އިލެކްޝަންސް ކޮމިޝަނުން ސިޔާސީ ޕާޓީތަކާއެކު މިއަދު ނިންމާފައި އޮތް ބައްދަލުވުން އެންމެ ފަހު ވަގުތު ފަސްކޮށްފިއެވެ.
ހެނދުނު 10:00 ގައި ބާއްވަން ނިންމާފައި އޮތް މި ބައްދަލުވުން ފަސްކުރި ވަކި ސަބަބެއް އިލެކްޝަންސް ކޮމިޝަނުން ހާމައެއް ނުކުރެ އެވެ.
އެ ކޮމިޝަންގެ މެމްބަރު އަހްމަދު އަކްރަމް ވިދާޅުވީ ދެން ބާއްވާ ބައްދަލުވުމެއްގައި، މިހާރު ކަނޑައަޅާފައިވާ ވަގުތަށް ވުރެ ގިނަ ވަގުތު ސިޔާސީ ޕާޓީތަކަށް ދޭނެ ކަމަށެވެ.
ރިޔާސީ އިންތިހާބު ކައިރިވަމުން އަންނައިރު، ސިޔާސީ ޕާޓީތަކަށް ސިޔާސީ ހަރަކާތް ހިންގުމުގެ ފުރުސަތު ނެތުމާއި ޕާޓީތަކުގެ ލީޑަރުން ހައްޔަރުކޮށްގެން ގެންގުޅޭތީ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. އަދި ރައީސް އަބްދުﷲ ޔާމީންގެ ވެރިކަމުގެ ބާރުވެރިކަން ދެމެހެއްޓުމަށްޓަކައި، ގާނޫނު އަސާސީއާ ހިލާފަށް އިލެކްޝަންސް ކޮމިޝަނުން ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ގެއްލިފައިވާ ކަމަށް ނިންމާފައި އޮތުމުން ވެސް ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.