އުތުރު ކޮރެއާގެ ޚާރިޖީ ވަޒީރާއި ސްވީޑެންގެ ބޮޑުވަޒީރު ބައްދަލު ކުރައްވަނީ

އުތުރު ކޮރެއާގެ ޚާރިޖީ ވަޒީރު ރީ ޔޮން-ހޯ ސްވީޑެންގެ ބޮޑުވަޒީރު ސްޓެފަން ލޮފްވެން އާ ބައްދަލު ކުރެއްވުމަށް އެގައުމަށް ވަޑައިގެންފިއެވެ.

އުތުރު ކޮރެއާ އިން މި ބައްދަލުވުމާމެދު ބުނެފައި ވަނީ އެގައުމުގެ ބޮޑުވަޒީރު ސްވީޑެން އަށް ވަޑައިގެންނެވީ "ދެގައުމުގެ ގުޅުމާ ބެހޭގޮތުން މަޝްވަރާކުރެއްވުމަށާއި އަދި ދެގައުމުން ވެސް ކަންބޮޑުވާ އެކި ކަންކަމާމެދު މަޝްވަރާކުރުމަށް ކަމަށެވެ."

އުތުރު ކޮރެއާގެ އިސް އޮފިޝަލަކު ސްވީޑެންގެ އިސް އޮފިޝަލަކާ ބައްދަލުކުރިއިރު އެމެރިކާގެ ރައީސް ޑޮނަލްޑް ޓްރަމްޕް އާއި އުތުރު ކޮރެއާގެ ލީޑަރު ކިމް ޖޮން-އުން އާ ބައްދަލުކުރުމަށް ވަނީ ހަމަޖެހިފައެވެ. ބަހުގެ ހޫނުހަމަލާތައް ރައްދުކުރެވެމުންދާ ދެގައުމުގެ ލީޑަރުން ބައްދަލުކުރަން ނިންމުމަކީ ވަރަށް ގިނަ ބަޔަކަށް ހައިރާންކަން ލިބުނުކަމެކެވެ.

އުތުރު ކޮރެއާގެ ޚާރިޖީ ވަޒީރު ރީ ޔޮން-ހޯ ސްވީޑެން އަށް ވަޑައިގެން ސްވީޑެންގެ ޚަރިޖީ ވަޒީރާ މިހާރު ބައްދަލު ކުރައްވައިފި ކަމަށް ރިޕޯޓުތައް ބުނާއިރު، އަދި ބޮޑުވަޒީރު ސްޓެފަން ލޮފްވެން އާ ބައްދަލު ނުކުރައްވައެވެ.

ސްވީޑެން އާއި އުތުރު ކޮރެއާ އަކީ ގުޅުން އޮންނަތާ ގިނަ ދުވަސްތަކެއްވީ ދެގައުމެވެ. އެގޮތުން އުތުރު ކޮރެއާގައި ގާއިމުކުރި ހުޅަނގުގެ އެންމެ ފުރަތަމަ ޑިޕްލޮމެޓިކް މިޝަންތަކުގެ ތެރޭގައި ސްވީޑެންގެ މިޝަން ހިމެނެއެވެ. އެއީ 1970 ގެ އަހަރުތަކުގެތެރޭގައެވެ. ސްވީޑެން އަކީ އެމެރިިކާ އާއި އުތުރު ކޮރެއާ ދެމެދު މީޑިއޭޓު ކުރުމުގައިވެސް ތާރީޚެއް އޮތް ގައުމެކެވެ.

އުތުރު ކޮރެއާ އަށް ބައިނަލްއަގްވާމީ މުޖުތަމައު އިން ތަކުރާރުކޮށް ގޮވާލަމުން ދަނީ މިސައިލްތައް ޓެސްޓްކުރުމާ އަދި ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށެވެ. އެހެނަސް އުތުރު ކޮރެއާ އިން އެކަމަށް އިޖާބައެއް ނުދެއެވެ. އުތުރު ކޮރެއާގެ އަމަލުތަކުގެ ސަބަބުން އދ. އާއި އެމެރިކާ އިން ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު ވެސް އަޅާފައެވެ.