އިނގިރޭސި އެފްއޭ ކަޕްގައި ލެސްޓާ ސިޓީއާ ދެކޮޅަށް ކުޅުނު މެޗުގެ އިތުރު ވަގުތުގައި ޕެޑްރޯ ރޮޑްރިގޭޒް ޖެހި ލަނޑާ އެކު ޗެލްސީ ސެމީއަށް ދަތުރުކޮށްފިއެވެ.
ރަށުން ބޭރުގައި ލެސްޓާއާ ދެކޮޅަށް ކުޅުނު މެޗުން ޗެލްސީ މޮޅުވީ 2-1 ގެ ނަތީޖާއަކުންނެވެ. މި ދެ ޓީމު މީގެ ކުރިން ފަސް ފަހަރެއްގެ މަތިން އެފްއޭ ކަޕްގެ އެކި ބުރުތަކުގައި ވާދަކޮށްފައިވާއިރު ކޮންމެ ފަހަރަކު ވެސް ކުރި ހޯދާފައި ވަނީ ޗެލްސީއެވެ. މިދިޔަ ހަފްތާގައި ބާސެލޯނާ އަތުން ބަލިވެ ޗެމްޕިއަންސް ލީގުގެ ދެވަނަ ބުރުން ކެޓި ޗެލްސީގެ ޓީމަށް ތިން ބަދަލެއް އެންޓޯނިއޯ ކޮންޓޭ ގެނެސްފައިވެއެވެ. އެގޮތުން ވިލީ ކަބަޔޭރޯ އަދި އަލްވާރޯ މޮރާޓާގެ އިތުރުން ޓިމޯ ބަކަޔޯކޯ ވަނީ މި މެޗުގައި ޗެލްސީގެ ފުރަތަމަ އެގާރާގައި ހިމެނިގެން ކުޅެފައެވެ. ލެސްޓާގެ ފުރަތަމަ އެގާރައިން ޖެއިމީ ވާޑީ ވެސް ވަނީ މި މެޗުގައި ފެނިގެންގޮސްފައެވެ.
ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔައިރު ދެ ޓީމަށް ވެސް ވަނީ ލަނޑު ޖެހުމަށް ރަނގަޅު ފުރުސަތުތައް ލިބިގެން ގޮސްފައެވެ. އެގޮތުން ޗެލްސީގެ ވިލިއަން އަދި މޮރާޓާ ލެސްޓާގެ ގޯލަށް ނުރައްކާ ކުރިއިރު ވާޑީ ވަނީ ޗެލްސީގެ ގޯލާ އަމާޒުކޮށް ނުރައްކާތެރި ހަމަލާތަކެއް ފޮނުވާލާފައެވެ. ދެ ޓީމުން ވެސް ހަމަލާ އުފައްދަމުން ދަނިކޮށް މި މެޗުގެ ފުރަތަމަ ލަނޑު ޖަހައި ލީޑު ނެގީ ޗެލްސީއިންނެވެ. މެޗުގެ 42 ވަނަ މިނެޓުގައި ވިލިއަން ތަނަވަސްކޮށްދިން ފުރުސަތަކުން އެ ޓީމަށް މި ލަނޑު ޖަހައިދިނީ އަލްވާރޯ މޮރާޓާއެވެ.
އެއް ލަނޑުގެ ލީޑެއްގައި އޮވެ ޗެލްސީއިން ފުރަތަމަ ހާފު ނިންމާލިއިރު ދެވަނަ ހާފުގައި ލެސްޓާއިން ވަނީ އެ ޓީމުގެ ކުޅުން އިތުރަށް ވަރުގަދަކޮށް ޗެލްސީގެ ގޯލަށް ހަމަލާ އަމާޒުކޮށްފައެވެ. ލެސްޓާއިން އުފެއްދި ހަމަލާއެއް ޗެލްސީގެ ޑިފެންސަށް ސާފުނުކުރެވުމުގެ ފައިދާ ނަގައި ވާޑީ ވަނީ 76 ވަނަ މިނެޓުގައި ލަނޑެއް ޖަހައި އެ ޓީމަށް ނަތީޖާ ހަމަހަމަކޮށްދީފައެވެ. މެޗުގެ ފުރިހަމަ ވަގުތު ހަމަވިއިރު އެއްވެސް ޓީމަކަށް ނަތީޖާ ބަދަލުކޮށްލެވިފައެއް ނުވެއެވެ.
ނަތީޖާ ނެރުމަށް ކުޅުނު އިތުރު ވަގުތުގެ ތެރޭގައި ލެސްޓާގެ ކީޕަރު ޝްމައިކަލްއަށް ހެދުނު ގޯހެއްގެ ފައިދާ ނަގައި ޕެޑްރޯ ވަނީ ލަނޑެއް ޖަހައި ޗެލްސީއަށް މެޗުގެ ލީޑު ނަގައިދީފައެވެ. މި ލަނޑަށް ފަހު ލެސްޓާއަށް މާ އެދެވޭ ހަމަލާއެއް އުފެއްދިފައެއް ނުވެއެވެ.
ޗެލްސީގެ އިތުރުން ސައުތުހެމްޕްޓަން އާއި މެންޗެސްޓާ ޔުނައިޓެޑް އަދި ޓޮޓެންހަމް ވަނީ އެފްއޭ ކަޕްގެ ސެމީއިން ޖާގަ ހޯދާފައެވެ.
