ފާރިސްގެ ޝަރީއަތް ކޮންމެ ދުވަހަކު ބާއްވަނީ، މިއަދު ވެސް އަޑުއެހުމެއް!
12 މާރިޗު 2018 | ހޯމަ 03:56މެދުކެނޑުމެއް ނެތި ކޮންމެ ދުވަހަކު އަޑުއެހުންތައް ބާއްވަން ނިންމާފަ
ދިއްގަރު ދާއިރާގެ މެންބަރު އަހުމަދު ފާރިސް މައުމޫން
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫންގެ މައްޗަށް އުފުލާފައިވާ ރިޝްވަތުގެ ދައުވާގެ ޝަރީއަތުގެ އަޑުއެހުންތައް ކޮންމެ ދުވަހަކު ބާއްވަން ނިންމައި، މިއަދަށް ވެސް އަޑުއެހުމެއް ތާވަލުކޮށްފިއެވެ.
ފާރިސްގެ ޝަރީއަތުގެ އަޑުއެހުމެއް އާދިއްތަ ދުވަހު ވެސް ބޭއްވިއިރު، މިއަދުގެ މެންދުރު 2:30 އަށް އަޑުއެހުމެއް ވަނީ ތާވަލުކޮށްފައެވެ. މިއަދުގެ އަޑުއެހުމުގައި އޮންނާނީ ދައުވާ ސާބިތުކުރުމަށް ދައުލަތުން ހުށަހަޅާފައިވާ ހެކިންގެ ހެކިބަސް ނެގުމެވެ.
މި މައްސަލައިގައި އާދިއްތަ ދުވަހު ބޭއްވި އަޑުއެހުމުގައި އޮތީ ދެފަރާތުން ހެކިން ހުށަހެޅުމެވެ. ދައުވާ ސާބިތުކުރުމަށް ދައުލަތުން 10 ހެއްކެއް ހުށަހެޅިއިރު، ފާރިސްގެ ފަރާތުން ދިފާއުގައި 73 ހެއްކެއް ހުށަހެޅިއެވެ.
ފާރިސްގެ ޝަރީއަތް މީގެ ކުރިން ބެއްލެވީ ގާޒީ އަލީ އާދަމް ކަމުގައިވީ ނަމަވެސް، އާދިއްތަ ދުވަހުގެ އަޑުއެހުމާ ހަމައިން ގާޒީ އަހުމަދު ހައިލަމް ވަނީ މައްސަލަ ބައްލަވަން ފައްޓަވާފައެވެ. ގާޒީ ހައިލަމް ވިދާޅުވީ މައްސަލަ ބައްލަވަމުން ގެންދެވި ގާޒީ ބަދަލުކުރެއްވުމަށް ކްރިމިނަލް ކޯޓް ހިންގެވުމާއި ހަވާލުވެހުންނެވި ގާޒީ އާދަމް އަރީފް ނިންމެވީ، މައްސަލަ ބެއްލެވި ގާޒީ ބަދަލުކޮށްދިނުމަށް ފާރިސްގެ ފަރާތުން އެދިފައިވާތީއާއި، އެ ގާޒީގެ އަތްޕުޅުގައި މިހާރު ހުރި މައްސަލަތަކުގެ އަދަދަށް ބެއްލެވުމަށްފަހު ކަމަށެވެ.
ފާރިސްގެ މައްޗަށް މި ދައުވާ ސާބިތުވެއްޖެނަމަ ތިން އަހަރާއި ދެ މަހާއި 12 ދުވަހުގެ ޖަލު ހުކުމެއް އަންނާނެއެވެ.
