ޝާހިދާގެ ހަށިގަނޑު މާލެ ގެނެސް ވަޅުލައިފި
ޝާހިދާ ދަންޖެހިފައި ހުއްޓާ ފެނުނީ މިމަހުގެ 3 ވަނަ ދުވަހު
ހދ. ނޮޅިވަރަމް
މިމަހުގެ ތިންވަނަ ދުވަހު ދަންޖެހިފައި ހުއްޓާ ފެނުނު ހދ. ނޮޅިވަރަމު ޝާހިދާ އަލީގެ ހަށިގަނޑު ރާއްޖެ ގެނެސް ވަޅުލައިފިއެވެ.
ފުލުހުންގެ މީޑިއާ އޮފިޝަލް ރާއްޖެއެމްވީއަށް ވިދާޅުވީ ޝާހިދާގެ ހަށިގަނޑު މާލެ ގެނެސްފައިވަނީ ބުރާސްފަތި ދުވަހުގެ ރޭ ކަމަށާއި ވަޅުލާފައިވަނީ ހުކުރުދުވަހުގެ ވަގުތެއްގައި ކަމަށެވެ.
ޝާހިދާ އަލީގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ގެންގޮސްފައިވަނީ މިމަހުގެ ހަވަނަ ދުވަހުގައެވެ.
އުމުރުން 40 އަހަރުގެ ޝާހިދާއަކީ ނަފުސާނީ މައްސަލަތަކެއްގެ ތެރޭގައި އުޅުނު އަންހެނެކެވެ. ނަމަވެސް ޝާހިދާގެ އާއިލާ އިން ގަބޫލުކުރާ ގޮތުގައި އޭނާ ދަންޖެހުނީ އަމިއްލައަކަށް ނޫނެވެ. އެ އާއިލާ އިން ސަބަބެއްގެ ގޮތުގައި ދައްކަނީ އޭނާ ދަންޖެހިފައި ހުރި ވާގަނޑު އައްސާފައި ހުރީ މާ އުހުގައި، އަދި މާ ވަރުގަދައަށް ކަމެވެ. ބާރަ ފޫޓު އުސްތަނެއްގައި އެ ވާގަނޑު އައްސާފައިވާއިރު، އެތަނުގައި އެ ވާގަނޑު އައްސަން އަރާނެ ހަރުގަނޑެއް ނުވަތަ ގޮނޑިއެއް ވެސް އެތަނުގައި ނެތް ކަމަށް އާއިލާ އިން ބުނެއެވެ.
މަރާ މެދު ތުހުމަތުތަކެއް ކުރެވޭތީ އޭނާގެ ހަށިގަނޑު މާލެ ގެނައީ އާދީއްތަ ދުވަހުއެވެ.
ފުލުހުންގެ ސްޕޯކްސްޕާސަން އަހުމަދު ޝިފާން ވިދާޅުވީ ޝާހިދާގެ ހަށިގަނޑު ޕޯސްޓުމޯޓަމް ހެދުމަށްޓަކައި ފޮނުވާފައި ވަނީ އިންޑިއާގެ ޓްރިވެންޑްރަމަށް ކަމަށެވެ.
މިދިޔަ އަހަރުގެ ޑިސެމްބަރު މަހުގެ މެދުތެރޭގައި ވެސް ޝާހިދާ ގެއްލިގެން އެ ރަށު މީހުން ހޯދަމުން ދަނިކޮށް ފެނިފައި ވަނީ އެއް ދުވަސް ފަހުން ވަލު ތެރެއިންނެވެ.
