ކުއްލި ނުރައްކަލުގެ ހާލަތުގެ ދަށުން 36 މީހަކު ހައްޔަރުކޮށްފައި އެބަތިބި: ވަކީލުން

ކުއްލި ނުރައްކަލުގެ ހާލަތު އިއުލާންކުރުމަށްފަހު، ފަނޑިޔާރެއްގެ ކުރިމައްޗަށް ހާޒިރުކުރުމެއް ނެތި ބަންދުކޮށްފައި ތިބި މީހުންގެ އަދަދު 36 އަށް އަރާކަމަށް އެމްޑީޕީގެ ލީގަލް ޑިރެކްޓަރ އަދި މަޝްއޫރު ޤާނޫނީ ވަކީލް ހިސާން ހުސެއިން ވިދާޅުވެއްޖެ އެވެ.

ރައީސް އަބްދުﷲ ޔަމީން، ކުއްލި ނުރައްކަލުގެ ހާލަތު އިއުލާންކޮށްފައިވަނީ ފެބުރުއަރީ މަހުގެ 5 ވަނަ ދުވަހުގަ އެވެ. ކުއްލި ނުރައްކަލުގެ ހާލަތު އިއުލާންކުރުމަށްފަހު، ވަގުތުން އެމަނިކުފާނަށް ތާއީދުކުރާ ފުލުހުންނާއި ސިފައިން މެދުވެރިކޮށް ގިނަ އަދަދެއްގެ ސިޔާސީ މީހުންނާއި ފަނޑިޔާރުން ހައްޔަރުކޮށްފައިވެއެވެ.

ކުއްލި ނުރައްކަލުގެ ހާލަތު އިއުލާންކުރުމަށްފަހު، ހައްޔަރުގައި ތިބި މީހުންގެ ތަފްސީލް ހާމަކުރައްވަމުން ރައީސް މުހައްމަދު ނަޝީދުގެ ޤާނޫނީ ވަކީލެއްގެ ގޮތުގައިވެސް މަސައްކަތްކުރައްވާ ހިސާން ހުސެއިން ވިދާޅުވީ ހައްޔަރުކޮށްފައި ތިބި މީހުންގެ އަދަދު 36 އަށް އަރާކަމަށާއި، އޭގެތެރެއިން ގިނަ މީހުންގެ ގިނަ ހައްޤުތަކެއް ނިގުޅައިގަނެފައިވާކަމަށެވެ. އަދި އޭގެތެރެއިން އެއްވެސް މީހަކު ފަނޑިޔާރެއްގެ ކުރިމައްޗަށް ހާޒިރުކޮށްފައިވެސް ނުވާކަމަށް ހިސާން ވިދާޅުވި އެވެ.

ހިސާން ވިދާޅުވި ގޮތުގައި ހައްޔަރުގައި ތިބި 36 މީހުންގެ ތެރެއިން 34 މީހަކު ތިބީ ދޫނިދޫ ޖަލުގަ އެވެ. އަދި އެކަކު ވިލިނގިލި ޕޮލިސް ސްޓޭޝަންގައި ބަހައްޓާފައިވާއިރު، ދެން ހުރި މީހާ ހުރީ ގޭ ބަންދުގައިކަމަށް ހިސާން ވިދާޅުވި އެވެ. ހިސާން ވިދާޅުވި ގޮތުގައި ހައްޔަރުގައި ތިބީ 34 ފިރިހެނުންނާއި ދެ އަންހެނުންނެވެ.

ކުއްލި ނުރައްކަލުގެ ހާލަތު އިއުލާންކުރުމަށްފަހު އެންމެ ފުރަތަމަ ހައްޔަރުކުރި ބޭފުޅުންގެ ތެރޭގައި ހިމެނެނީ ކުރީގެ ރައީސް މައުމޫން އަބްދުލްޤައްޔޫމާއި، އުއްތަމަ ފަނޑިޔާރު އަބްދުﷲ ސައީދާއި، ފަނޑިޔާރު އަލީ ހަމީދު އެވެ. މީގެއިތުރުން ގިނަ އަދަދެއްގެ ސިޔާސީ ބޭފުޅުންނާއި، ބިދޭސީންނާއި، އެމްޑީޕީގެ ޤައުމީ މަޖިލީހުގެ މެމްބަރުންވެސް ކުއްލި ނުރައްކަލުގެ ހާލަތު އިއުލާންކުރުމަށްފަހު ހައްޔަރުކޮށްފައިވެ އެވެ.