ސަންޖޭ ދަތަށް ފޭނެއްގެ މުދާ ހިބަކޮށް ލިބިއްޖެ

ބޮލީވުޑްގެ ތަރި ސަންޖޭ ދަތުގެ ފޭނެއް މަރުވި އިރު އޭނާގެ މުދާ ހިބަކޮށް ދީފިއެވެ. ސަންޖޭއަށް މުދާ ހިބަކޮށްފައިވަނީ މިދިޔަ ޖެނުއަރީ މަހުގައި މަރުވި އުމުރުން 62 އަހަރުގެ ނިޝީ ހަރިޝްޗަންދްރާ ކިޔާ މީހެކެވެ.

މިދިޔަ މަހުގެ ތެރޭގައި ބޭންކުން ވަނީ ސަންޖޭއަށް އޭނާގެ ފޭނުގެ މުދާ ހިބަކޮށްފައިވާ ކަމަށް ބުނެފައެވެ. އެހެން ނަމަވެސް ސަންޖޭ ވަނީ އެ ފައިސާ އޭނާ ބޭނުން ނުވާ ކަމަށް ބުނެފައެވެ.

ސަންޖޭ ދަތު ވަނީ މިހާތަނަށް 100 އަށް ވުރެ ގިނަ ފިލްމު ކުޅެފައެވެ.

ސަންޖޭގެ ލޯޔަރު ސުބްހާޝް ޖަދަވް ބުނެފައިވަނީ އެހެންވުމުން އޭނާ ހުރީ ވަރަށް ހައިރާންވެފައި ކަމަށެވެ. އަދި ފޭނަކު އެފަދަ ކަމެއް ކޮށްފާނެ ކަމަށް ސަންޖޭއަށް ގަބޫލުނުކުރެވޭ ކަމަށް އޭނާ ބުންޏެވެ. ސުބަހާޝް ބުނީ ނިޝީ ހަރިޝްޗަންދްރާ އާއި ސަންޖޭ ދުވަހަކު ވެސް ބައްދަލު ނުވާ ކަމަށެވެ. އެހެން ކަމުން އެ ފައިސާތައް ނިޝީ ހަރިޝްޗަންދްރާގެ އާއިލާގެ މީހުންނަށް މުދާ ބަދަލު ކުރުމުގެ މަސައްކަތް ބޭންކާއި ގުޅިގެން ކުރަމުންދާ ކަމަށް އޭނާ ބުންޏެވެ. ނިޝީ ސަންޖޭއަށް ހިބައިން ދީފައިވަނީ 10 ކްރޯޑް ރުޕީސްގެ އެޕާޓްމަންޓާއި ގޭގެ ހުރިހާ މުދަލެކެވެ. މުމްބާއި މިރާ އިން ރިޕޯޓް ކޮށްފައިވާ ގޮތުގައި ނިޝީ މަރުވިއިރު އޭނާގެ 80 އަހަރުގެ މަންމައާއި އެއްބަނޑު އެއްބަފާ ތިން ބެއިން ދުނިޔޭގައި އެބަތިއްބެވެ. ނިޝީގެ އާއިލާ ވެސް ދިރިއުޅެނީ މުމްބާއި ގައެވެ.