އިސްރާއީލުން ފަަލަސްތީނުގެ ރައްޔިތުންނާ މެދު ހިންގަމުންދާ ޖަރީމާތަކާ ބެހޭގޮތުން މަޝްވަރާ ކުރުމަށް އަރަބި ގައުމުތަކުގެ އެއްބައިވަންތަކަަމަށް މަސައްކަތް ކުރާ އަރަބް ލީގުން ނިންމައިފިއެވެ. 

މިކަމާ ބެހޭގޮތުން އަރަބް ލީގުގެ އެސިސްޓެންޓް ސެކްރެޓަރީ ޖެނެރަލް އަބޫ އަލީ އާދީއްތަ ދުވަހު ނެރުއްވި ބަޔާނެއްގައި ވިދާޅުވީ އިސްރާއީލުން ފަލަސްތީނުގެ ރައްޔިތުންނާ މެދު ހިންގަމުންދާ ލާއިންސާނީ އަމަަލުތަކާ މެދު މަޝްވަރާ ކުރުމަށް ބާއްވާ ކުއްލި ބައްދަލުވުން އޮންނާނީ އަންގާރަ ދުވަހު ކަމަށެވެ.

ފަލަސްތީނު ރައްޔިތުން ކޮންމެ އަހަރެއްގެ މާޗް 30 ވަނަ ދުވަހު ފާހަގަކުރާ "ލޭންޑް ޑޭ" ދުވަސް ނުވަތަ ފަލަސްތީނު ރައްޔިތުންގެ ބިން އިސްރާއީލުން 1976 ވަނަ އަހަރުގެ މާޗް މަހު ފޭރިގަތް ދުވަހާ ދިމާކޮށް ފާހަގަކުރާ ދުވަހާއި ގުޅިގެން، ނިމިދިޔަ މާޗް 30 ވަނަ ދުވަހު ސުލްހަވެރިކަމާއެކު އެއްވި ފަލަސްތީނުގެ ރައްޔިތުންނާ ދެކޮޅަށް އިސްރާއީލު ސިފައިން ވަނީ ލާއިންސާނީ އެތަކެއް އަމަލެއް ހިންގާފައެވެ. އަރަބް ލީގުގެ އެސިސްޓެންޓް ސެކްރެޓަރީ ޖެނެރަލް އަބޫ އަލީ ގެ ބަޔާނުގައި ވިދާޅުވީ މި އަހަރުގެ މާޗް މަހު 30 ވަނަ ދުވަހު އިސްރާއީލު ސިފައިން ހިންގި ލާއިންސާނީ އަމަލުތަކާމެދު ފުޅާދާއިރާއެއްގައި އަންގާރަ ދުވަހު އޮންނަ އަރަބް ލީގުގެ ކުއްލި ބައްދަލުވުމުގައި މަޝްވަރާ ކުރާނެ ކަމަށެވެ.

އަބޫ އަލީ ގެ ބަޔާނުގައި އިތުރަށް ވިދާޅުވީ އިސްރާއީލުން ފަލަސްތީނުގެ ރައްޔިތުންގެ ބިންތައް ފޭރިގަނެ އެ ބިންތަކަށް ވެރިވެގެންފައިވާ ވުމާއި އަދި ފަަލަސްތީނުގެ ރައްޔިތުންނާމެދު ހިންގަމުންދާ ލާއިންސާނީ އަމަލުތަށް ހުއްޓުވުމަކަށް ގެނައުމަށް ބައިނަލްއަގްވާމީ މުޖުތަމައު އިން ފުރިހަމަ ޒިންމާ ނަގަން ޖެހޭނެ ކަމަށާއި އަދި އިސްރާއީލުގެ އަމަލުތައް ތަހުގީގު ކުރުމަށް ހާއްސަ ތަހުގީގީ ކޮމިޓީއެއް އެކުލަވާލަން ޖެހޭ ކަމަށެވެ. 

ފަލަސްތީނުގެ އޮފިޝަލުން ބުނާގޮތުން އިސްްރާއީލު-ޣައްޒާގެ ބޯޑަރު ސަރައްދުގައި ފަލަސްތީނުގެ ރައްޔިތުން ކުރަމުންދާ މުޒާހަރާގައި އިސްރާއީލު ސިފައިން ހަމަލާ ދިނުމުގެ ސަބަބުން ފަލަސްތީނުގެ 16 މީހުން މަރުވެ 1400 އަށްވުރެ ގިނަ މީހުން ވަނީ ޒަޚަމްވެފައެވެ. 

އިސްްރާއީލު-ޣައްޒާގެ ބޯޑަރު ސަރައްދުގައި ފަލަސްތީނުގެ ރައްޔިތުން  ފޭލިގެ ޖަހައި، ފަލަސްތީނު އެތައްހާސް ރައްޔިތުން ހުކުރު ދުވަހު ހެނދުނުން ފެށިގެން ގެންދަނީ މުޒާހަރާ ކުރަމުންނެވެ. "ގްރޭޓް މާޗް އޮފް ރިޓާން"ގެ ނަމުގައި ހަ ހަފުތާގެ މުއްދަތަށް ފަލަސްތީނު ރައްޔިތުން ފެށި މުޒާހަރާގައި ފަލަސްތީނު މީހުން ޑިމާންޑް ކުރަމުން ދަނީ އިސްރާއީލުގައި މިހާރު ދިރިއުޅޭ ފަލަސްތީނުގެ ރެފިއުޖީން އެ މީހުންގެ ގެދޮރަށް އަނބުރާ ގެނައުމަށެވެ. އިހްތިޖާޖް ނިންމަން ހަމަޖައްސާފައި ވަނީ މެއި 15 ވަނަ ދުވަހު ކަމަށްވާއިރު އެއީ ފަލަސްތީނުން ކިޔާ ގޮތުން ނަކްބާ ނުވަތަ ހަލާކުގެ ދުވަހެވެ. ނުވަތަ 1948 ވަނަ އަހަރު އިސްރާއީލް އުފެދުނު ދުވަހެވެ.