މިސްރާ ދެކޮޅަށް ކުޅުނު މެޗުގެ އެންމެ ފަހު ވަގުތުގައި ރެއާލް މެޑްރިޑްގެ ފޯވާޑް ކްރިސްޓިއާނޯ ރޮނާލްޑޯ ކާމިޔާބުކުރި ލަނޑުތަކުން ޕޯޗުގަލް މޮޅުވެއްޖެއެވެ.

އަމިއްލަ ދަނޑުގައި މިސްރާ ދެކޮޅަށް ކުޅުނު މެޗުން ފަހަތުން އަރައި ޕޯޗުގަލް މޮޅުވީ 2-1 ގެ ނަތީޖާއަކުންނެވެ. މި މެޗު ވެގެންދިޔައީ މިހާރު ދުނިޔޭގެ ފުޓްބޯޅައިގައި އެންމެ ގޯލާ ރައްޓެހި ފޯވާޑުންގެ ގޮތުގައި ގިނަ ބަޔަކު ދެކޭ މިސްރުގެ ސަލާހު އަދި ޕޯޗުގަލްގެ ރޮނާލްޑޯގެ ކުރިމަތިލުމެއްގެ ގޮތުގައެވެ. މި ދެ ޓީމުން ވެސް ވޯލްޑް ކަޕްގެ ޖާގައެއް ކަށަވަރުކުރީ ކޮލިފައިންގެ ގްރޫޕް ސްޓޭޖުގައި ކުޅުނު އެންމެ ފަހު މެޗުން މޮޅުވެގެންނެވެ. ހަމައެހެންމެ މި މެޗަކީ 2014 ވަނަ އަހަރުގެ ފަހުން ޔޫރަޕުގެ ޓީމަކާ ދެކޮޅަށް މިސްރު ކުޅުނު ފުރަތަމަ މެޗެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު ދެ ޓީމަށް ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ. ރޮނާލްޑޯ އަދި ސަލާހު ވެސް ނުރައްކާތެރި ހަމަލާތަކެއް ފޮނުވާލިއިރު މެޗުގެ 26 ވަނަ މިނެޓުގައި ރޮނާލްޑޯ ފޮނުވާލި ހަމަލާއެއް މިސްރުގެ ގޯލު ރޮނގުމަތިން ވަނީ ދިފާއުކޮށްފައެވެ. މެޗުގެ 42 ވަނަ މިނެޓުގައި ރޮނާލްޑޯ ލަނޑެއް ޖެހި ނަމަވެސް ރެފްރީ ނިންމާފައި ވަނީ އެއީ އޮފްސައިޑް ލަނޑެއްގެ ގޮތުގައެވެ.

ދެ ޓީމު އެއްވަރުވެ އޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ވެސް ދެ ޓީމުން ވަނީ ފޯރިގަދަ ކުޅުމެއް ދައްކާފައެވެ. މި މެޗުގެ ފުރަތަމަ ލަނޑު ޖަހައި ލީޑު ނެގީ މިސްރުންނެވެ. މި ލަނޑު މެޗުގެ 56 ވަނަ މިނެޓުގައި އެލް ސައިދު ތަނަވަސްކޮށްދިން ފުރުސަތަކުން އެ ޓީމަށް ޖަހައިދިނީ މުހައްމަދު ސަލާހުއެވެ. މި ލަނޑަށް ފަހު ޕޯޗުގަލް އިން އެ ޓީމުގެ ކުޅުން ވަރުގަދަކުރިއިރު އެ ޓީމަށް ވަނީ ރަނގަޅު ފުރުސަތުތައް ލިބި ބޭކާރުވެފައެވެ.

މެޗުގެ އިތުރު ވަގުތުގެ ގޮތުގައި ރެފްރީ ހަތަރު މިނެޓު ދެއްކިއިރު ރޮނާލްޑޯ ވަނީ އިތުރު ވަގުތުގެ ދެވަނަ މިނެޓުގައި ލަނޑެއް ޖަހައި ޕޯޗުގަލްއަށް ނަތީޖާ ހަމަހަމަކޮށްދީފައެވެ. މި މެޗުން ޕޯޗުގަލް މޮޅުވި ލަނޑު އޭނާ ޖެހީ މެޗުގެ އިތުރު ވަގުތުގެ ވެސް އެންމެ ފަހު މިނެޓުގައެވެ.

މި މެޗުގައި ޖެހި ދެ ލަނޑާ އެކު ރޮނާލްޑޯ ވަނީ ޕޯޗުގަލްއަށް 81 ލަނޑު މިހާތަނަށް ޖަހައިދީފައެވެ. އޭނާއާ އެއް އަދަދަކަށް ބައިނަލްއަގްވާމީ މެޗުތަކުގައި ލަނޑު ޖަހާފައިވާ ކުޅުންތެރިޔަކު މިހާރު ކުޅެމުން ނުދެއެވެ. މި އަހަރުގެ ވޯލްޑް ކަޕާ ޕޯޗުގަލްއިން ކުރިމަތިލާނީ ޔޫރަޕުގެ ޗެމްޕިއަނުންގެ ގޮތުގައެވެ. ހަމައެހެންމެ މިއަހަރުގެ ވޯލްޑް ކަޕަކީ 1990 ވަނަ އަހަރުގެ ފަހުން ވޯލްޑް ކަޕްގައި މިސްރު ވާދަކުރާ ފުރަތަމަ ފަހަރެވެ.