ހައްޔަރުކޮށްފައިވާ އެމްޑީޕީގެ ގައުމީ މަޖިލީހުގެ މެމްބަރު އަހުމަދު އަދުހަމަށް އިތުރު ފަރުވާ ދިނުމަށް ދޫނިދޫގައި ހުރި ޑޮކްޓަރު ދެކޮޅު ހަދާފައި ވަނިކޮށް، އިތުރު ފަރުވާއަށް އޭނާ މާލެ ފޮނުވުމަށް، ހިއުމަން ރައިޓްސް ކޮމިޝަން އޮފް ދަ މޯލްޑިވިސް (އެޗްއާރްސީއެމް)އިން ފުލުހުންނަށް އަންގައިފިއެވެ.
އަދުހަމްގެ ގާނޫނީ ވަކީލު މަހުފޫޒު ސައީދު "ރާއްޖެއެމްވީ"އަށް ވިދާޅުވީ އެޗްއާރްސީއެމުން އެގޮތަށް ފުލުހުންނަށް އަންގާފައި ވަނީ އޭނާއަށް އިތުރު ފަރުވާ ދިނުމަށް ދޫނިދޫ ޑޮކްޓަރު ދެކޮޅު ހެދި މައްސަލަ އެޗްއާރްސީއެމަށާއި ކްރިމިނަލް ކޯޓަށާއި ހެލްތު މިނިސްޓްރީއަށް ހުށަހަޅާފައިވަނިކޮށް ކަމަށެވެ.
މަހުފޫޒު ވިދާޅުވީ އަދުހަމްގެ ދަތެއްގައި ރިއްސާތީ ދޫނިދޫގައި ކްލިނިކަށް ދެއްކުމުން އެއްވެސް މައްސަލައެއް ނެތް ކަމަށް އެ ޑޮކްޓަރު ބުނެފައިވާ ކަމަށެވެ. އަދި ތަދު ކެނޑުވުމަށް ބޭހެއް ދިނުން ފިޔަވައި އިތުރު ފަރުވާއެއް ދީފައި ނުވާތީ، މަހުފޫޒު ވަނީ ކަންބޮޑުވުންފާޅު ކުރައްވާފައެވެ.
އެޗްއާރްސީއެމާއި ކްރިމިނަލް ކޯޓަށާއި ހެލްތު މިނިސްޓްރީއަށް ހުށަހެޅި މައްސަލާގައި ބުނެފައި ވަނީ މި މަހުގެ އެއް ވަނަ ދުވަހުގެ ރޭ އަދުހަމް ޑޮކްޓަރަށް ދެއްކުމަށް ދޫނިދޫ ކްލިނިކަށް ގެންދިއުމުން، ޑޮކްޓަރު ހިންހަމަނުޖެހުންފާޅުކޮށްފައިވާ ކަމަށާއި އިތުރު ފަރުވާއަށް މާލެ ގެންދިއުމަށް ވެސް ޑޮކްޓަރު އިރުޝާދު ދީފައި ނުވާ ކަމަށެވެ.
އެ މައްސަލާގައި އަދުހަމް ބަނޑުހައިހޫނުކަމުގެ ހަޅުތާލެއް ކުރަން ފަށާފައިވާ ކަމަށާއި ބަނޑުހައިހޫނު ކަމުގެ ހަޅުތާލެއް ކުރަމުންދާތާ ފަސް ދުވަސް ވެއްޖެކަމަށް މަހުފޫޒު ވިދާޅުވިއެވެ.
