ޑައިރެކްޓަރ ރެމޯ ޑެސޫޒާގެ ފިލްމު "ރޭސް 3" ގެ ޕޯސްޓަރ ދައްކާލައިފިއެވެ.

މި ޕޯސްޓަރގައި ފެނިގެންދަނީ ސަލްމާން ޚާން ގޮނޑިއެއްގައި އިށީނދެގެން އިންނަ ތަނެވެ. އަދި އޭނާގެ ފަހަތުގައި ބޮބީ ޑިއޯލް އާއި ޖެކްލިން ފެނާންޑޭޒް އާއި ޑެއިޒީ ޝާހު، ސާޒިބް ސަލީމް އަދި އަނިލް ކަޕޫރް އެތުރިލައިގެން ތިބޭ މަންޒަރު ފެނިގެންދެއެވެ. މީގެ ތެރެއިން އަނިލް ވަނީ ކުރިން ދެ ބައިގައި ވެސް މުހިންމު ބައެއް ކުޅެފައެވެ. "ރޭސް 2"ގައި ޖެކްލިން ފެނިގެން ގޮސްފައި ވެއެވެ. މި ފިލްމުގެ ފުރަތަމަ ބައި ރިލީޒްކޮށްފައި ވަނީ 2008 ވަނަ އަހަރުއެވެ. "ރޭސް 2" ރިލީޒްކޮށްފައި ވަނީ 2013 ގައެވެ. މި ދެ ފިލްމްގައި ވެސް ސައިފް އަލީ ޚާން ލީޑް ރޯލުން ފެނިގެންދިޔަ އިރު މި ފަހަރުގެ ފިލްމުން އޭނާ ފެނިގެން ނުދާނެއެވެ. 

ސަލްމާން ޚާން ވަނީ މި ޕޯސްޓަރ ޝެއަރ ކުރަމުން ކެޕްޝަންގައި މިއީ "ރޭސް 3" ގެ އާއިލާ ކަމަށާއި ރޭސް ފައްޓަންވީ ކަމަށް ބުނެ ލިޔެފައެވެ.

މީގެ އިތުރުން މި ފިލްމުގައި ސަލްމާން ވަނީ އޭނާ އަމިއްލައަށް ލަވައެއް ލިޔެފައެވެ. އެ ލަވަޔަކީ ލޯބީގެ ލަވައެކެވެ. އެ ލަވައިގެ މިއުޒިކް ހަދާފައި ވަނީ ވިޝާލް މިޝްރާއެވެ.  

ލަވަޔާ ބެހޭ ގޮތުން ފިލްމުގެ ޕްރޮޑިއުސަރު ރަމޭޝް ތައުރާނީ ބުނީ ސަލްމާން ލިޔުނު ޅެން ވަރަށް ފުރިހަމަ ކަމަށާއި އެ ޅެމަކީ ޖަޒުބާތުތަކުން ފުރިގެންވާ ޅެމެއް ކަމަށެވެ.

ފިލްމުގެ ޝޮޓްތައް ނަގާފައި ވަނީ އަބޫދާބީގެ އިތުރުން އިންޑިއާގެ މުމްބާއީގައި އަދި ތައިލެންޑުގެ ބެންގްކޮކްގައެވެ.

މި ފިލްމް ސިނަމާތަކަށް އަންނާނީ މިއަހަރުގެ ޖޫން މަހުގެ 15 ވަނަ ދުވަހުއެވެ.