ސިންގަޕޫރު އަތުން ރާއްޖެ ބަލިވެއްޖެ

ސިންގަޕޫރާ ދެކޮޅަށް އެ ގައުމުގައި ކުޅުނު ރަހުމަތްތެރިކަމުގެ މެޗުން ރާއްޖޭގެ ގައުމީ ފުޓްބޯޅަ ޓީމު ބަލިވެއްޖެއެވެ.

ސިންގަޕޫރުގެ ނެޝެނަލް ސްޓޭޑިއަމްގައި ކުޅުނު މި މެޗުން ރާއްޖޭގެ ޓީމު ބަލިވީ 3-2 ގެ ނަތީޖާއަކުންނެވެ. ގައުމީ ޓީމުގެ ކޯޗުގެ މަގާމައި އަލަށް ހަވާލުވި ކްރޮއޭޝިއާގެ ޕީޓަރ ސެގެޓްގެ އިރުޝާދުގެ ދަށުން ކުޅުނު ފުރަތަމަ މެޗުގައި ރާއްޖޭގެ ޓީމުގެ ފުރަތަމަ އެގާރައިން ޒުވާން ކުޅުންތެރިންނަށް ވަނީ ފުރުސަތު ދީފައެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު މެޗުގެ ފުރަތަމަ ލަނޑު ޖަހައި ލީޑު ނެގީ ސިންގަޕޫރުންނެވެ. އެގޮތުން މެޗުގެ 38 ވަނަ މިނެޓުގައި އެ ޓީމަށް ލީޑު ނަގައިދިނީ ހާރިސް ހާރޫންއެވެ. އޭނާ މި ލަނޑު ޖެހިތާ ދެ މިނެޓު ނުވަނީސް ރާއްޖެ އިން ވަނީ ލަނޑެއް ޖަހާ ނަތީޖާ ހަމަހަމަކޮށްފައެވެ. ރާއްޖޭގެ ޓީމަށް މި ލަނޑު ޖަހައިދިނީ މުހައްމަދު އުމައިރުއެވެ.

ދެ ޓީމު އެއްވަރުވެ އޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ވެސް ދެ ޓީމުން ވަނީ ރަނގަޅު ކުޅުމެއް ދައްކާފައެވެ. މެޗުގެ 66 ވަނަ މިނެޓުގައި ޝަހުދާން ސުލައިމާން ވަނީ ލިބުނު ޕެނަލްޓީއަކުން ލަނޑެއް ކާމިޔާބުކޮށް ސިންގަޕޫރަށް އަލުން އަނބުރާ މެޗުގެ ލީޑު ނަގައިދީފައެވެ. މި ލަނޑަށް ފަހު ސިންގަޕޫރުން އެ ޓީމުގެ ކުޅުން އިތުރަށް ވަރުގަދަކުރިއިރު އެ ޓީމުން ވަނީ 72 ވަނަ މިނެޓުގައި އަނެއްކާ ވެސް ލަނޑެއް ޖަހައި ލީޑު ފުޅާކޮށްފައެވެ. މި ލަނޑު އެ ޓީމަށް ޖަހައިދިނީ ޝާކިރު ހަމްޒާއެވެ. މި މެޗުގައި ރާއްޖެއިން ޖެހި ދެވަނަ ލަނޑު 81 ވަނަ މިނެޓުގައި ޖަހައިދިނީ ޓީސީގެ ފޯވާޑް އިބްރާހިމް މަހުދީ ހުސައިން (ފޭދޫ އިއްބެ) އެވެ.

މި މެޗަކީ އަންނަ ހަފްތާގެ އަންގާރަ ދުވަހު ބޫޓާނާ ދެކޮޅަށް އޭޝިއަން ކަޕްގެ ކޮލިފައިންގައި ކުޅުމުގެ ކުރިން އެ މެޗަށް ތައްޔާރުވުމުގެ ގޮތުން ކުޅުނު ރަހުމަތްތެރުކަމުގެ މެޗެކެވެ.