ރާއްޖެޓީވީ ބަންދުކުރަން އަނެއްކާ ވެސް ޕީޕީއެމް އިން ގޮވާލައިފި
16 މާރިޗު 2018 | ހުކުރު 22:14ރާއްޖެ ޓީވީ ބަންދުކުރަން މީގެ ކުރިން ވެސް ގޮވާލި
ޕީޕީއެމް އެމްޑީއޭގެ ޖަލްސާގެ ތެރެއިން
ރާއްޖެޓީވީ ބަންދުކުރަން އަނެއްކާވެސް ސަރުކާރު ހިންގާ މައި ޕާޓީ ޕީޕީއެމް އިން ގޮވާލައިފިއެވެ.
އެ ޕާޓީން ހުކުރު ދުވަހުގެ ދަންވަރު ބޭއްވި ނޫސްވެރިންގެ ބައްދަލުވުމުގައި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވީ ރާއްޖެޓީވީ އަކީ ފިތުނަ ފަސާދަ ފަތުރަން މަސައްކަތްކުރާ ޗެނަލެއް ކަމަށާއި އެހެން ކަމުން ރާއްޖެޓީވީ ވަގުތުން ވަގުތަށް ބަންދުކުރަން ގޮވާލައްވާ ކަމަށެވެ.
"އަޅުގަނޑު ޤަބޫލުކުރާ ގޮތުގައި ރާޓީވީ ބަންދުކުރަން އަޅުގަނޑުމެން ގޮވާލަން ޖެހެނީ އެއީ ޓެރަރިޒަމްގެ އަމަލުތައް ކުރާ ނުވަތަ ޓެރަރިޒަމް އަށް ހިތްވަރު ދޭ ފަރާތެއް ކަމަށް އަޅުގަނޑުމެންނަށް ޤަބޫލުކުރެވޭތީ،" އަބްދުއްރަހީމް ވިދާޅުވިއެވެ.
ފުލުހުންގެ ޔުނިފޯމުގައި ތިބި ބައެއް ސަރުކާރަށް އިންޒާރުދީ ސޯޝަލް މީޑިއާގައި އާންމުވި ވީޑިއޯ ހެދިކަމުގެ ތުހުމަތުގައި ރާއްޖެޓީވީގެ ބައެއް ނޫސްވެރިން ހައްޔަރުކޮށްފައިވާކަމުގެ މައުލޫމާތު ލިބިފައިވާ ކަމަށް އަބްދުއްރަހީމް ވިދާޅުވި އެވެ.
"އެހެންވެގެން މި ރާއްޖެޓީވީ ބަންދުކުރާ ވާހަކަ އިރުއިރުކޮޅާ އަޅުގަނޑުމެން ދައްކަން މި ޖެހެނީ. އެއީ ގައުމުގައި ފިތުނަ ފަސާދަ އުފައްދަން މަސައްކަތް ކުރާތީ މިތަން ބަންދުކުރާ ވާހަކަ މި ދައްކަނީ. އަޅުގަނޑުމެން ކަމާ ބެހޭ ފަރާތްތަކަށް ގޮވާލަން މި ތަހުޤީޤަށް ހައްޔަރު ކުރެވުނު މީހުންނާ ދޭތެރޭ ވީހާ އަވަހަކަށް ތަހްޤީޤް ކުރައްވާ ޝަރީއަތުގެ މަރުހާލާއަށް ފޮނުއްވައި ދެއްވުމަށް އަދި މިކަން ގެންދެވެން އޮތް އެންމެ ހަލުވި ސްޕީޑްގައި ގެންދިޔުމަށް. މިއީ ޖިނާއީ ކުށެއް ކަމަށް އަޅުގަނޑު ޤަބޫލުކުރަނީ. އެހެންކަމުން ޝަރީއަތުގެ ތެރޭގައި މި މީހުންނަށް ލިބެންޖެހޭ އަދަބެއް ވީހާ އަވަހަކާ ލިބޭނެ ގޮތް ހައްދަވައި ދެއްވާށޭ" އޭނާ ވިދާޅުވިއެވެ.
ސަރުކާރު ހިންގާ މައި ޕާޓީ ޕީޕީއެމް އިން މީގެ ކުރިންވެސް ވަނީ އެތަކެއް ފަހަރު މަތިން ރާއްޖެޓީވީ ބަންދުކުރަން ގޮވާލާފައެވެ. އަދި ޕީޕީއެމްގެ އެކްޓިވިސްޓުން ތިބި ބްރޯޑްކާސްޓިން ކޮމިޝަނުން ނިންމައި، ރާއްޖެ ޓީވީ ބަންދުކުރުމަށް އަސްކަރިއްޔާ އަށް ސިޓީއެއް ފޮނުވާފައިވެ އެވެ.
