ބައްޝާރުގެ ސަރުކާރާ އަފްރީން ހަވާލު ނުކުރާނަން: ތުރުކީވިލާތް

ތުރިކީވިލާތުން އަރައި، ކުރުދީ ހަނގުރާމަވެރިންނާ ދެކޮޅަށް ހަނގުރާމަކުރަމުންދާ ސޫރިޔާގެ އަފްރީނުން ހަނގުރާމަވެރިން ފައްސާލުމަށް ފަހު ވެސް އަފްރީނުން ނުފައިބާނެ ކަމަށް ތުރުކީވިލާތުން ބުނެފިއެވެ.

ތުރުކީވިލާތުގެ ރައީސް ރަޖަބް ތައްޔިބު އުރުދުޣާންގެ ތަރުޖަމާން އިބްރާހިމް ކާލިން ވިދާޅުވީ ކުރުދީ ހަނގުރާމަވެރިންގެ އަތުން އަފްރީން މިނިވަންކުރުމަށް ފަހު އެރަށް ކޮންޓްރޯލްކުރާނީ އަންކާރާ އިން ކަމަށެވެ. ތުރުކީވިލާތާއި އިންވެގެން އޮންނަ ސޫރިޔާގެ އަފްރީނަށް ތުރުކީ ސިފައިން އެންމެ ފުރަތަމަ ޖެނުއަރީ 20 ވަނަ ދުވަހު އެރީ އެރަށުގައި ތިބި ކުރުދީ ހަނގުރާމަވެރިންގެ އަތްދަށުން އެރަށް މިނިވަންކުރުމުގެ ނަމުގައެވެ. ތުރުކީ ސަރުކާރުން ކުރުދީ ހަނގުރާމަވެރިން ބަލަނީ ޓެރަރިސްޓުންގެ ގޮތުގައެވެ. އަދި ކުރުދީންގެ ވައިޕީޖީ ޖަމާޢަތް ތުރުކީވިލާތުން ވަނީ ޓެރަރިސްޓް ޖަމާޢަތެއްގެ ގޮތުގައި ލިސްޓް ވެސް ކޮށްފައެވެ. އެހެން ނަމަވެސް މިހާރު އަފްރީނުން ނުފައިބާނެ ކަމަށް އެޤައުމުން ބުނަން ފެށުމުން، ތުރުކީވިލާތުން ސޫރިޔާއަށް އެރި އެރުން ބައިނަލްއަޤްވާމީ ޤާނޫނުތަކާ ޚިލާފު ވާނެ ކަމަށް ގިނަ ފަރާތްތަކުން ދަނީ ފާހަގަކުރަމުންނެވެ.

އަފްރީންގެ ކޮންޓްރޯލް އެއްކޮށްހެން ކަހަލަ ގޮތަކަށް ތުރުކީ ސިފައިން ނަގާފައިވާއިރު، އަފްރީންގެ ވަށައިގެންވާ އެހެން ރަށްތަކަށް އެރުމަށް ވެސް ތުރުކީ ސިފައިން ދަނީ ތައްޔާރުވަމުންނެވެ. އަފްރީންގައި ކުރުދީ ހަނގުރާމަވެރިންނާއި ތުރުކީ ސިފައިންނާ ދެމެދު ބަދަލުކުރެވެމުންދާ ހަމަލާތަކުގެ ސަބަބުން އެރަށުގެ ގިނަ އަދަދެއްގެ ބަޔަކު ވަނީ ސަލާމަތްވުމަށް ސޫރިޔާގެ ޙަލަބްގެ އިރުމަތީ ރަށްފުށުގެ ހިސާބުތަކަށް ދާން ފަށާފައެވެ. ބުރާސްފަތި ދުވަހު 10 ހާހަށް ވުރެ ގިނަ މީހުން ރައްކާތެރި ސަރަހައްދުތަކަށް ދިޔުމަށް އަފްރީން ދޫކޮށް ދިޔަކަމަށް ހަނގުރާމަވެރިން ބުނެއެވެ.

އަފްރީން ދޫކޮށް، ރައްކާތެރި ހިސާބުތަކަށް އެރަށުގެ ބަޔަކު ދަނީ. ފޮޓޯ: ރޮއިޓަރސް

އަފްރީންގައި ބުރާސްފަތި ދުވަހު އެކަނި ވެސް 12 މީހުން މަރުވެ، 60 އަށްވުރެ ގިނަ މީހުން ޒަޚަމްވެފައިވާ ކަމަށް ސޫރިޔާގެ މަސްރަހު ދިރާސާކުރާ އިނގިރޭސިވިލާތުގެ ޖަމާޢަތެއް ކަމަށްވާ ސީރިއަން އޮބްޒަވޭޓަރީ ފޮރ ހިއުމަން ރައިޓްސްއިން ބުނެއެވެ. ކުރުދީ ހަނގުރާމަވެރިން ބުނާ ގޮތުގައި ތުރުކީ ސިފައިންގެ ޙަމަލާތަކުގައި ޒަޚަމްވި ބައެއް ހަނގުރާމަވެރިންގެ ޙާލު ސީރިއަސްކަމުން މަރުވާ މީހުންގެ އަދަދު އިތުރުވާނެ ކަމަށް ބެލެވެއެވެ.

ތުރުކީވިލާތުން އަފްރީން ހިފާފައިވާއިރު، ސޫރިޔާގެ މައްސަލައިގައި އެޤައުމުން ބިނާކުރަނިވި ރޯލެއް އަދާކޮށް، އަފްރީން އިން ފޭބުމަށް ބުރާސްފަތި ދުވަހު ވިލާތުގެ އިއްތިޙާދުން ވަނީ ގޮވާލާފައެވެ. ވިލާތުގެ އިއްތިޙާދުގެ ޕާލަމެންޓުން މިމައްސަލައިގައި ބުރާސްފަތި ދުވަހު ނެރުނު ޤަރާރަށް ރައްދު ދެއްވަމުން ތުރުކީ ރައީސް ރަޖަބް ތޮއްޔިބު އުރުދުޣާން ވިދާޅުވީ "ވިލާތުގެ އިއްތިޙާދުގެ ވާހަކަތައް އެއްކަންފަތުން ވަދެ އަނެއް ކަންފަތުން ނިކުންނާނެ" ކަމަށެވެ. އަދި ވިލާތުގެ އިއްތިޙާދުގެ ޤަރާރުން ޓެރަރިސްޓުންނަށް ވާގިވެރިވާކަމަށް ތުރުކީވިލާތުގެ ވިލާތުގެ އިއްތިޙާދާއި ބެހޭ ވަޒީރު ބުރާސްފަތި ދުވަހު ވިދާޅުވިއެވެ.

އަފްރީންގެ ޙާލަތު ގޯސްވެފައިވާއިރު، ސޫރިޔާގެ ރައީސް ބައްޝާރުލް އައްސަދުގެ ސިފައިންގެ އިރުމަތީ ޣޫތާގައި ހިންގާ އޮޕަރޭޝަން ވެސް އަދިވެސް ދަނީ ކުރިއަށެވެ. އިރުމަތީ ޣޫތާ ހިފުމަށް އައްސަދުގެ ސިފައިން ވަރުގަދަ ޙަމަލާތަކެއް ދެމުންދާއިރު، އެސަރަހައްދަށް އަދިވެސް އެކަށީގެންވާ އެހީ ފޯރުކޮށް ނުދެވޭކަމަށް އދ. އިން ދަނީ ބުނަމުންނެވެ.