ލެކިއުޓް މާޖިދު ހައްޔަރުކޮށްފި
8 މާރިޗު 2018 | ބުރާސްފަތި 20:59ބެލެވޭ ގޮތުގައި މާޖިދު ހައްޔަރުކުރީ ކުއްލި ނުރައްކަލުގެ ހާލަތުގެ ގަރާރުގެ ދަށުން
މާޖިދު ހައްޔަރުކޮށްގެން ގެންދަނީ
ފުލުހުން ތަޙްގީގް ކުރަމުންދާ މައްސަލައަކާއި ގުޅިގެން އަބްދުލް މާޖިދު (ލެކިއުޓް މާޖިދު) ހައްޔަރުކޮށްފިއެވެ.
ނިމިދިޔަ ލޯކަލް ކައުންސިލް އިންތިހާބްގެ އެމްޑީޕީގެ ކެމްޕޭން މެނޭޖަރުކަން ކޮށްފައިވާ މާޖިދު ހައްޔަރުކޮށްފައި ވަނީ ބުރާސްފަތި ދުވަހުގެރޭ އޮލިވް ގާޑެން ރެސްޓޯރަންޓްގައި އޭނާ ހުއްޓައި، އެސްއޯ ފުލުހުން ގޮހެވެ.
އެ މަންޒަރު ފެނުނު މީހަކު ރާއްޖެއެމްވީއަށް މައުލޫމާތު ދެމުން ބުނީ މާޖިދު ހައްޔަރުކުރީ ކުއްލި ނުރައްކަލުގެ ހާލަތުގެ ގަރާރުގެ ދަށުން ކަމަށް ބެލެވޭކަމަށެވެ. އެއީ މާޖިދު ހައްޔަރުކުރީ ކޯޓް އަމުރެއްގެ ދަށުން ނޫން ކަމަށްވާތީކަމަށް އޭނާ ބުންޏެއެވެ.
މިކަމާއި ގުޅިގެން ފުލުހުންގެ ބަހެއް ވަނީ ލިބޭ ގޮތް ނުވެފައެވެ.
ކުއްލި ނުރައްކަލުގެ ހާލަތު އިއުލާންކޮށްފައި ވަނިކޮށް، މާލޭގައި އެއްވުންތައް ބާއްވައި، މާލޭގެ އަމާންކަން ނަގާލުމަށް ބަޔަކު މަސައްކަތްކުރަމުން ދާކަމުގެ މައުލޫމާތު ފުލުހުންގެ އިންޓަލިޖެންސަށް ލިބިފައިވާ ކަމަށް ފުލުހުން ވަނީ ބުރާސްފަތި ދުވަހު ބުނެފައެވެ. އެކަމާއި ގުޅިގެން ކުއްލި ނުރައްކަލުގެ ހާލަތުގެ ދަށުން ފުލުހުން ވަނީ ބުރާސްފަތި ދުވަހު 4 މީހަކު ހައްޔަރުކޮށްފައެވެ. އެހެންނަމެވެސް މާޖިދު ހައްޔަރުކުރީ ކޮން މައްސަލައަކާއި ގުޅިގެން ކަމެއް އަދި ނޭނގެއެވެ.
