އިންޓެލިޖެންސް ރިޕޯޓަކީ ޝަރީއަތުގެ އެއްވެސް މަރުހަލާއެއްގައި ބޭނުން ކޮށްގެންވާނެ އެއްޗެއްނޫން ކަމަށް އެސިސްޓެންޓް ކޮމިޝަނަރ އޮފް ޕޮލިސްކަން ކުރެއްވި އަބްދުﷲ ފައިރޫޝް ވިދާޅުވެއްޖެއެވެ.
ސޯޝަލް މީޑިއާގައި ސަރުކާރަށް ފާޑުވިދާޅުވަމުން ގެންދަވަނިކޮށް ވަޒީފާ އިން ވަކިކުރި ފައިރޫޝް ކުރެއްވި ޓްވީޓެއްގައި ވިދާޅުވެފައި ވަނީ އިންޓެލިޖެންސް ރިޕޯޓުތަކުގައިވާ ރަތްކުލައިގެ ގޮޅިއެއްގެެ ތެރޭގައި ވާ ލިޔުން ފަނޑިޔާރުން ވިދާޅުވާން ފައްޓަވަން ޖެހިވަޑައިގަންނަވާ ވަގުތު އައިސް ޖެހިއްޖެ ކަމަށާއި ރަތްކުލައިގެ ގޮޅީގެ ތެރޭގައިވާ ލިޔުމުގައި އޮންނާނީ "އިންޓެލިޖެންސް ރިޕޯޓަކީ ޝަރީއަތުގެ އެއްވެސް މަރުހަލާއެއްގައި ބޭނުން ކޮށްގެންވާނެ އެއްޗެއް ނޫން" ކަމަށެވެ. އަދި އިންޓެލިޖެންސް ރިޕޯޓަކީ ހެއްކެއް ނޫން ކަމަށް ވެސް ވިދާޅުވެފައި ވެއެވެ.
The judges should start reading the text in a red box in the Intel reports. It states that the Intel reports must not be used in any stage of the trial. It’s not a piece of evidence.
— A. Fairoosh (@Fairoosh) March 24, 2018
ކުރިން ފުލުހުންގެ ވަޒީފާގައި އުޅުއްވި ފައިރޫޝް މިމޭރުމުން ޓްވީޓް ކުރެއްވި އިރު ފުލުހުންގެ ޔުނިފޯމްގައި ތިބި ބަޔަކު ސަރުކާރަށް އިންޒާރު ދޭ ވީޑިއޯއެއް އާންމުކުރި މައްސަލައިގައި ހައްޔަރު ކުރި ރާއްޖެ ޓީވީގެ ދެ ނޫސްވެރިން ކަމަށްވާ މުހައްމަދު ވިސާމާއި އާމިރު ސަލީމް 10 ދުވަހަށް ބަންދުގައި ބައިތިއްބަން މާޗް 17 ގައި ކްރިމިނަލް ކޯޓުން ވަނީ އަމުރު ކޮށްފައެވެ. މި މައްސަލައިގައި ރާއްޖެޓީޓީގެ ނޫސްވެރިންގެ ގާނޫނީ ވަކީލެއްގެ ގޮތުގައި ހަރަކާތްތެރިވަމުން އަންނަ ވަކީލް މުހައްމަދު ނިޝާން ވިދާޅުވެފައި ވަނީ ހެއްކެއްގެ ގޮތުގައި ފުލުހުން ހުށަހަޅާފައި ވަނީ ހަމައެކަނި އިންޓެލިޖެންސް ރިޕޯޓެއް ކަމަށެވެ.
ރާއްޖެޓީވީގެ އާމިރާއި ވިސާމްގެ މައްޗަށް މުއްދަތު އިތުރުކުރެވިގެންދިޔައީ އިތުރު ހެއްކެއް އޮވެގެން ނޫން ކަމަށް ވެސް ގާނޫނީ ވަކީލު ނިޝަން ވަނީ ވިދާޅުވެފައެވެ. ވިސާމާއި އާމިރުގެ މައްޗަށް ފުލުހުން ކޮށްފައި ވަނީ ދޮގު ތުހްމަތެއް ކަމަށް ރާއްޖެ ޓީވީން ވަނީ ބުނެފައެވެ. އަދި އެ ފަދަ ތުހްމަތެއްކޮށް ރާއްޖެ ޓީވީގެ ނޫސްވެރިން ހައްޔަރުކުރީ ސްޓޭޝަންގެ ތަސައްވުރު ހަޑިކޮށް، ސްޓޭޝަން ބަންދުކުރުމުގެ ނިޔަތް އޮތް ބައެއްގެ ރޭވުމުން ކަމަށް ވެސް ރާއްޖެ ޓީވީން ބުނެއެވެ.
ރާއްޖޭގޭ ބަައެއް ސިޔާސީ ޕާޓީތަކުން އަބަދުވެސް ބުނަމުން އަންނަ އެއް ވާހަކައަކީ ސަލާމަތީ ޚިދުމަތްތަކަށް ސަރުކާރުން ނުފޫޒު ފޯރުވައި އިންޓެލިޖެންސް ރިޕޯޓު މެދުވެރިކޮށް ވާދަވެރިންނާއި އަދި ނޫސްވެރިންގެ އަޑުކަނޑުވާލަން ސަރުކާރުން މަސައްކަތް ކުރާ ކަމަށެވެ. މީގެ ކުރިން ވެސް ސިޔާސީ ބައެއް ބޭފުޅުން ބަންދުކުރުމަށް ވެސް ހަމައެކަނި އިންޓެލިޖެންސް ރިޕޯޓަށް ވަނީ ބަލާފައެވެ.