ދުނިޔޭގެ ފުޓްބޯޅައިގެ އެންމެ ގަދަ ދެ ބާރު ކަމަށްވާ ޖަރުމަނު އަދި ސްޕެއިން ބައްދަލުކުރި ރަހުމަތްތެރިކަމުގެ މެޗު އެއްވަރުވެގެން ނިމިއްޖެއެވެ.
ޖަރުމަނުގެ ޑަސަލްޑޯފްގައި ކުޅުނު މި މެޗު ނިމިފައި ވަނީ 1-1 ގެ ނަތީޖާއަކުން އެއްވަރުވެގެންނެވެ. މި މެޗާ މި ދެ ޓީމު ކުރިމަތިލިއިރު ބައިނަލްއަގްވާމީ ބޮޑު މުބާރާތްތަކުގެ ސެމީގައި މި ދެ ޓީމު ކުޅުނު ތިން މެޗުގެ ތެރެއިން ސްޕެއިން ދެ މެޗު ކާމިޔާބުކުރި އިރު ޖަރުމަނު މޮޅުވެފައި ވަނީ އެންމެ މެޗަކުންނެވެ. ދެ ޓީމުން ވެސް ވަރުގަދަ ފުރަތަމަ އެގާރައެއް މި މެޗަށް ނެރެފައިވާއިރު ޖަރުމަނުގެ ގޯލުން އަނިޔާގެ ސަބަބުން މެނުއެލް ނޯޔާ ފެނިފައެއް ނުވެއެވެ. އޭނާގެ ބަދަލުގައި މި މެޗުގައި އެ ޓީމުގެ ގޯލު ބެލެހެއްޓީ ބާސާގެ ކީޕަރު މާކް އެންޑަރ ޓާސްޓީޖެންއެވެ. ހަމައެހެންމެ ސްޕެއިންގެ ޓީމުން ޗެލްސީގެ ފޯވާޑް އަލްވާރޯ މޮރާޓާއަށް ވެސް ފުރުސަތު ދީފައެއް ނުވެއެވެ.
ފުރަތަމަ ހާފު ފެށިގެން ސްޕެއިން އިން ވަނީ ގިނަ ވަގުތު ބޯޅަ ހިފަހައްޓައިގެން ކުޅެ ޖަރުމަނުގެ ހާފަށް ބާރުބޮޑުކޮށްފައެވެ. އެގޮތުން މެޗުގެ 6 ވަނަ މިނެޓުގައި އެ ޓީމުން ވަނީ ފުރަތަމަ ލަނޑު ޖަހައި ލީޑު ނަގާފައެވެ. މި ލަނޑު އަންދްރޭސް އިނިއެސްޓާގެ ޕާހަކުން އެ ޓީމަށް ޖަހައިދިނީ ވެލެންސިއާގެ ފޯވާޑް ރޮޑްރިގޯއެވެ. މި ލަނޑަށް ފަހު ޖަރުމަނުން ވަނީ ކުރިޔަށް ޖެހި ލަނޑު ޖެހުމަށް ފުރުސަތުތަކެއް ތަނަވަސްކޮށްފައެވެ. ނަތީޖާއެއްގެ ގޮތުން މެޗުގެ 36 ވަނަ މިނެޓުގައި އެ ޓީމުން ވަނީ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ ތޯމަސް މުލާއެވެ.
ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ދެ ޓީމުން ވެސް ވަނީ ރީތި އެޓޭކިން ފުޓްބޯޅައެއް ކުޅެފައެވެ. ހަމަލާއަކަށް ފަހު ހަމަލާއެއް ދެ ޓީމުން އުފައްދަމުންދިޔައިރު މެޗުގެ 65 ވަނަ މިނެޓުގައި މެޓްސް ހުމެލްސް ފޮނުވާލި ހަމަލާއެއް ވަނީ ސްޕެއިންގެ ގޯލުގެ ހުރަސް ދަނޑިއަށް އަމާޒުވެފައެވެ. މި މެޗު ވެގެން ގޮސްފައިވަނީ ސްޕެއިންގެ ގައުމީ ޓީމަށް ސާޖިއޯ ރާމޯސް ކުޅުނު 150 ވަނަ މެޗަށެވެ.
އެންމެ ފަހުން ބޭއްވި ދެ ވޯލްޑް ކަޕް ވެސް މި ދެ ޓީމުން ކާމިޔާބުކުރިއިރު މިއަހަރުގެ ވޯލްޑް ކަޕްއަށް މި ދެ ޓީމު ވެސް ކޮލިފައިވީ ކޮލިފައިން ގްރޫޕުގެ އެއްވަނަ ޓީމުތަކުގެ ގޮތުގައެވެ. މިއަހަރުގެ ވޯލްޑް ކަޕްގެ ފެވަރިޓުންގެ ގޮތުގައި މި ދެ ޓީމު ވެސް ގިނަ ބަޔަކު ދެކެއެވެ.
ވޯލްޑް ކަޕަށް ތައްޔާރުވުމުގެ ގޮތުން ދެ ޓީމުން ވެސް ރަހުމަތްތެރިކަމުގެ މެޗުތައް ކުޅެމުން އަންނައިރު މި މަހުގެ 27 ވަނަ ދުވަހު ޖަރުމަނު ނުކުންނާނީ ބްރެޒިލްއާ ދެކޮޅަށެވެ. ހަމައެހެންމެ 28 ވަނަ ދުވަހު ސްޕެއިން ނުކުންނާނީ އާޖެންޓީނާއާ ދެކޮޅަށެވެ.
