އާސެނަލްއަށް ކުޅެމުން އަންނަ ސްޕެއިންގެ ޑިފެންޑަރު ހެކްޓަރ ބެލެރިން އެ ޓީމު ދޫކޮށްނުލާނެ ކަމަށް އޭނާގެ އޭޖެންޓް ބުނެފިއެވެ.
އުމުރުން 23 އަހަރުގެ ޑިފެންޑަރު އޭނާ ތަމްރީނުވި ޓީމު ކަމަށްވާ ސްޕެއިންގެ ބާސެލޯނާއަށް އެނބުރިދާން އުޅޭ ކަމުގެ އަޑުތަކެއް ވަނީ ފެތުރިފައެވެ. ހަމައެހެންމެ އޭނާ ހޯދުމަށް އިޓަލީގެ ޔުވެންޓަސް އަދި އާސެނަލްގެ ވާދަވެރި މެންޗެސްޓާ ޔުނައިޓޑުން ވެސް މަސައްކަތްކުރަމުން އަންނަ ކަމަށް ބައެއް މީޑިއާތަކުން ވަނީ ރިޕޯޓުކޮށްފައެވެ.
ބެލެރިންގެ އޭޖެންޓް ނޫސްވެރިންނާއި ވާހަކަ ދައްކަމުން ބުނެފައި ވަނީ އޭނާ އާސެނަލް ދޫކޮށްލާ މަންޒަރު ނުފެންނަ ކަމަށާއި އެފަދަ ދުވަހެއް މި ސީޒަނުގައި އަތުވެދާނެ ކަމަށް ގަބޫލުނުކުރާ ކަމަށެވެ. އޭނާ ބުނީ ބެލެރިންގެ ސޮޔާ މެދު މަޝްވަރާ ކުރުމަށް އެއްވެސް ކްލަބަކުން އޭނާއާ މަޝްވަރާކޮށްފައިނުވާ ކަމަށާއި އޭނާ އާސެނަލްގައި ވެސް ހުރީ ހިތްހަމަޖެހިގެން ކަމަށެވެ. އެގޮތުން އޭނާ ވަނީ ވަރަށް ފަހުން އާ ކޮންޓްރެކްޓެއްގައި ސޮއިކޮށްފައި ކަމަށާއި އަދި ގަވާއިދުން އޭނާއަށް ފުރަތަމަ އެގާރައިން ފުރުސަތު ދެމުންދާ ކަމަށް ވެސް އޭނާގެ އޭޖެންޓް ފާހަގަކޮށްފައިވެއެވެ.
ބެލެރިންގެ އޭޖެންޓް ބުނެފައި ވަނީ ކޮންމެ ކުޅުންތެރިޔަކު ވެސް އާ ތަޖުރިބާތައް ކުރަން ބޭނުންވާ ކަމަށާއި އެގޮތަށް އޭނާ ވެސް އާ ތަޖުރިބާތައްކުރަން ބޭނުންވާ ކަމަށް ބުނެފައިވާ ކަމަށެވެ. ކޮންމެ ހޫނު މޫސުމުގެ ޓްރާންސްފާ މާކެޓުގައި ވެސް ބެލެރިން ހޯދުމަށް އެކި ކްލަބްތަކުން މަސައްކަތްކުރާ ކަމަށާއި އެހެން ނަމަވެސް އާސެނަލް އިން އެފަދަ އެއްވެސް ވާހަކައެއް ހިއްސާކޮށްފައިނުވާ ކަމަށް އޭނާގެ އޭޖެންޓް ބުނެފައިވެއެވެ. އޭނާ ބުނީ ބެލެރިން ހޯދުމަށް އިޓަލީގެ ޓީމުތަކުން ވެސް މަސައްކަތްކުރާ ކަމަށާއި އިޓަލީގެ ޓީމުތަކަކީ ވެސް ވަރަށް ކަމުދާ ޓީމުތަކެއް ކަމަށެވެ. އެގޮތުން ނަޕޯލީއަކީ ޔޫރަޕުގައި ވެސް މިހާރު އަރަމުން އަންނަ ޓީމެއް ކަން ފާހަގަކުރަމުން ބެލެރިންގެ އޭޖެންޓް ވަނީ އޭނާ އެ ޓީމުން ފެނިދާނެ ކަމުގެ އިޝާރާތެއް ވެސް ދީފައެވެ.
މިދިޔަ އަހަރު އާސެނަލްއާ އެކު ބެލެރިން ސޮއިކުރި އާ ކޮންޓްރެކްޓާ އެކު 2022 ވަނަ އަހަރުގެ ނިޔަލަށް އެ ކްލަބްގެ ކުޅުންތެރިއެއްގެ ގޮތުގައި އޭނާ ދެމިހުންނާނެއެވެ. މި ސީޒަނުގެ މިހާތަނަށް ބެލެރިން ވަނީ 37 މެޗު އާސެނަލްއަށް ކުޅެދީފައެވެ.
