ކުޑަކުދިންނަށް ޚާއްސަކޮށްގެން އުފައްދާ ފިލްމެއް ކަމަށްވާ ކަނޑު އިބިލީސްގެ ޕޯސްޓަރ މިރޭ ރިލީޒް ކުރާނެއެވެ.
މިރޭ 8:30 ގައި ބްލޫބޭ ރެސްޓޯރެންޓުގައި ބާއްވާ ޚާއްސަ ރަސްމިއްޔާތުގައި އެ ފިލްމުގެ ޕޯސްޓަރ ރިލީޒް ކުރާނީ ފިލްމުގެ ޓީމާ އެކީގައި ކަމަށް އެ ފިލްމުގެ ޓީމުން ބުނެއެވެ.
މިއަހަރުގެ ޖެނުއަރީ މަހު ފިލްމްގެ ޝޫޓިން ވަނީ ހދ. ކުޅުދުއްފުށީގައި ކުރިއަށް ގެންގޮސްފައެވެ.
މިއީ ކޮޕީ ރަޝީދުގެ ވާހަކައެއްގެ މައްޗަށް ބިނާކޮށް އުފައްދާ ފިލްމެކެވެ. މި ފިލްމު ޕްރޮޑިއުސް ކުރާނީ އަހުމަދު ޒިޔާގެ އިތުރުން އިސްމާއިލް ރަޝީދު (ކޮޕީ އިއްސެ) އާއި ރިއްފަތުއެވެ. ރިއްފަތު އަކީ ލަވަކިޔުމުގެ ދާއިރާ އިން ކުރިއަރަމުން އަންނަ ފަރާތެކެވެ. އަދި މިއީ އޭނާ ޕްރޮޑިއުސް ކުރާ ފުރަތަމަ ފިލްމެވެ.
ކަނޑު އިބިލީސް ކެމެރާ ކުރަނީ ދަބާ އެވެ. ޒިޔާ ބުނީ އެންމެ ފުރަތަމަ ފިލްމު އަޅުވާނީ ކުޅުދުއްފުށީގައި ކަމަށާއި އޭގެ ފަހުން އޮލިމްޕަހުގައިވެސް ފިލްމު އަޅުވާނެ ކަމަށެވެ.
ފިލްމުގެ މުހިއްމު ރޯލުތަކުން ފެންނާނީ އިއްސެ އަދި ޒިޔާއެވެ. ޒިޔާގެ ކެރެކްޓާ އަކީ "ވަސްވާސް" ގައި އޭނާ ފެނުނު ކެރެކްޓާ ކަމަށާއި އިއްސެގެ ކެރެކްޓާ ވެސް ވަރަށް ހާޢްސަ ވާނެ ކަމަށް ޒިޔާ ބުންޏެވެ.
އަމިއްލަ ރާގުގެ އެއް ލަވަ މި ފިލްމުގައި ހިމެނެއެވެ.
