯދުޕޫރު ކޯޓުން ދޫކުރުމާ އެކު މުމްބާއީ އަށް ހިނގައްޖެއެވެ.

"ހަމް ސާތު ސާތު ހޭ"ގެ ޝޫޓިންގގެ ތެރޭގައި1998 ވަނަ އަހަރު، ހިމާޔަތް ކޮށްފައިވާ ފުއްލާ ވައްތަރެއް ކަމަށްވާ 'ބްލެކްބަކް' ކިޔާ ޖަނަވާރުގެ ދޭތި މަރާލުމުގެ ކުށް ސަލްމާންގެ މައްޗަށް ސާބިތުވެ، ފަސް އަހަރަށް ޖަލަށް ހުކުމް ކޮށްފައި ވަނީ މިދިޔަ ބުރާސްފަތި ދުވަހެވެ. އަދި އޭނާ ކަފާލާތުގެ ދަށުން މިނިވަން ވެފައި ވަނީ ހޮނިހިރު ދުވަހެވެ. ދެން މި މައްސަލައިގެ އަޑު އެހުމެއް އޮންނާނީ މޭ މަހުގެ 7 ވަނަ ދުވަހެވެ.

ޖޯދުޕޫރު ސެންޓްރަލް ޖަލުގައި ދެ ދުވަސް ހޭދަ ކުރުމަށް ފަހު، މިނިވަން ވުމުން ސަލްމާން ވަނީ ވަގުތުން މުމްބާއީ އަށް ދަތުރުކޮށްފައެވެ. އޭނާ އެއާޕޯޓުން ނިކުތީ ކޮއްކޮ އަޕްރިތާގެ ދަރިފުޅު، އާހިލް ގޮވައިގެންނެވެ. މުމްބާއީގައި ހުންނަ އޭނާ ދިރިއުޅޭ ގެލެކްސީ އެޕާޓްމަންޓްސް ކައިރީގައި އޭނާގެ ގިނަ ސަޕޯޓަރުންތަކެއް ޖަމާވި އިރު، ސަލްމާން ވަނީ ގެއަށް ދިއުމަށް ފަހު އެމީހުންނަށް ޝުކުރު އަދާ ކުރުމުގެ ގޮތުން ބެލްކަނީއަށް ނިކުމެފައެވެ.

ސަލްމާން ޚާނަކީ ބޮލީވުޑްގެ ބޮކްސް އޮފީހަށް ބަލާއިރު އެންމެ ކާމިޔާބު އެއް ތަރިއެވެ. ފިލްމީ ދާއިރާގައި އޭނާ މަސައްކަތް ކުރާތާ ގާތްގަނޑަކަށް 30 އަހަރު ވެފައިވާ އިރު، އޭނާއަކީ ޗެރިޓީ ގިނަ މަސައްކަތް ވެސް ކުރާ މީހެކެވެ.

ނަމަވެސް، ފާހަގަ ކޮށްލެވުނު ކަމަކީ، މި ކަންތައް ގަނޑުގައި ބޮލީވުޑްގެ 'ބޮޑެތި' ފަރާތްތަކެއް ހިމޭނުން ތިބި ކަމެވެ. ސޯޝަލް މީޑިއާގައި ހިޔާލު ފާޅުކޮށް އުޅޭ ފަރާތްތައް ކަމަށްވާ އަމީތާބު ބައްޗަން، ޝާހް ރުކް ޚާން، އާމިރު ޚާން، ޖާވިދު އަޚްތަރު އަދި ޝަބާނާ އަޒްމީ ފަދަ ފަރާތްތަކުން ވެސް އަދި މިކަމާ ގުޅޭ ގޮތުން ބަހެއް ބުނެފައެއް ނުވެއެވެ.

އަމީތާބު ބަހެއް ބުނެފައި ނުވި ނަމަވެސް، އޭނާގެ އަންހެނުން ޖަޔާ ވަނީ ސަލްމާންގެ ދިފާއުގައި ވާހަކަ ދައްކާފައެވެ. ޖަޔާ ބުނީ ސަލްމާނަށް ދީފައިވާ އަދަބު "މާ ވަރުގަދަ"ކަމަށާއި، އޭނާ އިންސާނިއްޔަތަށް ކޮށްދީފައިވާ ހުރި މަސައްކަތްތަކަށް ބަލާލަން ޖެހޭ ކަމަށެވެ.

ސަލްމާނާ އެކު "ހަމް ސާތު ސާތު ހޭ" އިން ފެނިގެން ދިޔަ ސައިފް އަލީ ޚާން، ސޮނާލީ ބެންދްރޭ، ތާބޫ އަދި ނީލަމްގެ މައްޗަށް ވެސް ވަނީ ދައުވާކޮށްފައެވެ. ނަމަވެސް ސަލްމާންގެ މައްޗަށް ކުށް ސާބިތުވި އިރު، މި މީހުން ވަނީ ސަލާމަތް ވެފައެވެ.  އެއިން އެއްވެސް މީހެއް ވެސް އަދި މިކަމާ ގުޅޭ ގޮތުން ވާހަކަ ދައްކާފައެއް ނުވެއެވެ. ނަމަވެސް ނީލަމްގެ ފިރިމީހާ ސާމިރު ސޯނީ ބުނެފައި ވަނީ "ނީލަމް އާއި ދެން ތިބި މީހުނަށް ވަރަށް އުފާވެރި" ކަމަށާއި ސަލްމާނަށް ވަކި ގޮތެއް ހަދަންވީ ސަބަބެއް ނުވިސްނޭ ކަމަށެވެ. އަދި މައްސަލައަކީ ސަލްމާންގެ "ސެލެބްރިޓީ ސްޓޭޓަސް"ކަމާއި މައްސަލައިގެ ފުރިހަމަ އިންސާފު ނުލިބޭ ކަމަށް އޭނާ ބުންޏެވެ.

މި މައްސަލައިގެ ތެރޭގައި ސަލްމާނަށް ތާއީދު ފާޅު ކުރި ތަރިންގެ ތެރޭގައި، އަދްނާން ސާމީ، ސޮނާކްޝީ ސިންހާ، ސޯނަމް ކަޕޫރު، ޕްރިތީ ޒިންތާ، ބޮބީ ޑިއޮލް، ޖެކްލީން ފަނޭންޑަޒް ހިމެނެއެވެ. މީގެ އިތުރުން، ގިނަ ތަރިންތަކެއް ވަނީ ސަލްމާންގެ މައިންބަފައިން ކައިރިއަށް ޒިޔާރަތް ކޮށްފައެވެ، އޭގެ ތެރޭގައި، އަދި މިކަމާ ގުޅޭ ގޮތުން ފާޅުގައި އެއްޗެއް ބުނެފައި ނުވި ނަމަވެސް، ސައިފް އަލީ ޚާން ވެސް ހިމެނެއެވެ.

ދެ ދުވަހު ޖަލުގައި ހޭދަކުރުމަށް ފަހު ކަފާލާތުގެ ދަށުން ސަލްމާން މިނިވަން ވެފައިވީ ނަމަވެސް، އެ ކަންތައް އިސްތިއުނާފް ކުރާނެ ކަމަށް މިހާރު ވެސް މި މައްސަލައިގައި މަސައްކަތްކުރާ ބިޝްނޮއި ޓައިގަރ ފޯސް އިން ވަނީ ބުނެފައެވެ.