ރާއްޖޭގައިވެސް މިއަހަރުގެ އާރތު އަވަރ ފާހަގަ ކޮށްފި
24 މާރިޗު 2018 | ހޮނިހިރު 20:40މިއީ މޫސުމަށް އަންނަ ބަދަލުތަކާއި ގުޅިގެން މީހުން ހޭލުންތެރި ކުރުވުމަށް ފާހަގަ ކުރާ ވަގުތުކޮޅެއް
އާރތު އަވަރ ފާހަގަ ކުރުމުގެ ގޮތުން ލައިޓްތައް ނިވާލާފައި
އދ. ގެ ޖަމިއްޔާއެއް ކަމަށްވާ ވޯލްޑް ވައިޑް ފަންޑް ފޮރ ނޭޗަރ (ޑަބްލިޔުޑަބްލިޔުއެފް) އިން އިންތިޒާމް ކޮށްގެން ކޮންމެ އަހަރެއްގެ މާޗް މަހު، "ދުނިޔެއަށްޓަކައި އެއް ގަޑިއިރަށް" ކޮންމެހެން ބޭނުންކުރަން ޖެހޭ ބޮކިތައް ފިޔަވައި އެހެން ދިއްލުންތައް ނިވާލައިގެން ފާހަގަކުރާ އެއް ގަޑިއިރުގެ ވަގުތުކޮޅު (އާރތު އަވަރ) ރާއްޖޭގައިވެސް ފާހަގަ ކޮށްފިއެވެ.
އާރތު އަވަރ ފާހަގަ ކުރުމުގެ ގޮތުން ރާއްޖޭގައިވެސް ވަނީ ބައެއް ޖަމްއިއްޔާތަކުން އިސްނަގައިގެން ތަފާތު ހަރަކާތްތައް ކުރިއަށް ގެންގޮސްފައެވެ. އެގޮތުން ސާފުކުރުމުގެ ޕްރޮގްރާމާތްކާއި، ދުނިޔެއަށް އަންނަ މޫސުމީ ބަދަލުތަކާބެހޭ މައުލޫމާތު ފޯރުކޮށްދީ މީހުން ހޭލުންތެރި ކުރުވުމުގެ އިތުރުން އެކަންކަމާއި ގުޅުވައިގެން ތަފާތު ކުޅިވަރު ހަރަކާތްތަކާއި މުނިފޫހިފިލުވުމުގެ ހަރަކާތްތައްވެސް ވަނީ ކުރިއަށް ގެންގޮސްފައެވެ.
މާލޭގައި ބައެއް ތަންތަނުގައި އެއްގަޑިއިރަށް ގިނަ ލައިޓްތައް ނިއްވާލައިގެން އާރތު އަވަރ ފާހަގަ ކޮށްފައިވާއިރު އަތޮޅުތެރޭގެ ބައެއް ރަށްރަށުގައިވެސް ވަނީ އެއްގަޑިއިރަށް ލައިޓްތައް ނިއްވާލާފައެވެ.
އީކޯކެއަރގެ ޑައިރެކްޓަރ އޮފް އެޑްވޮކަސީ މައީދު މުހައްމަދު ޒާހިރު، ހޮނިހިރު ދުވަހުގެރޭ ރާއްޖެޓީވީގެ 60 މިނިޓް އަށް ދެއްވި އިންޓަވިއުއެއްގައި ވިދާޅުވީ ހޮނިހިރު ދުވަހުގެރޭ އައްޑޫ ސިޓީ ހިތަދޫގެ ސްޓޭޖް ސަރަހައްދުގައި ބޮކިތައް ނިއްވާލައިގެން ޝުޢޫރު ފާޅުކޮށްފައިވާ ކަމަށާއި ހުކުރު ދުވަހުން ފެށިގެން އައްޑޫ ސިޓީގައި އާރތު އަވަރ ފާހަގަ ކުރުމުގެ ގޮތުން ތަފާތު ހަރަކާތްތައް ކުރިއަށް ގެންގޮސްފައިވާ ކަމަށެވެ.
"ބޮކިތައް ނިއްވާލައިގެން ޝުޢޫރު ފާޅުކުރުން ކުރިއަށް މިދަނީ. މިރޭ (ހޮނިހިރު ދުވަހުގެރޭ) އެބައޮތް ބޮޑުބެރާ އައްޑޫ މިޔުޒީޝަނުންގެ ބައެއް ހަރަކާތްތައް ވަނީ ރޭވިފައި. އިއްޔެއާ މިއަދު އައްޑޫ ސިޓީގައި ވަރަށް ބައިވަރު ހަރަކާތްތަކެއް މިދިޔައީ ހިނގަމުން. އޭގެ ތެރޭގައި ބައިސްކަލް މުބާރާތެއް ބޭއްވިއްޖެ. ކުނިނެގުމުގެ ހަރަކާތެއްވެސް ބޭއްވިއްޖެ. އަދި މޫސުމަށް އަންނަ ބަދަލުތަކުން ލިބޭ ގެއްލުމާ ބެހޭ މައުލޫމާތު ފޯރުކޮށް ދެވިއްޖެ" ހޮނިހިރު ދުވަހުގެރޭ ރާއްޖެ ޓީވީގެ 60 މިނިޓް އަށް ދެއްވި އިންޓަވިއުގައި މައީދު ވިދާޅުވިއެވެ.
މައީދު ވިދާޅުވީ ރާއްޖެ އުފެދިފައިވާ ގޮތުންނާއި ރާއްޖޭގެ ފަތުރުވެރިކަމަށް ބަލާއިރު، މޫސުމަށް އަންނަ ބަދަލުތަކުގެ ސަބަބުން ވަރަށް ބޮޑު ގެއްލުމެއް ލިބިދާނެ ކަމަށާއި މިއީ ކޮންމެ މީހަކުވެސް އެކަމަށް ސަމާލުވާން ޖެހޭ ކަމަށެވެ. އަދި މިކަމާމެދު ކޮންމެ ރައްޔިތަކުވެސް ފިޔަވަޅުތަކެއް އަޅަން ޖެހޭ ކަމެއް ކަމަށެވެ.
"މިއީ ކޮންމެ މީހަކުވެސް މިކަމާމެދު ވިސްނަން ޖެހޭ ކަމެއް. އަދި ވިސްނާފައި ފަރުދީ ފެންވަރުގައި ފިޔަވަޅުތަކެއް އަޅަން ޖެހޭ." މައީދު ވިދާޅުވިއެވެ.
މައީދު ވިދާޅުވީ އެއްގަޑިއިރަށް ބޮކިތައް ނިވާލުމަކީ ރަމްޒީ ކަމެއް ނަމަވެސް މިއީ އަހަރުގެ ކޮންމެ ދުވަހަކުވެސް މިކަމަށް ސަމާލުކަން ދޭން ޖެހޭ ދުވަހެއް ކަމަށެވެ.
