އެސްޓީއޯ މާލޭ ލީގުގައި ގްރީން ސްޓްރީޓްސްއާ ދެކޮޅަށް ކުޅުނު މެޗު ކާމިޔާބުކޮށް ކްލަބް އީގަލްސް އިން ތާވަލުގެ އެއް ވަނައަށް ޖެހިލައިފިއެވެ.
ގްރީންއާ ދެކޮޅަށް ކުޅުނު މެޗުން އީގަލްސް މޮޅުވީ 2-1 ގެ ނަތީޖާއަކުންނެވެ. މި މެޗުގެ ފުރަތަމަ ލަނޑު މެޗުގެ ހަތް ވަނަ މިނެޓުގައި އީގަލްސްއަށް ޖަހައިދިނީ އެ ޓީމުގެ ބިދޭސީ ފޯވާޑް ލުއިޒް އެޑުއާޑޯއެވެ. މި ލަނޑަށް ފަހު ގްރީން އިން އެ ޓީމުގެ ކުޅުން ރަނގަޅުކުރި އިރު އެ ޓީމުގެ ބިދޭސީ ފޯވާޑް ސުބޯލް އިލިއާއަށް ވެސް ވަނީ ލަނޑު ޖެހުމަށް ރަނގަޅު ފުރުސަތުތައް ލިބި ބޭކާރުވެފައެވެ. ހަމައެހެންމެ ލީޑު ފުޅާކުރުމަށް އީގަލްސްއަށް ވެސް ފުރުސަތު ލިބުނުއިރު އެ ޓީމަށް ވެސް މި ފުރުސަތުތަކުގެ ބޭނުން ހިފިފައެއް ނުވެއެވެ.
އެއް ލަނޑުގެ ލީޑެއްގައި އޮވެ އީގަލްސް އިން ފުރަތަމަ ހާފު ނިންމާލިއިރު ދެވަނަ ހާފު ފެށިގެން ދެ ޓީމުން ވެސް ވަނީ ވާދަވެރި ކުޅުމެއް ދައްކާފައެވެ. އެގޮތުން މެޗުގެ 53 ވަނަ މިނެޓުގައި ގްރީން އިން ވަނީ މެޗުގެ ނަތީޖާ ހަމަހަމަކޮށްފައެވެ. އެ ޓީމަށް މި ލަނޑު ޖަހައިދިނީ މުހައްމަދު ރިސްވާންއެވެ. އެހެން ނަމަވެސް އޭގެ ފަސް މިނެޓު ފަހުން އީގަލްސްއިން ވަނީ ލަނޑެއް ޖަހާ އަލުން އަނބުރާ މެޗުގެ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ މި މެޗުގައި ރަނގަޅު ކުޅުމެއް ދެއްކި ފޯވާޑް ނާއިމްއެވެ. މި ލަނޑަށް ފަހު ވެސް އީގަލްސްއިން ވަނީ ގްރީންގެ ގޯލަށް ނުރައްކާ ކޮށްފައެވެ.
އެސްޓީއޯ މާލޭ ލީގުގެ ޕޮއިންޓް ތާވަލަށް ބަލާލާއިރު ކުޅުނު ތިން މެޗުން ލިބުނު ހަތް ޕޮއިންޓާއެކު އެއްވަނަގައި އޮތީ އީގަލްސްއެވެ. ގްރީން އޮތީ ކުޅުނު ތިން މެޗުން ލިބުނު ދެ ޕޮއިންޓާއެކު ތާވަލުގެ ދެވަނައިގައެވެ. މި ސީޒަނުގައި މިހާތަނަށް ކުޅުނު އެއްވެސް މެޗަކުން އީގަލްސް ބަލިވެފައެއް ނުވެއެވެ.
