ޗެމްޕިއަންސް ލީގުގެ ފައިނަލުން ބަލިވުމަށް ވުރެ ޔުރޮޕާ ލީގު ކާމިޔާބުކުން މުހިންމު: ސިމިއޯނީ

ޔުއެފާ ޗެމްޕިއަންސް ލީގުގެ ފައިނަލްއިން ބަލިވުމަށް ވުރެ ޔުއެފާ ޔުރޮޕާ ލީގުގެ ތަށި ކާމިޔާބުކުރުން މުހިންމު ކަމަށް އެޓްލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީ ބުނެފިއެވެ.

ޔުރޮޕާ ލީގުގެ ކުއާޓާ ފައިނަލުގައި ޕޯޗުގަލްގެ ސްޕޯޓިން ލިސްބަންއާ ދެކޮޅަށް ސިމިއޯނީގެ އެޓްލެޓިކޯ ނުކުންނާނެއެވެ. އެޓްލެޓިކޯ ޔުރޮޕާ ލީގަށް ވެއްޓުނީ ޗެމްޕިއަންސް ލީގުގެ ގްރޫޕް ސްޓޭޖު ފަހަނައަޅައި ނުދެވުމުގެ ސަބަބުންނެވެ. ޔޫރަޕުގެ ގަދަ ބާރެއްގެ ގޮތުގައި ގިނަ ބަޔަކު އެޓްލެޓިކޯ ދެކޭއިރު އެ ޓީމުން ވަނީ މީގެ ކުރިން ދެ އަހަރަކު ޔުރޮޕާ ލީގު ކާމިޔާބުކޮށްފައެވެ. ހަމައެހެންމެ 2014 ވަނަ އަހަރާއި 2016 ވަނަ އަހަރުގެ ޗެމްޕިއަންސް ލީގު ފައިނަލްއިން އެ ޓީމު ވަނީ ރެއާލް މެޑްރިޑް އަތުން ބަލިވެފައެވެ.

ސްޕެނިޝް ލަލީގާގެ ތަށި 2014 ވަނަ އަހަރު އެޓްލެޓިކޯއަށް ހޯދައިދިން ކޯޗު ސިމިއޯނީ ބުނީ މީހުންގެ ހިޔާލު ހުންނާނެ ކަމަށާއި މެޗާ ކުރިމަތިލާއިރު އިދިކޮޅުން ކުޅޭ ޓީމަކާ މެދު ވަރަށް ވިސްނާ ކަމަށެވެ. އޭނާ ބުނީ ހަގީގަތަކީ ބަޔާން މިއުނުކާ ދެކޮޅަށް ކުޅުނު ނަމަވެސް ސްޕޯޓިންއާ ދެކޮޅަށް ކުޅުނު ކަމުގައި ވިޔަސް ދެން އޮތް ބުރަށް ކޮލިފައިވުމަށް ގިނަ މަސައްކަތްތަކެއް ކުރަންޖެހޭ ކަމަށެވެ. އޭނާ ބުނީ އަބަދުވެސް ވިސްނައިދެނީ ކުޅުންތެރިންނަށް ކުރިޔަށް އޮންނަ މެޗަށް ފޯކަސް ކުރުމަށް ކަމަށެވެ.

އޭނާ ބުނީ ސްޕޯޓިންއަކީ އެޓްލެޓިކޯއާ އެއް ފެންވަރެއްގެ ޓީމެއް ކަމަށް ދެކޭ ކަމަށާއި މި މެޗު ވެގެންދާނީ ވަރަށް އުނދަގޫ މެޗަކަށް ކަމަށެވެ. އޭނާ ބުނީ ސްޕޯޓިންގައި ހުރީ ވަރަށް ތަޖުރިބާކާރު ކަންކަން ކުރަން އެނގޭ ކޯޗެއް ކަމަށާއި އޭނާއަށް އިހުތިރާމުކުރާ ކަމަށެވެ. ހަމައެހެންމެ އޭނާގެ އިރުޝާދުގެ ދަށުން ސްޕޯޓިން އިން ކާމިޔާބު ހޯދާފައިވުމަކީ އެ ޓީމާ މެދު ވިސްނަންޖެހޭ ކަމެއް ކަމަށާއި އޭނާ ކޯޗުކަން ކޮށްދިން ކޮންމެ ޓީމެއް ވެސް މީގެ ކުރިން ރަނގަޅު ނަތީޖާތަކެއް ހޯދާފައިވާ ކަމަށެވެ.

ސިމިއޯނީ ބުނީ އޭނާގެ ސީވީގައި ލިޔާ ކަންކަމާ މެދު ވަރަށް ވިސްނާ ކަމަށާއި މެޗުތަކުން މޮޅުވުމަށް ބޮޑު އިސްކަމެއް ދެނީ އެކަމުގެ ސަބަބުން ކަމަށެވެ. އޭނާ ބުނީ އަބަދުވެސް ވިސްނަނީ މޮޅުވުމަށް ކަމަށާއި އެހެން ނަމަވެސް ޗެމްޕިއަންސް ލީގު ފަދަ ބޮޑު މުބާރާތެއްގެ ރަނަރަޕްކަން ލިބިފައިވުމަކީ ވެސް ބޮޑު ކާމިޔާބެއްގެ ގޮތުގައި ދެކޭ ކަމަށެވެ. އޭނާ ބުނީ ޗެމްޕިއަންސް ލީގުގެ ރަނަރަޕަކަށް ވުމަށް ވުރެ ޔުރޮޕާ ލީގުގެ ޗެމްޕިއަންކަން ހޯދުން ވެގެންދާނީ މާ ބޮޑު ޝަރަފަކަށް ކަމަށް ދެކޭ ކަމަށެވެ.

ޗެމްޕިއަންސް ލީގުގެ ތަށި އެޓްލެޓިކޯއަށް ހޯދިފައިނުވުމާ އެކު އެ ޓީމަށް ބޮޑު ފާޑުކިޔުންތަކެއް އަމާޒުވެފައިވެއެވެ. ހަމައެހެންމެ މި ސީޒަނުގެ ޗެމްޕިއަންސް ލީގުން އެ ޓީމު ކެޓުމާ އެކު ސިމިއޯނީ އެ މަގާމު ދޫކޮށްލަން އުޅޭ ކަމުގެ އަޑުތަކެއް ފެތުރިގެންދިޔައެވެ. އެޓްލެޓިކޯ ސެމީއަށް ދަތުރުކުރަން ބޭނުންވާ ނަމަ ދެ ލެގުގެ އެގްރިގޭޓް ނަތީޖާއިން ސްޕޯޓިންގެ މައްޗަށް ކުރި ހޯދަން ޖެހެއެވެ.